Yesus nsurak tamata ovi awarira roak ma deka rsitalik
1 Yesus nair munuk na'a afa avyai,
na ntali propinsi Galilea nti propinsi Yudea ma nana'a oar Yordan ni lihir a.
2 Na'a inyai na,
tamata rivun rma ma rorang Ia,
ovu notu ma ovi rira suhut ra lolin ewal ira.
3 Tamata Farisi boku rma ma rlabir teman Yesus.
Ira rorat Ia ne,
“Na'a dida inukun ra,
na brana ra bisma rtalik tia ma watan awarira te wahal?”
4 Yesus nfalak ne,
“Mia wol byas Ubu Ni vaivatul ra?
Tali na'ut i Ubu notu lanit ivavan a,
na Ia notu roak brana ovu vata.*
5 Ubu Ni vaivatul a nfalak ne,
‘Wean inyai,
bi brana veka nsuta talik renan ovu yaman a,
ma irua awan a rleal isa.
Vata irua brana ralarira isa ma ikisa watan ira.’*
6 Ba irua ikisa watan roak.
Wean inyai,
bi Ubu notu roak ma irua rleal isa,
ba tamata ra wol bis rotu ma rsitalik.”
7 Tamata Farisi avyai rorat Yesus ne,
“Ba wean inyai,
na afakinimi Musa nfalak ma wean i brana isa mane ntalik awan a,
na nasusan ni surat sitalik ma nfasuka ia?”
8 Yesus nfalak verin ira ne,
“Musa ntorung ma mtyalik awabira ra,
tevek ralabira ra rangrebat da'in.
Tali lalan ana,
Ubu wol ntorung ma msyitalik.
9 Ufalak verin mia ne,
brana iki watan ntalik awan a ma nsifa ewal ovu vata liak,
na ia naflidan* roak.
Na'uk wean i awan a ntuba ovu brana liak,
beti bisma ntalik awan a.”
10 Nata Yesus Ni tamata ovi rorang Ia rfalak ne,
“Ba wean i brana mane nsifa ovu ntuan angangal wean inyai,
na ni lolin a deka nsifa lahir.”
11 Yesus nfalak verin ira ne,
“Tamata boku watan rtahang nala afa i fyalak yai.
Na'uk Ubu nala ngrebat verin tamata boku ma rtorung ma wol rsifa.
12 Tamata boku wol rsifa,
tevek tali amar i rarali ira,
na ira wearira watan inyai.
* Tamata boku wol rsifa,
tevek tamata ra rotu ma ira wearira inyai.
Boku vali tali watan ira ma rfili ma wol rsifa,
tevek ranovak ma rkarya verin Ubu na'a Ni Fareta a.
Iki nfan-aran Ning vaivatul ra,
na ni lolin a not-orang.”
Yesus naflahar kasiko'u ra
13 Tamata ra rovun yanarira ra rma verin Yesus,
ma nfadoku liman a na'a ira ovu naflurut verin ira,
na'uk Ni tamata ovi rorang Ia rangrova tamata avyai.
14 Yesus nfalak verin ira ne,
“Msyi'ik watan ma kasiko'u avyai rma ma rtuan Ya'a.
Deka myotu teri ira,
tevek tamata ovi wearira avyai,
ira veka warira vali ovu Ubu na'a Ni Fareta a.”
15 Nata Yesus nfadoku liman a na'a kasiko'u avyai ma naflahar ira,
beti nban-talik wan yai.
Wean inba ma dida vava'at kakiwal
16 Amar isa,
na brana isa nma ma norat Yesus ne,
“Tuan Guru,
ya'a musti otu afa lolin aka,
boma ning vava'at kakiwal?”
17 Yesus nfalak verin ia ne,
“Afakinimi morat Ya'a na'a afa i lolin a?
Ubu a'uk sa'i lolin Ia.
Wean i inam ma mu vava'at kakiwal,
na mot-orang Ubu Ni inukun ra.”
18 Ba brana yai norat ewal ne,
“Inukun inba?”
Yesus nfalak verin ia ne,
“Deka msifedan,
wean i msifa roak,
na deka mtuba ovu tamata i wol awam verin ia,
deka bwori,
ovu vali deka mdiri fareta waharira ralan ra ma msiklabir na'a afa ovi fwalak ra na'a tamata liak.
19 Malang renam ovu yamam a,
ovu vali mlobang tamata ra munuk,
wean watan i mlobang tenam a.”*
20 Varverun yai nfalak ne,
“Baba,
ya'a ot-orang munuk roak afa avyai,
ba afaka wahal obin?”
21 Yesus nfalak verin ia ne,
“Wean i inam ma mu vava'at a nmalola,
na muti ma fwedi munuk mu metan ra,
ma mtanang kubang avyai verin tamata kasian ra.
Motu wean inyai,
na veka mu metan na'a lanit ratan,
beti mwa ma morang Ya'a.”
22 Ti ma nrenar afa i Yesus nfalak yai,
na newal ia ovu ralan lalau,
tevek ni metan a rivun.
23 Nata Yesus nfalak verin Ni tamata ra ne,
“Afa i ufalak verin mia ini,
kena urun!
Susa buas ma tamata ovi rka'i ra rtorung ma Ubu nfareta ira wean lahir raja!
24 Ufalak fasa ewal ne,
susa dalang ma unta nuruk nala nti dirin ni bilahin a,
na'uk susa lia inyai vali verin tamata ka'i ra rtorung ma Ubu nfareta ira wean lahir raja!”
25 Ti ma Ni tamata ra rarenar afa ovi nfalak ra,
na rtalkaka lahir ma rfalak ne,
“Ba wean inyai,
na iki veka ni vava'at kakiwal?”
26 Yesus nsi'ik ira ma nfalak ne,
“Tamata ra wol rot-nala lahir afa yai,
na'uk Ubu bis not-nala munuk akataka.”
27 Ba Petrus nfalak ne,
“Ami amban-talik roak mami afakataka munuk ma amorang Oa,
ba ami veka enamami aka?”
28 Yesus nfalak verin ira ne,
“Afa i ufalak verin mia ini,
kena urun!
Ti naran amar i Ubu veka notu ma akataka ngorva'an munuk,
na Ya'a,
Tamata Yanan Ya'a ini veka udoku wang i nfitik nyadat a ma ufareta.
Na'ut inyai,
na mia tamata ovi myorang roak Ya'a,
lokat mia veka mdyoku vali na'a wan vutu rahin irua ma fyareta.
Na'a wan avyai vali,
na mia veka fyaleka inukun verin Israel ni arun dawan vutu rahin irua.*
29 Tamata iki watan nban-talik a'an a warin ra,
renan ovu yaman a,
yanan ra ovu uran ra,
ni rahan teta te ni va'i ra,
tevek norang Ya'a,
na tamata yai enan a veka ntafal ma faratratut,
ovu vali veka ni vava'at kakiwal.
30 Na'uk tamata rivun ovi fiang ini dawan ira ma rban-ulu verin tamata ra,
ira veka rban-muri watan.
Tamata ovi ko'u watan ira fiang ini ma rban-muri,
ira veka dawan ira ma rban-ulu verin tamata ra.”