Pɔɔl ŋmàn̄ Tiimootee gbɔŋku kuliliitiiu nee Room tiŋkin ní (1.17). Pɔɔl nìn bí sarka un pɔ̄ɔ̄yee poon niin (2.9) ní an nìn bí-u kii báà ŋma dū-u ki fée (4.10, 16). U bàn̄ u-tundi kúntilaŋki (4.6), ní ki bíi kpáafí u-tɔntɔnjuti un u nìn néeń tikpilee (1.2).

Pɔɔl péé ki jáam̀ Unimbɔti dineendi nì fookii un Tiimootee cááyee pu. Bin sòoǹ Tibɔmɔntiilee làá jī falaa binib ń jáǹ-bi. An pu ní u bíi kpáafí Tiimootee ú nīn ŋúb́ an píkí icɔŋki poon kí já nì tininjati «kii Yeesu Kriisitoo janjamɔntiuee» (1.3–2.13). U sòon̄ nì u ki gíti būsì yii ú nīn nyí nì u-ba nì kunikpɔŋkpɔkɔu nì kujaau nì anyɔɔbuŋkpiti ŋin kaa cāabìń tiŋan tiba ki bíiĺ binib fookiiuee. U tīī-u kunyannyaau ú nóó u-tabɔbiliŋ kí nīn dàkà u-bɔti ki nóó nì Circir Ŋmaŋmabiti. U fōō tibɔti gbanti doooo u-naacimpɔntin ní (2.14–4.5). Pɔɔl ń ŋmà kí kúntí u-gbɔŋkuee, u sòon̄ tin poon u nìn bée. An nìn pɔ̄ɔ̄ ki tīī-u, ama u nìn nyí tiŋan tin ti-Dindaan ŋá ki tīī-uee, di sá yii ti-Dindaan nìn tíkiǹ-u (4.6-22).

Pɔɔl sòon̄ Yeesu Bɔmɔntiitee ki jáń kujamɔntiiu ki tin cáa kátì-ku (4.7). Ŋyunti kamaa binib bin làá kàaǹ kugbɔŋu neeyee máaǹ kí já kujabaantiiu gbanti. Bí taa fàŋkì agìń, kí nīn cáá fookii nì kimɔtii nì dineendi nì dipɔ́ɔǹdi.