3
1 Ti nín kaa nìn gíti ŋūǹ kí nīn kā míǹ kaa gbìl̄ ni-puee ní timbi lēē yii min ŋān̄ee di sá tí gbíntí kí kàl̄ Ateeni ti-babaa. 2 Ní ti dū ti-nabiki Tiimootee ti nì un tūǹ Unimbɔti tundi ki sòoǹ Kriisitoo Bɔmɔntiitee ki túnní ni-cee ú tīī-ni kunyannyaau kí kūtì-ni mpɔn ni-fookiiu poon. 3 Ni-kansikin ubɔ ń taa yàntī falaa un poon ni bée ń ŋmā-u. Kun puee ni nyí yii an sá falaa di pée dɔ̄ ki cí-ti tí jī. 4 Ti nín nìn dáá bí ni-ceeyee, ti nìn pée tùkū-ni ki yóoǹ yii falaa dɔ̄ ki cí-ti, an di bāań nee kii ni nín nìn gbìl̄ puee. 5 M nín kaa ti ŋūǹ kí nīn gbíntìi kā ki cée puee ní m túnní Tiimootee ú dāá kpèè ni-fookiiu nín bí puee, kun puee m fàŋkí yii Sitaan ń taa láa cɔ̄ŋkì kí líí-ni ti-tundi din ti túńee ń ŋá fám.6 Ama kɔŋkɔnnee Tiimootee nín nyánní ni-cee ki fātìi bāańeeb, u cáań-ti faawiimɔnti ni-fookiiu nì ni-neendi pu. U máafì-ti yii ni téetí ti-pu múlmul mmɔntiimin ki nyàab̀ kí bàà ká-ti kii ti mun nín nyàab̀ kí ká ni mun puee. 7 Míǹ puee nnabiyaamu, ni-puee ti kāntí kunyannyaau ti-falaabi nì ti-nimbinaamandi kɔkɔ poon. Ni-fookiiu di tīī-ti dipɔɔsɔŋkil. 8 Díǹ pu nee timbi ŋmátì ní, kun puee ni gbíntìi bí ti-Dindaanni ki ŋúb́ an píkí. 9 Dipɔɔpiŋkpaandi din ti cáá ni-pu ki fàal̀ Unimbɔti nimbiinee, taa ti nyí gba ti nín làá pàkà-u kí gbèen̄ puee. 10 Ti mèé ki páb̀-u ŋwiimpu nì kunyeeu yii ú pée yàntī tí gíti ká-ni án nín làá ŋá pu ní kun naa cááyee tí tīī-ni ní dūú gbéeǹ ni-fookiiu puee.
11 Ti-Baa Unimbɔti u-ba nì ti-Dindaan Yeesu ń ŋāŋkì ti-saŋŋu tí ŋmā kí dāá ká-ni. 12 Ti-Dindaan ń yàntī dineendi din ni cáá tɔb pu nì binib kɔkɔ puee ń wíiǹ ní mɔ̀tīí nīn néeń tɔb míǹ tikpil kí nīn pée cáa cá, án nīn bí kii ti mun nín néeń-ni puee. 13 Ú yàntī ni-pɔbiliŋ ń nīn tɔ́kɔ́ ibaamɔn pu ki pɔ̄ɔ̄, kí nīn bí circir bí taa ká ni-pu ikpiti iba ti-Baa Unimbɔti nimbiin ŋyunti ŋun ti-Dindaan Yeesu yaa láa gítìń nì bin kɔkɔ sá u-yabee. Ameeni.