Kooloosi 3

1 Ama ni yaa nyí yii Kriisitoo kpáaǹ-ni ki kpíì ki fīkitèe, nín̄ nyàab̀maan tin bí yilpuee, laakin úǹ bí ki kā Unimbɔti ŋaŋgiil púee^a. 2 Dūmaan ni-landɔkɔi kí dūú tɔ̄ yilpu wanti pu, kí taa dūú tɔ̄ taapu yati pu. 3 Di sá yii ni kpíì, ní ni-maŋfal bál̀ Kriisitoo ni Unimbɔti cee. 4 Kriisitoo un sá ni-maŋfalee yaa láa páaǹnée, ni mun dāa pāantiń ní ki cáá tinyool kii úŋ̀wuee.

Dimaŋfakpikil nì dimaŋfapɔndi

5 Mimmee, kpɔ̀maan taapu doo bimbikpitim min bí ni-nee, tin sá tilaakpaal nì tijɔkɔndi, ilandɔkɔkpiti nì nnimbitaataam min nì iwaatooti sá tiwambaantiilee. 6 Ikpiti gbanti pu ní Unimbɔti làá dáaĺ bin kaa tɔ́-uee tafal. 7 Míǹ ní ni nìn ŋáań dooooyee, ŋyunti ŋun ni nìn dáá bí ikpitinee.

8 Ama kɔŋkɔnnee, ní fámaan ikpiti kɔkɔ, kí taa nín̄ fòol̄ mbiim, kí taa nín̄ cáá diŋuul nì tilandɔkɔkpiil. Ní taa yàntī asiibil nì tibɔfan ń nīn nyēē ni-nyɔmmun. 9 Ní taa nín̄ mɔ́ntímaan tɔb. Di sá yii ni fá ni-bimbikpitim nì atuun ŋin ni nìn ŋáań dooooyee kɔkɔwoooo, 10 ní ki yōoǹ mbimbipɔm min pɔ̀ntī baabadal^b ki cá ki nántíǹ Unimbɔti un náań-mèe nín bí puee. Mimmee, án làá yàntī ní béé ni-Nimbɔtiuee mbaamɔm. 11 Míǹ puee, a yaa sá Juuda yɔuaaa, a yaa kaa sáaa, a yaa gíí dikpancandaaa, a yaa kaa gííyaaa, a yaa sá unicaanaaa, a yaa tí sá umɔnilaaa, a yaa sá uyumbuɔɔɔ, a yaa tí tɔ́ a-baaa, tíǹ kaa páb́. Un baba bɔti páb́ee di sá Kriisitoo un bí báà ŋmanee.

12 Nimbi bin Unimbɔti lútì, ni kpántì u-yab bin u néeńee, ní nīn sūm̀maan tɔb saai kí nīn ŋáań tɔb tiŋan kí nīn sìntīǹ ni-ba taapu ki tìì tɔb, kí nīn cáá kimɔtii. 13 Ní nīn ŋúb́maan tɔb. Ni-jutiibi yaa yīntiǹ-nee, ní nīn cáa pūǹ-bi. Kii ti-Dindaan nín dū ni-kpitii ki pú-ni puee, ni mun ń nīn cáa pūm̀maan tɔb míǹ mbaantiim^c. 14 Tin páb́ ki jítiǹ tikɔkɔee di sá ní nīn néeń tɔb. Míǹ ní ni làá ŋmā kí nīn cáá nnyɔɔpee tiŋman pu. 15 Yàntīmaan ŋgbansɔŋfi ŋun Kriisitoo tììyee ń nīn kpòotī ni-pɔbiliŋ. Di sá yii ŋúǹ pu ní Unimbɔti yíiń-ni ki kpáfì kii tiwumbaantiilee. Ní nīn jáaḿ Unimbɔti tiŋan tin u ŋáań ki tìì-nee pu. 16 Kriisitoo bɔtee nì tì-gaajati kɔkɔ ń nīn bí ni-cee mmɔntiimin. Ní nīn dàkà tɔb u-bɔtee kí nīn kpáafímaan tɔb nì iciimmɔnti, kí nīn gà ilan nì ni-pɔbiliŋ kɔkɔ, ilan in kā Inyɔŋki laŋyi gbɔŋku poonee nì Kriisitoo nikitil laŋyi nì ilan in Unimbɔti Fam tìì-nee kí nīn cáa pàkà Unimbɔti u-ŋanti pu^d. 17 Tin kamaa ni yaa làá lèe nì tin kamaa ni yaa làá ŋée, ŋámaan an kɔkɔ nì ti-Dindaan Yeesu pu, kí nīn dìmaan u-pu ki jáaḿ ti-Baa Unimbɔti.

Unil nín máaǹ kí nīn bí min dicindinee

18 Nimbi binimpoobee, nín̄ tɔ́maan ni-calib, min máaǹ ti-Dindaan yab ń ŋée dee.

19 Nimbi bininjabee, nín̄ néeḿmaan ni-nimpoobi, kí taa nín̄ cáá bi-pu ntoom.

20 Nimbi mbiyaamuee, an sá ni-tundi yii ní nīn gbìlim̀maan ni-baabi nì ni-nab nyɔmmu ŋyunti sá kamaa, míǹ di sá min fáatiǹ ti-Dindaanee.

21 Nimbi bibaatiibee, ní taa nín̄ páb́ ni-biyaamu tikpil, mu-wunti ń yɔ̀tī.

22 Nimbi iyumbuee, ní nīn gbìlim̀maan bin sá ni-dindambi taapu dooyee nyɔmmu iyunti kɔkɔ. Ní taa nín̄ tūǹ ditundi min fáatì-bee ŋyunti ŋun bi kpèé-nee ŋmaniŋma, ama ní nīn tūǹ bi-tuuŋŋi nì dipɔbil diba kii ni nín fàŋkí ti-Dindaan puee. 23 Báà ditundi din ní an yaa yāntì ki sée, tɔ̄maan-dì nì ni-pɔbiliŋ kɔkɔ, a lì kii ti-Dindaan ní ni tūǹ ki tìì, an kaa sá nnibiyaamuee. 24 Ní nīn nyí yii ti-Dindaan làá dāá pà-ni tipaal tin sá kutindaŋuee^e. Di sá yii ni-Dindaan un ni baasii tūǹ ditundi ki tììyee di sá Kriisitoo. 25 Un yaa ŋá ikpitee làá ká ikpiti paati, kun puee ti-Dindaan gbanti kaa gàntī binib^f.