Ncana ontoꞌk munuh Yesus
22
1 Waktu ari raya Roti Angin Baragi nang dimadah ari Paska, udah samaꞌk, 2 kapala-kapala imam wan guru-guru agama urak Yahudi ngago cara supaya bisa munuh Yesus duan cara smunyi-smunyi, krana umpu-ia gali ka urak banyaꞌk.Yudas nyual Yesus
3 Lalu Raja Balis nguasa ati siko taꞌk ntara dua balas murit Yesus, ia na Yudas nang dindama uga Iskariot. 4 Udah na Yudas ngaga kapala-kapala imam wan kapala-kapala panunggu Rumah Allah ontoꞌk barunding ngago cara bage mane Yudas bisa maba Yesus supaya umpu-ia bisa nangkap Ia. 5 Umpu-ia mbada sanang lalu bapakat ontoꞌk mere duit ka Yudas. 6 Yudas stuju duan umpu-ia. Mmole taꞌk sana Yudas ngago waktu nang pas supaya angin ditao ulih urak banyaꞌk waktu ia nyarah Yesus ka umpu-ia.
Ngkayubuat ontoꞌk Paska
7 Waktu ari raya Roti Angin Baragi dimmole, urak-urak arus mbeleh domba ontoꞌk Paska. 8 Lalu Yesus nyuruh Petrus wan Yohanes, “Ampus ngkanaꞌk nyiap pamapaꞌk ontoꞌk Paska supaya diri bisa makat sama-sama.”
9 Umpu-ia nyaut, “Ka mane uraꞌkitu daꞌk nyiap ia?”
10 Yesus madah, “Waktu ngkanaꞌk tama ka kota, ngkanaꞌk daꞌk batamu duan siko nglaki nang nyaat payat bisi ae. Tuna ia sampai ia tama ka dalap rumah. 11 Lalu padah ka umpu rumah na bage pitu, ‘O sano, uraꞌkitu maba pasat taꞌk Guru: Ka mane tampat Aku wan murit-murit Aku daꞌk makat sama-sama ka ari Paska ntu?’ 12 Nana urak na daꞌk maba ngkanaꞌk nele tampat nang aya ka para pucuꞌk. Ka sana barangape udah ada biabis, ka sanalah tampat ngkanaꞌk nyiap ia.”
13 Lalu umpu-ia ampus. Ape nang umpu-ia namu ka kota na pas biabis bage nang Yesus madah. Udah na umpu-ia nyiap pamapaꞌk ontoꞌk Paska.
Yesus mpara murit-murit Ia ontoꞌk ngingan tubuh wan darah Ia
14 Waktu daꞌk makat malam, Yesus duduꞌk makat srakat duan rasol-rasol Ia. 15 Ia madah ka umpu-ia, “Aku mbada kapengen mapaꞌk pamapaꞌk Paska srakat duan ngkanaꞌk, waktu Aku giangin kana siksa. 16 Maka nsana Aku madah: Aku angin daꞌk mapaꞌk pamapaꞌk ntu agi sampai rati Paska ntu tajadi ka dalap Krajaan Allah nana.”
17 Udah na Ia nangkap cawan, basokor lalu bakata, “Tangkap ntu, dibagi-bagi ka ngkanaꞌk nang ada ka kitu. 18 Jaji Aku madah ka ngkanaꞌk banar-banar: Mmole waktu ntu Aku angin gi daꞌk nyocoꞌk ae anggor sampai Krajaan Allah daꞌk datak.”
19 Yesus nangkap roti, ngucap sokor, Ia mala-mala lalu mere ka umpu-ia, sambel bakata, “Ntu tubuh Aku nang dinyarah ka ngkanaꞌk; buatlah ntu ontoꞌk ngingan Aku.” 20 Udah umpu-ia mapaꞌk, Yesus muat bage sana uga duan ae anggor nang ka dalap cawan na, lalu Ia bakata, “Cawan ntu, njaji tande pajanyi Allah nang baru duan taleno. Pajanyi na uga dingoat duan darah Aku nang dinyurah ontoꞌk ngkanaꞌk. 21 Tape ngkanaꞌk usah takajut, kaloꞌk urak nang nyual Aku ada sama-sama duan Aku ka meja ntu. 22 Aku Anaꞌk Taleno, pasti daꞌk mati bage nang udah dinantu. Tape clakalah urak nang udah nyual Ia!”
23 Lalu umpu-ia kajah batanya, sape ka ntara umpu-ia nang daꞌk babuat bage sana.
Ngomong-ngomong waktu makat malam
24 Waktu na murit-murit Yesus bakeleh, ngkeleh tantang sape nang dinganggap paling panting ka ntara umpu-ia. 25 Yesus bakata ka umpu-ia, “Raja-raja bangsa-bangsa nang ada ka dunia ngia mrintah rakyat ia samao ia. Tape umpu-ia mao urak-urak nganggap umpu-ia tukang nglinuk rakyat. 26 Ngkanaꞌk usah bage sana! Tape kaloꞌk ngkanaꞌk mao njaji nang paling panting, ngkanaꞌk arus nganggap diri ngkanaꞌk angin panting. Bage sana uga kaloꞌk ngkanaꞌk mao njaji pamempen, ngkanaꞌk arus mlayan urak lain.
27 Jaji sape nang paling panting? Apekah urak nang duduꞌk makat, atau urak nang mlayan? Pasti urak nang duduꞌk makat na. Tape Aku ada ka tangah-tangah ngkanaꞌk ontoꞌk njaji urak nang mlayan.
28 Waktu Aku susah, Aku kana coba, ngkanaꞌk malar ada sama-sama duan Aku. 29 Maka nsana Aku daꞌk mere kuasa ka ngkanaꞌk ontoꞌk mrintah, kuasa nang sama bage nang dimere ka Aku ulih Ama nang ka sruga, 30 duan bage sana, ngkanaꞌk daꞌk makat srakat ka sabuah meja duan Aku ka dalap Krajaan Aku. Ngkanaꞌk uga daꞌk duduꞌk ka atas dua balas tahta ontoꞌk mrintah dua balas suku Israel.”
31 Lalu Yesus bakata ka Simon Petrus, “Simon, Simon, dangar baiꞌk-baiꞌk, Raja Balis dah dingijin ontoꞌk nguji ngkanaꞌk. Ia daꞌk nampi ngkanaꞌk bage urak nampi padi nyiah ampa ia. 32 Tape Aku udah badoa ontoꞌk kau supaya kapacaya kau angin lamah. Sigaꞌk kau udah batobat, kau uga arus ngoat kapacaya page-page kau.”
33 Petrus nyaut, “Tuhan, aku siap kana panjara uga siap mati sama-sama duan Maꞌksana!”
34 Tape Yesus bakata, “Petrus, ari ntu uga giangin mandoꞌk ngkokoꞌk kau daꞌk nyangkal Aku tege kali.”
35 Lalu Yesus bakata agi ka umpu-ia, “Waktu Aku ngutus ngkanaꞌk duan angin maba tampat duit, angin maba kato wan angin maba kasut, adakah nang kurang ka ngkanaꞌk?”
Umpu-ia nyaut, “Angin bah.”
36 Yesus bakata agi, “Tape kinintu, sape nang bisi tampat duit, arus maba ia, bage sana uga nang bisi kato. Sape nang angin bisi iso punti ia arus nyual baju ontoꞌk mali iso punti. 37 Ingan baiꞌk-baiꞌk nang Aku madah ka ngkanaꞌk, krana arus tajadi ka Aku ayat Kitab Suci ntu, ‘Ia daꞌk dinganggap bage panjahat.’ Krana ape nang dinulis tantang Aku tangah tajadi waktu ntu.”
38 Umpu-ia bakata, “Tuhan, ntu ada dua iso punti.”
Yesus nyaut, “Udahlah.”
Yesus badoa ka bukit Jaitun
39 Lalu Yesus kluar taꞌk kota na. Bage nang biase, Ia nuju bukit Jaitun. Murit-murit Ia uga ampus nuna Ia. 40 Waktu cacah ka tampat na, Ia bakata ka umpu-ia, “Badoalah supaya ngkanaꞌk usah sampai tagoda ka pabuat nang jaat.”
41 Lalu Yesus ampus agaꞌk jauh taꞌk murit-murit Ia, kira-kira sapanabaꞌk batu jarak ia.a Ia sorong sambah lalu badoa, 42 “O, Ama, kaloꞌk Maꞌksana mao, tangkaplah cawan sangsara ntu taꞌk Aku; usah krana kamao Aku, tape biar kamao Ama nang tajadi.” 43 Lalu siko malekat taꞌk langin datak ngaga Yesus ontoꞌk mere kamampu ka Ia. 44 Ati Ia mbada glisah, maka nsana Ia mukin banar-banar badoa. Paluh Ia neteꞌk ka tanah bage darah.
45 Udah badoa Ia lumpat ngaga murit-murit Ia, tape Yesus namu umpu-ia tangah tidur krana umpu-ia mbada sabal. 46 Lalu Yesus bakata ka umpu-ia, “Ngape ngkanaꞌk kajah tidur? Lumpat ngkanaꞌk, badoalah, supaya ngkanaꞌk usah sampai tagoda ka pabuat nang jaat.”
Yesus kana tangkap
47 Waktu Yesus masih ngomong, datak sarombong urak nang dingulu ulih Yudas. Yudas na siko taꞌk ntara dua balas murit Yesus. Lalu Yudas nyamaꞌk Yesus daꞌk nyium Ia.
48 Tape Yesus bakata ka Yudas, “Duan cara ciumb ntu kah kau ngianat Aku Anaꞌk Taleno?”
49 Waktu murit-murit Yesus nang ada ka sana nele ape nang tajadi, umpu-ia bakata, “Tuhan, aruskah uraꞌkitu nyarang umpu-ia duan golok?” 50 Lalu siko taꞌk ntara umpu-ia na nyarang pambantu taꞌk kapala imam nang paling tingi lalu nyompok tlinga kanan ia.
51 Tape Yesus madah, “Dah, udah.” Yesus migaꞌk tlinga urak na lalu nyambuh ia.
52 Lalu Yesus madah ka kapala-kapala imam wan kapala-kapala panunggu Rumah Allah uga pamempen-pamempen urak Yahudi nang dataꞌk ontoꞌk nangkap Ia, “Prampokkah Aku ntu, sampai ngkanaꞌk dataꞌk maba punti wan tambong? 53 Maka tiap ari Aku ada ka dalap Rumah Allah duan ngkanaꞌk, angin ngkanaꞌk nangkap Aku. Tape ntu waktu ontoꞌk ngkanaꞌk, uga waktu ontoꞌk kuasa Raja Balis daꞌk batindak.”
Petrus nyangkal Yesus
54 Ka sana Yesus dinangkap lalu dimaba ka rumah kapala imam nang paling tingi. Petrus nuna umpu-ia taꞌk jauh. 55 Ka tangah plasar rumah na urak nompoꞌk api lalu duduꞌk ngelilik api na. Petrus duduꞌk uga sama-sama duan umpu-ia. 56 Siko pambantu nang bini, malar mrati Petrus nang duduꞌk ka samaꞌk api, lalu madah, “Urak ntu uga nang malar sama-sama duan Yesus.”
57 Tape Petrus inga ngako, ia madah, “Bukat leꞌk, aku angin kanal ka Ia!”
58 Angin lama udah na, ada urak lain nele Petrus lalu bakata, “Kau uga tamasok taꞌk rombong umpu-ia!”
Tape Petrus nyaut, “Bukat, bukat leꞌk aku!”
59 Kira-kira sajam udah na ada agi nang lain madah, “Memang banar, urak ntu uga nang malar sama-sama duan Yesus, krana ia uga urak Galelea.”
60 Tape Petrus nyaut, “Bukat, bukat leꞌk aku, aku angin nao ape nang kau madah na.” Gi tangah ia ngomong mandoꞌk langsong ngkokoꞌk. 61 Lalu Tuhan ngiloꞌk nele ia. Petrus langsong tringan ape nang udah Tuhan madah ka ia, “Giangin mandoꞌk ngkokoꞌk ari ntu, kau udah tege kali nyangkal Aku.” 62 Lalu Petrus kluar taꞌk sana, ia nangis krana ati ia mbada sabal.
Yesus dingadel ka tampat Pangadel Agama
63 Urak-urak nang nahan Yesus, kajah ngolo wan mopoꞌk Ia. 64 Umpu-ia nuduk mata Yesus duan kain, lalu batanya, “Coba padah sape kira-kira nang mopoꞌk Maꞌksana na?” 65 Banyaꞌk uga kata-kata umpu-ia nang njaat Yesus.
66 Waktu ari dah siak, bakumpur kobo pamempen urak Yahudi, kapala-kapala imam uga guru-guru agama Yahudi, lalu Yesus dimaba ka tampat Pangadel Agama umpu-ia. 67 Umpu-ia batanya, “Coba padah ka uraꞌkitu, Maꞌksana kah Raja Tukang nylamat na?”
Yesus nyaut, “Biar bah Aku madah, angin ngkanaꞌk daꞌk pacaya; 68 bage sana uga kaloꞌk Aku batanya ka ngkanaꞌk, ngkanaꞌk pasti angin daꞌk nyaut. 69 Mole kinintu, Aku Anaꞌk Taleno, daꞌk duduꞌk ndeꞌk sbala kanan Allah nang Mbada bakuasa, tampat nang dingromat.”
70 Lalu umpu-ia batanya agi, “Kaloꞌk bage sana, barati Maꞌksana na, Anaꞌk Allah?”
Yesus nyaut, “Ngkanaꞌk inyan nang madah kaloꞌk Aku ntu Anaꞌk Allah.”
71 Lalu umpu-ia bakata, “Diri angin pralu bukti agi, krana diri udah nangar ape nang Ia madah taꞌk molot Ia surak.”