Abraham (Indonesia: Abraham) Urak ntu asal ia taꞌk Ur-Kasdim nang ada ka Mesopotamia Selatan nang kinintu njaji nagari Irak. Abraham dinyuruh ulih Tuhan Allah ontoꞌk ampus ka Kanaan. Allah bajanyi daꞌk mere katoron nang banyaꞌk ka ia, lalu nguasa banua Kanaan. Abraham ama Isak, Isak ama Yakup. Jaji umpu-ia nang batege na dingako njaji ape puyak bangsa Israel (Kej. 12-25). Ka dalap Perjanjian Baru dingako uga Abraham na Ama smua urak nang pacaya ka Tuhan Allah (Roma 4-11).

Anaꞌk Allah (Indonesia: Anak Allah) Galar ontoꞌk Yesus, krana kaduduꞌk ia nang istimewa. Ia dingutus ulih Allah ontoꞌk nylamat umat Ia, uga ontoꞌk njaji Raja umpu-ia bage nang udah di njanyi ulih Allah ka Raja Daut. Yesus uga dimadah Anaꞌk Allah krana obong Ia nang mbada samaꞌk duan Allah.

Anaꞌk Taleno (Anak Manusia) Ka dalap Kitab Daniel 7:13 dinuju ka Raja nang Tukang nylamat nang daꞌk datak. Yesus malar makai galar Anaꞌk Taleno na ontoꞌk madah diri Ia surak.

Balak (Indonesia: Sunat) Nataꞌk ujuk kulit jukut (kulup) nang laki njaji tande umat Allah sasuai duan pajanyi Allah ka bangsa Israel. Na dimuat ka mmuda nang laki bangsa Israel, waktu baomor lapan ari (Kej. 17:9-14).

Batobat (Indonesia: Bertobat) Branti babuat dosa, lalu baleꞌk taat wan nnurut ka Allah. Yohanes nang Tukang mbaptis, mbaptis urak, na tande kaloꞌk urak-urak na udah branti taꞌk pabuat ia nang jaat lalu babaleꞌk taat ka Tuhan.

Dosa (Indonesia: Dosa) Pabuat urak nang jaat, ape ja nang nyimpang taꞌk printah Allah nang dinulis ka dalap plator agama urak Yahudi wan kitab-kitab nang lain. Urak-urak nang badosa angin bisa nylamat diri ia taꞌk kuasa dosa. Ka dalap Perjanjian Baru, Yesus dataꞌk ontoꞌk nylamat taleno taꞌk dosa wan ukum dosa na.

Guru agama Yahudi (Indonesia: Ahli Taurat) Rombong pamempen agama Yahudi, batugas, nyalin printah Allah taꞌk lima Kitab nang dinulis ulih Musa, uga ngajar ia ka urak Yahudi.

Idup Kakal (Indonesia: Hidup Kakal) Idup nang Allah mere ka urak nang pacaya ka Tuhan Yesus. Biar gaꞌk ia dah mati, tape ia tatap idup salama-lama ia duan Allah.

Imam (Indoneisa: Imam) Urak nang batugas ka Rumah Allah nang nunu binatang ka mesbah ontoꞌk jaji pamere ka Allah. Ia uga nang badoa ontoꞌk umat Israel kaloꞌk umpu-ia babuat dosa ka adap Allah. Smua imam taꞌk katoron Lewi.

Kaisar (Indonesia: Kaisar) Galar ontoꞌk raja nang paling tingi kaduduꞌk ia ka krajaan Roma, krana ka oroh ia ada raja nang mempen banua-banua nang labih amuꞌk.

Kapala imam nang Paling Tingi (Indonesia: Imam Besar) Harun wan katoron ia nang bisi kaduduꞌk nang mbada tingi. Sakali sataut ia tama ka Rumah Allah, nyarah pamere binatang nang dimbeleh ontoꞌk ndamai taleno biabis.

Keledai (Indonesia: Keledai) Binatang ntu sama bage kuda cuma badan ia amuꞌk taꞌk kuda. Waktu jaman Kitab Suci keledai bisa ditunggang uga ontoꞌk ngangkut barangape.

Kiamat (Indonesia: Akhir Jaman) Pangabis dunia waktu Yesus datak nang kadua kali ia ontoꞌk ngadel taleno biabis.

Kitab Suci (Indonesia: Kitab Suci) Kata Allah nang dinulis ka dalap kitab-kitab. Kitab-kitab nang dimadah Kitab Suci waktu jaman Yesus, kinintu dinganal bage Perjanjian Lama, ia na lima kitab nang dinulis ulih Musa (Plator agama Yahudi/kitab Musa), kitab nabi-nabi uga kitab Masmur wan kitab sajarah bangsa Israel. Smua na dinganggap suci wan mbada bakuasa krana na datak taꞌk Allah.

Krajaan Allah (Indonesia: Kerajaan Allah) Allah nang mrintah njaji Raja ka sruga wan ka dunia. Urak mati nang pacaya ka Yesus Raja nang Tukang nylamat, ia idup duan Allah ka dalap Krajaan Ia.

Malekat (Indonesia: Malaikat) Pasuruh Allah. Ia nggawe ape nang Allah mrintah, kadang-kadang Allah ngutus malekat ontoꞌk nyampai pasat Ia.

Mbaptis (Indonesia: Membaptiskan) Nama urak ka dalap ae, tande kaloꞌk urak na branti babuat dosa lalu baleꞌk ka Allah (Mrk. 1:4). Dimbaptis na uga tande kaloꞌk urak na pacaya ka Yesus wan njaji anggota umat Allah.

Nabi (Indonesia: Nabi) Urak nang dingutus ulih Allah ontoꞌk nyampai kata Allah ka urak Israel. Ka dalap Perjanjian Lama, Allah ngutus nabi-nabi bage: Musa, Elia, Amos, Yesaya uga nabi-nabi nang lain. Yohanes mbaptis Yesus uga dimadah nabi (Luk. 24:7).

Pajak (Indonesia: Pajak) Duit nang arus di bayar atau dibere ka nagara.

Paska (Indonesia: Paskah) dimadah uga ari raya Roti Angin Baragi, nalah ari raya urak Yahudi ontoꞌk ngingan bage mane Allah nolong umpu-ia kluar taꞌk Mesir.

Plator agama Yahudi (Indonesia: Hukum Taurat) Plator nang Musa nrima taꞌk Allah. Maka nsana dimadah uga Plator Musa. Plator na ada ka dalap lima kitab patama ka dalap Kitab Suci, ia na: Kejadian, Keluaran, Imamat, Bilangan, Ulangan.

Plator Musa (Indonesia: Hukum Taurat) tele Plator Agama Yahudi.

Raja Balis (Indonesia: Iblis) Pamempen roh-roh jaat nang mbada tingi. Ia na ular nang nggoda Hawa waktu ada ka tamawak Eden (Kej. 3:1-6). Udah na tuju ia mlawan Allah wan nyasat urak sampai badosa. Ia uga brusaha ngrusaꞌk obong taleno duan Allah.

Raja nang Tukang nylamat (Indonesia: Kristus atau Mesias) Raja nang dinjanyi ulih Allah nang daꞌk mbebas wan nylamat taleno. Dalap bahasa Ibrani dama ia “Mesias,” dalap bahasa Yunani dimadah “Kristus,” rati ia, “nang dingleleh duan minyaꞌk ka atas ulu ia.” Nurut ayat urak Israel na tande urak nang dimilih daꞌk njaji Raja. Raja nang Tukang nylamat na, ia na, Yesus (Mat. 16:16; Mrk. 14:61-62; Kis. 2:36).

Rasol (Indonesia: Rasul) Urak nang di ngutus ulih Allah. Rasol biase dimakai ontoꞌk madah dua balas murit Yesus nang dingutus ontoꞌk muat pagawe Ia (Mat. 10:1-2). Urak lain uga nang nyampai kabar baiꞌk nang taꞌk Allah dimadah uga “Rasol” (Roma 16:7). Paulus uga dimadah “Rasol” (Roma 11:13).

Roh Tuhan (Indonesia: Roh Kudus) Siko taꞌk ntara nang katege taꞌk Allah nang Tritunggal (Tege tape Siko), ia na: Ama, Anaꞌk wan Roh. Roh Tuhan uga dimadah Roh Suci [Roh Kudus]. Ia mempen, mantu wan mere kuasa ka urak-urak nang pacaya ka Allah.

Rumah Allah (Indonesia: Bait Allah)

Rumah Sambayang (Indonesia: Rumah Ibadah) Tampat urak Yahudi bakumpur ontoꞌk sambayang waktu ari Sabat. Uga dimakai ontoꞌk tampat rapat wan tampat skolah.

Sabat (Indonesia: Sabat) Ari nang katujuh, nang dinganal duan ari Sabtu. Ka dalap Kitab Kejadian, Tuhan Allah muat langin duan ae tanah wan smua isi ia salama anam ari, lalu Tuhan Allah branti ari nang katujuh. Ari nang katujuh na - ari Sabat - ari na njaji ari nang kusus, atau “Suci.” Ka dalap sapuluh printah, Tuhan Allah ngusar urak Israel bagawe ari Sabat. Waktu cacah ka jaman Yesus, banyaꞌk plator tantang ari Sabat, ape nang bisa wan ape nang angin bisa dimuat waktu ari Sabat na. Urak Parisi wan guru agama Yahudi mbada nnurut nuna plator na.

Sruga (Indonesia: Sruga) Tampat Allah wan malekat-malekat Ia, uga tampat pangabis nang dinuju ulih urak nang pacaya ka Yesus Raja nang Tukang nylamat.

Tukang nunggu domba (Indonesia: Gembala) Tukang miara uga nunggu domba atau kambing. Pagawe ia arus maba domba na ka utat nang banyaꞌk rumput supaya domba ia bisa majuh krana mpajuh domba na rumput.

Urak Lewi (Indonesia: Orang Lewi) Urak taꞌk suku Lewi nang mantu pamempen agama Yahudi ka dalap Rumah Allah. Lewi siko taꞌk ntara dua balas anaꞌk Yakup. Musa wan Harun taꞌk katoron Lewi.

Urak Parisi (Indonesia: Orang Parisi) Saklompok urak nang bapangaroh ka dalap masarakat Yahudi waktu jaman Yesus. Pamempen agama Yahudi na mole ada kira-kira 200 taut giangin Yesus dinganaꞌk. Umpu-ia mbada nnurut ka plator agama ia wan adat ape puyak umpu-ia.

Urak Samaria (Indonesia: Orang Samaria) Urak Samaria diap ka banua ntara Galelea duan Yudea. Urak Samaria na katoron taꞌk kawen campur ntara urak Israel wan urak asing nang diap ka skitar na. Urak Samaria wan urak Israel angin sama cara umpu-ia nyambah Allah. Maka nsana urak Samaria wan Yahudi malar bamunsuh, krana babeda suku, adat, agama, duan politik.

Utat taya krasiꞌk (Indonesia: Padang Gurun) Tampat nang banyaꞌk bisi krasiꞌk, banyaꞌk batu, uga babuki-bukit. Ae wan rumput ampir angin ka utat na, tampat nang sunyi, angin urak nang diap ka sana. Bangsa Israel ada ka utat taya krasiꞌk slama 40 taut, Daut uga ndari diri ka utat taya krasiꞌk waktu Raja Saul daꞌk munuh ia.