Tiiti 1

Kugbɔŋu kun Pɔɔl ŋmàn̄ ki tīī

Tiitee

Ijaam

1 Man Pɔɔl un sá Unimbɔti tɔntɔnliu ki sá Yeesu Kriisitoo kpambalee di ŋmàn̄ kugbɔŋu nee.

Yeesu Kriisitoo di túnní-mi ḿ yàntī bin Unimbɔti lútì bí nīn sá u-yabee ń fōō-u kí kíí, kí béé nnimbɔtisan mmɔntiimin. 2 Bí ŋmā kí nīn kíǹ ki máká dimaŋfal din kaa cáá dikúntilee pu. Doooo jaanjaan ní Unimbɔti un kaa mɔ́ntée pōoǹ yii u làá tīī-ti dimaŋfal gbanti. 3 Ŋyunti bāańee, ní ti-Fiiliu Unimbɔti dī u-nyɔɔbundi pu ki nyántì tin u nìn pōoǹee ki dàkā-ti. Dinyɔɔbundee di sá din u dūu ŋúbiǹ-mi ki bí yii ḿ nīn sòoǹee.

4 Sii Tiiti^a un kpántì m-ba bindi pu jipɔɔn ti-kɔkɔ nín fōō Yeesu ki kííyee puee ní m ŋmàn̄ kugbɔŋu nee kí tīī. Ti-Baa Unimbɔti nì Yeesu Kriisitoo ti-Fiiliu ń ŋá-si tiŋan, kí tīī-si ŋgbansɔŋfi.

Ditundi din Tiiti làá tɔ̄ Kreeti tiŋkinee

5 M yāntì-si Kreeti tiŋkin yii á púntí kí bɔ́ntí ditundi din kíǹ niinee, kí kàan̄ bikpilib Kriisitoo nikitiŋ kansikin kitiŋ sá kamaa poon, kii m nín nìn pée tùkū-si puee. 6 Kriisitoo nikitil kpiliu máaǹ bí taa ká u-pu ibɔkpiti iba, kí nīn cáá unimpubaanti, u-biyaamu ń nīn sá bin fōō Yeesu ki kíí ki sá mun pu binib kaa sòoǹ yii mu-bimbim kaa ŋān̄, muaa tɔ́ binibee. 7 Di sá yii un kpòotī Kriisitoo nikitilee tundi di sá ú nīn kpèé Unimbɔti tundi ń còom̀. An puee waa máaǹ bí ká u-pu ikpiti iba. Ú taa nín̄ sá ulambidaan nì uŋuudaan nì udanyɔgbil, kí taa nín̄ sá kílkil niliu nì un dì isaŋkpiti pu ki kāntí animbilee. 8 Ama ú nīn fòol̄ binicambi tiŋan, kí nīn néeń tin ŋān̄ee, kí nīn cáá iciin, kí nīn bí deedee, ki bí circir, kí nīn ŋūǹ ki ŋúb̀ u-ba. 9 U máaǹ kí nīn kpáafí tibɔŋmanee án píkí kii bi nín dàkā-tì puee, án nín làá ŋá pu ú ŋmā kí nīn cáá tibɔŋman gbantee ki tìì binib kunyannyaauee, kí kpáàa dàkà bin mun kaa là tibɔti gbantee bi-yìntitamee^b.

10 Di sá yii binib tikpil bí ki gáatì ki cáá tibɔfan ki kíiĺ binib. Bin pée yì diyilee di sá Juuda yab kansikin biba. 11 Á pìin̄-bi nsan bí taa ti sòoǹ, kun puee bi dàkà tin kaa máaǹ bí dàkèe, ki bíiĺ adicammɔn, ki dì icoo saŋyi pu míǹ kí ŋmā kí ká animbil. 12 Bi-bɔnaatiliu ubɔ, u sá ukreetija. Úǹ di nìn lī yii: «Kreeti tiŋki yab pée sá binyimɔndambi ní, ki cáá ntoom kii ipeecuncutee, ki sá biwutijoodambi, ki sá bipoofub.» 13 Kijapaayee nín lī puee, waa mɔ́ntì. An puee, á kpìin̄-bi tiŋan án nín làá ŋá pu bi-fookiiu ń nīn sá ibaamɔn yɔuee. 14 Bí yàntī titiŋkpikibɔti tin Juuda yab cáá ki máafée, nì binib bin fá ibaamɔn saŋŋu ki yōoǹ bíǹ bi-ba marabee bɔti. 15 Binib bin bí circiree, tikɔkɔ sá circir ní ki tīī-bi. Ama bin kaa fōō Yeesu ki kíí ki kɔ́ tijɔkɔndee, tiba kpá ki bí bíǹ cee circir, kun puee bi-landɔkɔi nì bi-ciiŋyi kɔ́ tijɔkɔndi. 16 Bi gà bi-biŋŋi yii bi nyí Unimbɔti, ní bi-tuuŋŋi ŋin bi tūǹee dàkà yii baa nyí-u. Bi sá bikpitib ní ki gáatì, kaa ŋūǹ kí tɔ̄ ditummɔntiil báà diba.