Peetroo gbɔmpeepeekaaku sá ki tīī Kriisitoo yab bin yàl̄ ki bí Asiiwaai timmu mun bí ŋgan pú nì ŋwìiń nyalaŋki púee ní. Pɔɔl àá u-tɔntɔnjutiibi di náań Kriisitoo nikitiŋ ŋin bí niin gbanti. Peetroo máaǹ ki bí Room tiŋki (kin bi yíiń doo «Babiloonee» 5.13) ni ní ki ŋmàn̄ kugbɔŋu nee. Tibɔti tin pu u sòoǹee dàkà yii Kriisitoo yab bin u bíi ŋmèe nìn bí agìń poon. Bin kansikin bi nìn kóò kaa sá Kriisitoo yabee nìn kpèé ki sìŋkīǹ-bi, ki tūntí-bi abɔgabil kɔkɔ nì ŋi-bulifi ní ki nìn sàantí-bi. An pu ní Peetroo fātìi bíi tìì-bi kunyannyaau bí dū bi-nimbikpeeŋu kí báań Yeesu Kriisitoo pu, di sá yii u-pu ní bi bíi jīǹ falaabi gbanti.

Peetroo péé péé ki nyɔ́ŋkì Unimbɔti, ní ki jáam̀ Kriisitoo nikitiŋ. Míǹ boonee ní u téetì-bi Unimbɔti nín fīī-bi ki tīī-bi dimákal din pɔ̄ɔ̄yee puee. Yeesu Kriisitoo nín kpíì ki fīkitèe di yāntì bi ká tíǹ kɔkɔ (1.3-12). U tīī-bi kunyannyaau bí nīn nyíǹ bi-ba, kí nīn bí circir maŋfal poon ní kí nīn cáá dikpafimmɔntiil nì Kriisitoo (1.13–2.10). Bí dī Kriisitoo tabɔbiliŋ kí nīn tɔ́ u-bɔti bi-bimbim poon nì bi nín pɔ̄ɔntí pu icɔŋki poonee. U tí tīī-bi isaŋki bi nín máaǹ kí nīn cáá mbimbim min biyidambi bin kpòotī bi-tiŋkee cee puee. U tí tīī-bi isaŋki bitɔntɔnliibi nì bi-kpilib kansikin nín máaǹ kí nīn bí puee nì unimpu nì u-cal nín máaǹ kí nīn tɔ́ tɔb puee, nì bi nín máaǹ kí nīn bí pu dinikitil din kansikin bi kóòyee puee nì mbimbim min bi máaǹ kí nīn cáá bin kaa nyí Unimbɔtee kansikinee (2.11–4.19). Ayil 5 poonee, Peetroo gíti kpáafì Kriisitoo nikitiŋ kpilib nì binipɔmbi nì fookiidambi kɔkɔ. U kpáafì-bi yii bí nīn yú an píkí falaabi poon kí nīn máká Unimbɔti pooŋyi pu. Ijaam ní u dūu kúntì kugbɔŋu nee.

Bi yaa tīī bin làá kàaǹ kugbɔŋu nee kunyannyaau bí pɔ́ɔǹ fookii poon min kamaa agìń bée, an sá seera un bi máaǹ kí lēēyee pu. An máaǹ yii bi-maŋfal kɔkɔ nì bi-bimbim kɔkɔ ń nīn dàkà Unimbɔti tunnyaaŋŋi (2.9), án nín làá ŋá pu bin kaa sá Kriisitoo yabee ń ká bi-tunnyaaŋŋi ní kí nyɔ̄ŋkì Unimbɔti ŋwiin ŋun u làá dāan̄ee (2.12).