1 Teesalooniiki 4

Mbimbim min fáatì Unimbɔtee

1 Kí kúntí tibɔtee, nnabiyaamu, ti dàkā-ni min ní ni máaǹ kí nīn còom̄ Unimbɔti ń nīn fáatì ni-bɔtee. Ibaamɔn, ni bíi còom̄ min fáatì Unimbɔtee, ama ti dū ti-Dindaan Yeesu ki gbāam̀-ni yii ní nīn gbíntìi ŋáań min jítiǹ mimmee ki cá. 2 Ni nyí ti nín nìn dàkā-ni tibɔti tin ti-Dindaan Yeesu yindi puee. 3 Unimbɔti nín là kuŋyee di sá ní nīn bí circir kí nīn ŋúb́ ni-ba kí taa ŋá tilaakpaal. 4 Ni-kansikin báà ŋma nimpucáatam ń nīn sá circir ki cáá tinyool, 5 kí taa dū ni-ba kí tīī ajɔkɔntuun kii bin kaa nyí Unimbɔtee nín ŋáań puee. 6 Tibɔti nee poonee, ni-kansikin ubɔ ń taa ŋá u-nabiki min kaa kítèeyaaa, kí taa mùul̀-u. Ti nìn tùkū-ni an bɔti dooooyee ki gíti kpáafì-ni-tì tiŋan yii ti-Dindaan làá dāá dáaĺ bin ŋáań an kpitiiyee tafal. 7 Di sá yii Unimbɔti kaa yíiń-ti tí dāá nīn bí tijɔkɔndi poon, ama u yíiń-ti tí dāá nīn sá circirdambi ní. 8 An puee un di yaa dū ti-dàkatam nee ki fée, an kaa sá unil bɔti ní u fá, ama Unimbɔti un tīī-ni u-Circir Famee bɔti ní u fá.

9 An yaa kíǹ ni nì ni-nabiyaamu kansikin neendee, an kaa ti bàlifī yii tí ŋmà-ni an pu gba, kun puee Unimbɔti dàkā-ni ni nín máaǹ kí nīn néeń tɔb puee. 10 An neendee gba ní ni cáá nnabiyaamu mun kɔkɔ bí Maseeduwaan tiŋki kɔkɔnee pu^a. Ama ti bàlifī-ni yii ní gíti ŋá min jítiǹ min ni nìn ŋáań dooooyee. 11 Ní pɔ́ɔǹ ni-ba kí nīn bímaan ŋgbansɔŋfi poon kí nīn tūǹ atuun kí kpíiǹ ni-ba, kii ti nín nìn pée tùkū-ni dooooyee puee. 12 Ni yaa ŋá mimmee, an di làá yàntī bin kaa nyí Unimbɔtee ń nīn tɔ́-ni, ní naa báká ubɔ pu.

Ti-Dindaan Yeesu gítintam

13 Nnabiyaamu, ti là yii ní nīn nyí bin kpíìyee bɔti nín làá dāá jītí puee mbaamɔmin. Taa là yii ní nīn bí kunimbaaun kii bin kaa cáá ti-Dindaan pu dimákalee nín bí puee. 14 Kun puee ti nyí yii Yeesu kpíì ki fātìi fīkitì, míǹ ní ti nyí yii Unimbɔti làá fàtīí tí gíiǹní bin nóó Yeesu ki kpíìyee dimaŋfalin, kii u nín fīkitì Yeesu puee.

15 Ní pīlifì, ti-Dindaan bɔti tin u nìn sòoǹee tiba sɔ̀. Ti-Dindaan yaa láa bāańee, timbi bin dáá bí dimaŋfalinee kaa làá dāá péeǹ bin kpíìyee kí lìntī. 16 Di sá yii ti-Dindaan u-ba làá dāá pɔ̄ kinyɔkɔ ní ituun kpiliu ń téeń ní Unimbɔti kantándi ń búń. Niinee ní ti-Dindaan ń nyānní yilpu kí sìntīń, ní bin fōō-u ki kíí ki kpíìyee ń péé péé kí fìkitī. 17 Ní timbi bin dáá kíǹ kaa kpíìyee mun ń yīkì kí kūtì bi-pu ní án yòon̄-ti kutaa pu tí tūŋkì ti-Dindaan atagbanni, ní ti nì ti-Dindaan ń nīn kíǹ ki bí baabadal^b. 18 Ní nīn cáá tibɔti nee ki sɔ̀ŋkīmaan tɔb pɔbiliŋ.