Enjel Lukas dinulis ontoꞌk madah tantang Yesus Raja nang Tukang nylamat, nang dinjanyi ulih Allah ka umat Israel. Nang nulis Enjel ntu dokter nang badama Lukas, nang ngawan Paulus nyampai Kabar baiꞌk taꞌk Allah (Kol. 4:14; 2 Tim. 4:11). Ia nulis Enjel ntu badasar duan ape nang ia nylidik taꞌk urak-urak nang nele langsong kajadi na, tantang Yesus Raja nang Tukang nylamat (Luk. 1:1-2).

Tuju Enjel Lukas ntu dinulis supaya urak-urak nao kaloꞌk Yesus, Raja nang Tukang nylamat datak ka dunia ontoꞌk: “Ngago urak-urak nang sasat lalu nylamat ia” (Luk. 19:10). Ia datak ka dunia ntu bukat cuma ontoꞌk urak Israel ja, tape ontoꞌk smua urak (Luk. 2:10; 2:30-32; 3:6; 24:47). Enjel ntu uga ngesah tantang Maria nganaꞌk Yesus, ngesah waktu Yesus gi amuꞌk, ngesah Yohanes Tukang mbaptis nang mbaptis Yesus ka ae Yordan, ngesah pabuat Yesus nang ajaib ka Galelea wan Yudea sampai Ia ampus ka kota Yerusalem, ngesah ape nang tajadi ka Yerusalem sampai Yesus kana tangkap, dimunuh ka kayu saleb lalu ari nang katege Yesus idup agi, ngesah uga kaloꞌk Yesus muat diri Ia tatele ka adap murit-murit Ia, sampai Yesus trangkat ka sruga.

Ka dalap Lukas 4:18-19 dinulis kaloꞌk Yesus Raja nang Tukang nylamat na dinatap ulih Roh Tuhan ontoꞌk nyampai Kabar baiꞌk ka urak-urak kodo, urak-urak nang kana panjara, urak-urak buta, uga urak-urak nang kana takan. Bukat cuma na ja nang dingesah ka dalap Enjel ntu, tape ada uga tantang doa, Roh Tuhan, mbini-mbini nang mlayan Yesus, guru-guru agama Yahudi, bage sana uga ada kesah tantang urak nang babuat dosa kana ampon. Ada uga kesah Yesus madah umpama-umpama: Urak Samaria nang baiꞌk ati, domba nang ilang, uga anaꞌk nang ilang.