Yakubu 1

Kugbɔŋu kun

Yakubu

ŋmàn̄ee

Ijaam

1 Man Yakubu^a un sá Unimbɔti nì ti-Dindaan Yeesu Kriisitoo tɔntɔnliuee di ŋmàn̄ kugbɔŋu nee. M jáaḿ nimbi tinaakɔti saalaa nì tili tin yàl̄ ki kɔ́ duulinya jaŋŋi kɔkɔnee.

Fookii nì iciin bɔti

2 M-nabiyaamu, dinimbinaamandi nín bí puee nì di-nyɔkɔm yaa bāań ni-puee, ní yàntī án nīn mɔ̄ǹ-ni tikpil. 3 Di sá ni nyí yii dinimbinaamandi gbanti yaa bāań ki cɔ́ŋkì ni-fookiiu ní ni yaa gbíntì ki yú kaa lítèe, kimɔtii ní an cāabìń-ni. 4 Ama ní nīn cáá kimɔtii míǹ kí tin kátí-ku, án nín làá ŋá pu ní kpántí biniŋmambi bimɔntiibi ni-bimbim poon, tiba nì tiba ń taa lóó-nee. 5 Míǹ puee, ni-kansikin ubɔ yaa lóò iciinee, udaan ń mèè Unimbɔti^b un mɔ̄ ki pūǹ báà ŋma nì dipɔbil diba, kaa wòoǹee, u làá tīī-u. 6 Tin bée di sá yii udaan ń nīn máká yii u làá fōō kun u bíi mèéyee kí taa gùgufì, kun puee un mèé ki gùgufēe náań nì kii dimɔɔl nyim min kubuŋu téekí ki cáǹ ajan kɔkɔ púee ní. 7 An niliuee ń taa dàkafì yii u làá ŋmā kí fōō tiba ti-Dindaan cee, 8 kun puee u cáá ilandɔkɔ ili ili, kaa dìŋfī nsambaanti.

Tigaajati nì disool

9 Án nīn mɔ̄ǹ kinabiki kin di sá usoodaanee, kun puee Unimbɔti yōoǹ-u yilpu. 10 Míǹ ní án nīn mɔ̄ǹ kinabiki kin di sá ugaajee, kun puee Unimbɔti sīntiǹ-u taapu: di sá yii u làá dāá gbátí kí lítí kii mpumpukumee ní. 11 Ŋwìiń yaa nyáń ki píĺ sínsiŋee, ní mpumpukum ń kpā ní kí gbátí kí lítí, ní mi-nyaaŋku ń wāŋkì^c. Míǹ mbaantiim ní ugaaja dāa bí u-tuuŋŋi poon ní kí kpáàa wāŋkì.

Dinimbinaamandi nì icɔŋki

12 Án nīn mɔ̄ǹ sii un di yaa bí dinimbinaamandin ní ki pɔ̄ɔntí ki ŋmèéyee. Di sá yii a yaa ŋmēē míǹ ki tin kátì-kuee, Unimbɔti làá pà-si tipaal tin sá dimaŋfal din kaa kúntí u pōoǹ ki yóoǹ bin néeń-uee. 13 Sii un yaa bí dinimbinaamandinee ń taa lì yii: «Unimbɔti di bíi cɔ́ŋkí-mi.» Kun puee tiba kaa ŋūǹ kí yàntī Unimbɔti ń ŋá tikpitil, ní úǹ u-ba mun kaa yàntī ubɔ ń ŋá tikpitil. 14 Ama an sá unil nimbitaataam di kíiĺ-u ki téekí-u ki cáǹ ikpitin. 15 Nnimbitaataam yaa kɔ́ unilee, ní mí màal̀ ikpiti, ní ikpiti yaa wíiǹee ní í cáań ŋkúm.

16 M-nabineeŋkaamu, ní taa ŋmàtim̀maan ni-ba. 17 Tiwannyaandi nì tiwammɔntiil tin kɔkɔ ti fòol̄ faalaayee nyēeń yilpu ní. Ti-Baa Unimbɔti iwalfi in bí yilpuee náanliu cee ní an nyēeń. Úǹ kaa kpántáaa, kaa fàtī ki ŋmíntí dijandi diba, din kíǹee dɔ̄ dibɔmbɔndin. 18 Úǹ di là ní ki dī dinyɔɔbundi din sá ibaamɔnee pu ki tīī-ti dimaŋfal, án nín làá ŋá pu timbi ń nīn līī tiwan tin kɔkɔ u náańee nyɔkɔpuee.

A nín gbìl̄ tiŋyee, á ŋá míǹ

19 M-nabineeŋkaamu, ní nīn nyímaan tin bí nee: báà ŋma ń kpòon̄ u-tafal malaa kí pīlifì u-juti, kí taa nín̄ jìkì disoondi pu, kí taa nín̄ fòol̄ diŋuul malaa malaa^d. 20 Di sá yii sii un yaa fōō diŋuulee, tin a ŋáańee kaa kítì Unimbɔti cee. 21 Míǹ puee, ní fámaan tin kɔkɔ bíiĺ unilee nì atuŋkpiti kɔkɔ, kí sìntīǹ ni-ba kí fōō dinyɔɔbundi din Unimbɔti dū ki búĺ ni-pɔbiliŋinee, kun puee díǹ di ŋūǹ kí fīī-ni.

22 Nín̄ ŋáaḿmaan dinyɔɔbundee nín bí yii ní ŋá puee. Sii un yaa pílifí Unimbɔti bɔti, kaa ŋáań tì nín lī puee, kíiĺ a-ba ní. 23 Sii un pílifí dinyɔɔbundee fám, ní kaa ŋáań min dì lì yii á ŋée, náań nì un kpèé digitil ki wāĺ u-nimbiinee ní. 24 U nín kpēē ki dóò ki búntèe, ní ú kpáàa súntí u nín bàà kpēē digitil poon ki bí miŋyee kɔkɔ. 25 Ama sii un di yaa kpèé bimaramɔntiibi bin tìì dibatɔlee tiŋan ní ki yaa cáá a-ba ki tìì-bi, kaa pílifí fám boonee kí súntí, ama ki ŋáań min marabee bí yii á ŋée, Unimbɔti làá bìin̄ a-boon a-tuuŋŋi poon.

26 Sii un yaa nyí yii a sá unimbɔtinool, ní kaa ŋúb́ a-nyɔkɔee, kíiĺ a-ba ní, a-nimbɔtinoolee sá fám ní. 27 Dinimbɔtinool din ŋān̄ ki bí circir ti-Baa Unimbɔti ceeyee di sá: á kpèè ataŋkpiibil nì bikpiipoobi bin bí falaa poonee^e, kí nīn nyí nì a-ba kí taa jēetí duulinya kpitii poon.