Kooloosi 1

Kugbɔŋu kun Pɔɔl ŋmàn̄ ki tīī

Kooloosi

yabee

Ijaam

1 Man Pɔɔl un Unimbɔti là ḿ nīn sá Yeesu Kriisitoo kpambalee nì ti-nabiki Tiimootee di ŋmàn̄ kugbɔŋu nee.

2 Ti ŋmàn̄-ku kí tīī nimbi bin sá Unimbɔti yab bin bí Kooloosi, ki kpántì ti-nabimɔntiimu Kriisitoo puee ní. Ti-Baa Unimbɔti ń ŋá-ni tiŋan kí tīī-ni ŋgbansɔŋfi.

Pɔɔl jáam̀ Unimbɔti Kooloosi yab pu

3 Ŋyunti sá kamaa, ti yaa pée bíi mèé ki tìì-nee, ti jáaḿ Unimbɔti ti-Dindaan Yeesu Kriisitoo Baa ni-pu. 4 Di sá yii ti gbìl̄ ni nín cáá dimákal Yeesu Kriisitoo pu ki néeń Unimbɔti yab kɔkɔee. 5 Di sá yii ni dàkafī tipaal tin dɔ̄ ki cí-ni yilpuee pu. Ni béè an paati pu ŋyunti ŋun bi nìn péé péé ki sòon̄ nì ni ibaamɔn bɔtee^a. 6 Tibɔmɔntiil gbanti tin bi cáań-nee bíi gbìtī ki lòoǹ abimɔnti ajan kɔkɔ nib cee. Míǹ ní tì túń atunnyaan ni-cee, kí yòon̄ doooo ŋyunti ŋun ni nìn péé péé ki fōō-tì ki lafun béè Unimbɔti nín ŋáań binib tiŋan tiŋyee. 7 Tíǹ ní Eepafrasi nìn dàkā-ni. Úǹ di sá ti-tɔntɔnjuti un ti néeńee, ki tūǹ Kriisitoo tundi deedee ki tútúǹ-ni. 8 U máafì-ti dineendi din Circir Fam yàntī ni cáá Unimbɔti yab puee.

9 Míǹ puee, kí yòon̄ daliŋkin ti gbìl̄ ni-puee, ti mun pée bí ki mèé kaa gbèentí ki tìì-ni yii Unimbɔti ń yàntī ní béé mmɔntiim tin u là ní ŋée, kí tīī-ni iciin kɔkɔ nì dinyil din Unimbɔti Fam tììyee ní gbìl̄ u-bɔti taapu. 10 Ú yàntī ni-bimbim ń nīn nóó nì bin sá ti-Dindaan yabee bimbim kí ŋmā kí fáatí-u ŋyunti sá kamaa. Míǹ ní ni làá nīn lòoǹ abimɔnti ŋin sá ní nīn tūǹ atummɔnti kɔkɔee, kí nīn mɔ̀tīi béetí Unimbɔti, 11 ú nīn tìì-ni mpɔn ŋyunti sá kamaa, kii u nín sá ipɔn nì tinyooldaan puee. Mpɔn gbanti làá yàntī ní nīn jīǹ kimɔtii ki pɔ̄ɔntí ŋyunti sá kamaa. 12 Ní nīn jáaḿ ti-Baa Unimbɔti dipɔɔpindi poon u nín yāntì ní dāá ŋmā kí ká tin u síiǹ kí tīī u-yab u-dumpu, ŋwalifi laŋkee. 13 Di sá yii u nyántì-ti dibɔmbɔndi pɔŋŋun^b ki cáań-ti u-Jipɔnneeŋkaau beel poon. 14 U-Jipɔɔnee di yāntì Unimbɔti fīī-ti ki líì, ki dū ti-kpitii ki pú-ti.

Kriisitoo nì u-tundi bɔti

15 Úǹ di sá Unimbɔti un baa wāĺee naŋku, ní ki līī tin kɔkɔwoooo Unimbɔti náańee nyɔkɔpu^c. 16 Di sá yii tiwan tin kɔkɔ bí yilpuee nì tin bí taapuee, tin bi wāĺee nì tin baa wāĺee, an yaa sá ituun in jīǹ abeeyee nì in sá bikpilibeeyeeee, an yaa tí sá in cáá mpɔneeyeeee^d, Unimbɔti nìn dī u-Jipɔɔnee pu ní ki náań tíǹ kɔkɔ. U-Jipɔɔnee di náań tikɔkɔ ki yì an kɔkɔ mun. 17 Úǹ di nìn bí ní boonee tiwan kɔkɔ dɔ́miń. Úǹ di yàntī tiwan kɔkɔ bí ti-laŋki. 18 Úǹ di sá u-nikitil yil ní u-nikitil sá u-wunti. Úǹ di tìì dimaŋfal. Bin fīkitì ditaŋkpiilinee kansikinee, úǹ di sá ukpil, án nín làá ŋá pu ú kpántí upeepeekaa tikɔkɔ poonee. 19 Di sá yii Unimbɔti lēē yii u-Jipɔɔnni ní u làá nīn bí mmɔmin. 20 U bóob́ kí dī u-pu u nì duulinya kɔkɔ ń mɔ̄ɔkì. U-Jipɔɔnee nín kpíì ndɔpuntikaa pu puee di cáań ŋgbansɔŋfi tin kɔkɔ bí yilpuee nì tin kɔkɔ bí taapuee pu.

21 Ni nín nìn cáá tilandɔkɔkpiil ki tūǹ atuŋkpiti puee, ni nì Unimbɔti kansikin nìn bíil̀, ní ni nìn sá u-nannanliibi. 22 Ama kɔŋkɔnnee, Yeesu nín nìn kpántì unil ki kpíì puee ní Unimbɔti yāntì ni nì u mɔ́ɔkì. Mimmee, u làá cáań-ni u-nimbiin, ní nīn sá u-yab kí nīn bí circir, báà ubɔ ń taa ká ni-pu tikpitil kí lì. 23 Ama, ni máaǹ tibɔti tin ni nìn fōō ki kííyee, ní nīn ŋúb́-tì mmɔntiimin, kí nīn sí deedee kí báań inyaan kí taa lēē dimákal Tibɔmɔntiil tin ni gbìl̄ee pu. An bɔtee di sá tin bi sòon̄ ki tīī báà ŋma ajan kɔkɔee. Man mun Pɔɔl kpántì un kíǹ ki sòoǹ an bɔtee ní.

Pɔɔl túń ditundi ki tīī Kriisitoo nikitiŋ

24 Kɔŋkɔnnee an mɔ́ɔkiǹ-mi m nín bíi jīǹ falaa ni-puee, an dàkà yii ḿ púntí falaa un Kriisitoo tīī-mee m-wuntin kí tīī u-nikitil din sá u-wuntee^e. 25 Kii Unimbɔti nín túǹ-mi ditúndi ḿ tɔ̄ ditundi kí tīī nimbi Kriisitoo nikitil puee, man kpántì utɔntɔnli ki tīī-ni: m-tundi di sá ḿ sòoǹ u-bɔtee kɔkɔ mmɔntiim. 26 Tibɔtee di sá tin nìn bí dibalin doooo abin abin, báà ubɔ kaa béè ti-puee, ní kɔŋkɔnnee Unimbɔti bīitì ti-pu ki tīī u-nib. 27 U nín là puee di sá bí béé tibɔbalkaalee nín cáá kunyaaŋŋu tikpil ki tīī bin kaa sá Juuda yabee puee yii: Kriisitoo bí ni-pɔbiliŋin ki yàntī ni máká yii ni làá dāá jī Unimbɔti nyooti. 28 An puee, ti sòoǹ Yeesu Kriisitoo gbanti bɔti ki tìì unil sá kamaa, ki dù ti-ciiŋyi kɔkɔ ki dàkà ki kpáafí báà ŋma, bí ŋmā kí nīn sá binib bin bīńee, kun puee bi nì Yeesu Kriisitoo ŋá ubaanti. 29 Míǹ pu ní m gì ki dù mpɔŋkpaan ŋun Kriisitoo tìì-mee, mpɔn ŋun tūǹ ditundi man nee, ki cáa mɔ̀ dimool ni-pu.