1 Teesalooniiki 2

Pɔɔl nín túń ditundi din Teesalooniikee

1 Nnabiyaamu, kii nimbi ni-ba nín pée nyí puee, kaa sá yii ti dɔ́miń ni-dumpu fám. 2 Ni nyí yii bi sāaǹ-ti ki sīī-ti Fiiliipi tiŋkin ní ti dāa nín bāań ni-cee Teesalooniiki. Ama ní Unimbɔti tīī-ti kunyannyaau tí sòoǹ nì ni u-Bɔmɔntiiti nì dikɔ̀ndi poon^a. 3 Ti-bɔti tin ti sòoǹee kaa sá tinyimɔmbɔti, kaa sá ilandɔkɔkpiti bɔti, kaa tí sá tibɔŋmatiŋkaal. 4 Ama Unimbɔti cɔ́ŋkì-ti ní ki dū u-Bɔmɔntiiti ki ŋúbiǹ-ti tí sòoǹ. An puee ní ti sòoǹ min làá nīn fáatiǹ Unimbɔti un wāĺ ti-pɔbiliŋinee, an kaa sá kí fáatíǹ binib. 5 Nimbi ni-ba nyí yii taa sòon̄ nì ni tibɔkiilkaal ki ká jaanjaan. Taa tí sòoǹ ki nyàab̀ ni-cee animbil yam, Unimbɔti nyí ti-pu míǹ. 6 Taa nyàab̀ ubɔ ń tīī-ti tinyool. Taa nyàab̀ nimbi nyootaaa, kaa nyàab̀ bin kíǹee mun yati. 7 Ama ti bàà cáá nsan kii ti nín sá Kriisitoo kpambaliŋee puee kí tùkù-ni yii nimbi di máaǹ kí nīn kpèé-ti, ama taa ŋá míǹ. Ti kāl̀ ni-cee ki mɔ̄ kii ubinaati nín mɔ̄ pu ki ŋúb́ u-biyaamuee ní. 8 Ti nín néeń-ni puee, ti là yii án taa nín̄ sá Unimbɔti bɔti ŋmaniŋma ní tí tīī-ni, ama tí dū ti-maŋfal kí kūtì kí tīī-ni, kun puee ni kɔ́-ti tiŋan tiŋan. 9 Nnabiyaamu, nimbi ni-ba ká ti nín túń atuun pu ŋwiimpu nì kunyeeu ki gīī kí ŋmā kí ŋúb́ ti-ba kí nīn sòoǹ Unimbɔti bɔti, án taa nín̄ sá yii ni-kansikin ubɔ ní ń nīn tú ti-gìńdee.

10 Nimbi ni-ba ká. Unimbɔti mun ká yii ti-bimbim min ti dūu kāl̀ nimbi bin fōō Unimbɔti bɔti ki kííyee kansikinee bí circir ki bí deedee. Taa yīntì báà tiba nì tiba poon. 11 Min ní ni nyí yii ubaati ŋáań u-biyaamuee, míǹ ní ti ŋá ni-kansikin ubɔ ubɔ. 12 Ti sáŋkì-ni ki tīī-ni kunyannyaau ki páb́-ni yii ní nīn còom̄ min fáatiǹ Unimbɔtee, úǹ un yíiń-ni ní dāá kɔ́ u-Beel nì u-nyootinee.

13 Kun pu ti gíti pàkà Unimbɔti kaa gbèentée di sá ti nín cáań Unimbɔti bɔti ki sòon̄ nì nee, ni pílifì-tì ki fōō-tì kaa dūu yíiń binib bɔti, ama ki fōō-tì yii tì sá Unimbɔti bɔti tiŋman. Tibɔti gbantee di tūǹ nimbi bin fōō ki kííyee pɔbiliŋ poon atuun. 14 An puee, nnabiyaamu, ni dī Unimbɔti nikitil din bí Juudee ki sá Yeesu Kriisitoo yabee tabɔbiliŋ dee. Di sá yii falaabi bin ni jíń ni-jutiibi ceeyee, falaabee bibaantiibi ní bi mun jíń Juuda yab ŋaan^b. 15 Bíǹ di kūū ti-Dindaan Yeesu nì Unimbɔti bɔnaatiliibi ki sāaǹ ti mun^c. Unimbɔti kaa gèetíǹ-bi ní bi sá binib kɔkɔ pulincɔntiibi. 16 Bi pìintí-ti nsan tí taa sòoǹ nì bin kaa sá Juuda yabee Unimbɔti bɔti tin ŋūǹ kí cáań-bi difiilee. Bi mɔ̀tīi gbēentí bi-kpitii pu ŋyunti kamaa. Ama Unimbɔti fōō bi-pu diŋuul ki dóò.

Pɔɔl nyàab̀ kí gíti ká Teesalooniiki yab

17 An yaa sá timbee, nnabiyaamu, doooo ŋyunti ŋun ti yāaǹ tɔbin nì tiwun yàantam, kaa sá nì ti-pɔbiliŋee, ti nyàab̄ nì dinimbinaamandi kí bàà fàtīí ká ni-nimbiin ti-pɔbiliŋ ń bàà sɔ̀ŋkì. 18 Ti mɔ̀n̄ yii tí gítiń ni-cee, cilinjee man Pɔɔl, m mākaǹ ŋfunyɔm kupaau kí bàà gítiń ni-cee. Ama Sitaan pīiǹ-ti nsan. 19 Nimbi di sá bin pu timbi cɔ́tée, ki sá ti-pɔɔpindi nì ti-jajil daaŋku kun pu ti-Dindaan Yeesu yaa láa gítìńee, ti dāa gbàntī u-nimbiinee. 20 Tiŋman nimbi di sá timbi nyooti nì ti-pɔɔpindi.