Yakubu 5

Bigaajab ń cúú bi-ba

1 Nimbi bigaajabee, ní pīlifìmaan tibɔti nee: Ní sɔ̄ kí yāliŋkìmaan nnaabu ŋun làá bàń ni-puee. 2 Ni-gaajawanti sūū, ní akɔtuu mɔ́ ni-wampeeŋkaati. 3 Ni-sindaariyab nì ni-nimbiliŋ dámintì^a, ní an nín dámintì puee di làá dāá lēē mmɔ́ɔn yii ni nín ŋá miŋyee kaa ŋān̄, ní kí dāá wà ni-wunti kii ŋŋmee. Di sá yii ni báá tigaajati ŋyuntijoolkaa nee poon ní. 4 Bipaadambi bin kùn̄ ni-sati naa pàn̄-bee^b, pīlifìmaan, bíǹ di tíminsée. Bin cáń ni-jikaatee biilii bàn̄ Unimbɔti Mpɔŋkɔdaan cee. 5 Ni kāl̀ duulinya poon ki jíń mmɔn ki ŋá min fáatì-nee, ní ki jíń ki ŋá ŋkpam ki cíitì ŋwiin ŋun bi làá cáá-ni kí kpɔ̀ee. 6 Ni túǹ bin kaa ŋá tibee pu abɔgaan ki kūū-bi, baa kpákáǹ-ni.

Kimɔtii nì ŋwimmeem

7 Míǹ puee, nnabiyaamu, nín̄ cáámaan kimɔtii kí nīn cí ti-Dindaan gítintam. Kpèèmaan ukpaal nín jīǹ kimɔtii pu ki cīití u-wambɔlkaati ń bī puee. U jīǹ kimɔtii ní ki cīití utaapeekaa ń nì, ní utaajoolkaa mun ń dāá nì, ní ú nín cā u-jimmɔntiiti^c. 8 Ni mun ń nīn cáámaan an mɔtiiki juti, kí nīn pɔ̄ɔntí kun puee ti-Dindaan tóob́ kí bàń.

9 Nnabiyaamu, taa nín̄ gbùkum̄maan tɔb pu, án nín làá ŋá pu Unimbɔti ń taa yíiń-ni ibɔsoonee. Úǹ ubɔsoonlee kaa dátiǹ-ti, u yú kipunyɔkɔpu ki làá kíĺ ibɔsoon. 10 Nnabiyaamu, téetímaan Unimbɔti bɔnaatiliibi bin nìn sòon̄ u-puee falaabi nì bi-mɔtiiki pu, kí nīn bímaan míǹ. 11 Ti pàkà-bi kun puee bi yúl̀ deedee. Ni gbìl̄ bi sòon̄ Yoob mɔtiiki pu, ki nyí u nín jíń kimɔtii ki kátì, ti-Dindaan ŋá-u miŋyee, kun puee ti-Dindaan sá usaasɔl ní ki ŋān̄^d.

12 M-nabiyaamu, tin kaa pée máaǹ ní ŋée di sá ní taa pùtī. Ní taa pùtī yilpu kí taa pùtī taapu, kí taa pùtī báà tiba nì tiba poon. An yaa sá Iiiŋyee, kíímaan «Iiin,» an yaa tí sá Aayeeyaaa, kíímaan «Aayee,» án nín làá ŋá pu ní taa kɔ́ Unimbɔti bɔtinee^e.

13 Ni-kansikin ubɔ yaa bí falaa poonee, ú nīn mèé Unimbɔti. Ubɔ yaa tí bí ni-kansikin dipɔɔpindi poonaaa, ú nīn gà ilan ki nyɔ́ŋkí Unimbɔti. 14 Ubɔ yaa tí bí ni-kansikin ki būǹee, ú tɔ̄ bí yíiń Kriisitoo nikitil kpilib ń dāan̄ kí dū ŋkpam kí jōō u-yil pu kí yíiń ti-Dindaan yindi kí mèè kí tīī-u^f. 15 Bi yaa máká Unimbɔti pu ki mēē-u, see ubunlee ń ŋmátí. Ti-Dindaan làá tīī-u ŋgbampɔn. Báà u yaa ŋá ikpiti iba, Unimbɔti làá dūú pɔ̄-u. 16 An puee, nín̄ bìitī ni-kpitii pu ki tùkùmaan tɔb, kí nīn mèé ki tììmaan tɔb, kí ŋmā kí nīn kāntí dicáaǹdi. Di sá yii unil un yú deedee Unimbɔti nimbiinee yaa dū u-pɔbil kɔkɔ ki mēē-uee, an tūǹ atuŋkpaan ní. 17 Eelii mun nìn pée tí sá unifutifoo kii ti nín bí pu nan ní, ní ki nìn mēē Unimbɔti nì u-pɔbil kɔkɔ, yii utaa ń taa ti nì, ní utaa kaa lafun gíti jōō kitiŋ pu áli abin ata nì dijandi. 18 Boonee ní u fātìi tí mēē, ní utaa nìn̄, ní kitiŋ lòon̄ tijikaal^g.

19 M-nabiyaamu, ni-kansikin ubɔ ŋūǹ kí dū Unimbɔti saŋŋu ki fá ní ubɔ mun ŋūǹ kí fàtīí gíiǹní-u. 20 Too, ni máaǹ kí béé yii un di yaa nyántìń unil nsaŋkpitin ki gíiǹní-u nsammɔnti poonee, udaan fīī u-nabiki gbanti naŋki ki nyántì ŋkúm ŋaan dee. Udaan nín ŋá mimmee puee, Unimbɔti làá dūú pɔ̄-u^h.