Kriisitoo yɔu bimbim
3
1 Á téetí-bi yii bi máaǹ kí sìntīǹ bi-ba kí tīī bikpilib bin sá gɔmina nì biyidambeea. Bí nīn tɔ́-bi, ki yáb̀ atummɔnti kɔkɔ pu. 2 Bí taa nín̄ sòoǹ ki bíiĺ binib, kí nīn sá ŋgbansɔŋfi nib, kí nīn ŋáań tiŋan, kí nīn mɔ̄ báà ŋma cee. 3 Kun puee, dooooyee ti mun nìn sá bin kaa nyí tibee, ní kaa nìn tɔ́ Unimbɔti, ki yìntī, ní ti-nimbitaataam nì min ti fáatèe nìn cúú-ti kuyuŋu. Ti nìn cáá ntoom nì inimbidiki, ki ná ti-jutiibi ní bi mun ná-ti. 4 Ama Unimbɔti ti-Fiiliu dàkā-ti tiŋan nì dineendi din u cáá timbi binib puee, 5 ki fīī-ti. An kaa sá yii ti túń atunnyaan aba, an sá isaa ní u súń ti-pu. Bi nín fùul̀-ti Unimbɔti nyim puee di dàkà min Circir Fam fātìi màl̄-ti mpɔm ki tīī-ti dimaŋfapɔndi diŋyeeb. 6 Yeesu Kriisitoo ti-Fiiliu puee, Unimbɔti tīiń-ti u-Fam tikpil tikpil, 7 tí ŋmā kí kpántí deedeedambi Unimbɔti nimbiin u-ŋanti pu, kí fōō dimaŋfal din pu ti máká, dàa cáá dikúntilee. 8 Tibɔti tin m sòoǹ nee sá ibaamɔn ní.M là á nīn cɔ́ tibɔtee pu tikpil, án nín làá ŋá pu bin fōō Unimbɔti ki kííyee ń dū bi-ba kí tīī atummɔnti tɔ̄tamee. Tin ŋān̄ ki kèetī binibee dee. 9 Ama bí taa nín̄ kpákà tibɔfan pu ki kàaǹ bi-naanjab yiŋŋic an kaa kúntí, kí taa nín̄ kpákà ki jáà Juuda yab marab pu. Tíǹ sá tibɔfan ní kaa kèetī. 10 Á kpāafì un cāabìń ni-kansikin diyakatilee mili pud, boonee, u yaa kaa gbìl̄ee, á nyāntí-u. 11 Di sá yii a nyí yii an niliuee fá nsammɔnti ki ŋá unikpiti, ní u-kpitiiyee dàkà yii u gáatì.
Tibɔkpaafikaal tijoolkaal
12 M yaa láa dū Ariteemasi àá Tiisiikie ki túnní a-cee u bāań-see, á pɔ́ɔǹ a-ba kí kíntiń-mi Niikoopoolii, kun puee niin ní m là kí dāá nīn bí kuseeun. 13 Á pɔ́ɔǹ a-ba kí tūtuǹ Seenaa un sá umaranyilee nì Apooloosif, án nín làá ŋá pu tiba ń taa lóó-bi bi-saŋkindi poonee. 14 An máaǹ ti-yab mun ń dū bi-ba kí tīī atummɔnti tɔ̄tam, án nín làá ŋá pu tiba yaa bāań ki páb́ee, bí ŋmā kí tūtuǹee. Bí taa nín̄ kā, kaa kèetī diba.
15 Man nì bin kɔkɔ bí dooyee jáaḿ-si. Á jāam̀ bin fōō Yeesu ki kíí ki néeń-tee.
Kriisitoo ŋanti ń nīn bí ni-kɔkɔ pu.