Tamata ovi rna'a Yerusalem rsa'a Yesus ovu ralarira ra lolin urun
1 Yesus ovu Ni tamata ovi rorang Ia ti rfaseri Yerusalem,
ma raran roak ahu Betfage i nana'a vuar Zaitun.
Ba Yesus nsinir tamata irua tali Ni tamata ovi rorang Ia ma rti ula ira.
2 Ia nfalak verin ira ne,
“Miti ahu i na'a ulu eri.
Na'a ineri,
na mia veka mtyuan lahir keledai vata i rkeak siebang watan ia ovu yanan a.
Mryuvat ni kakeak a ma fyabana ira mya verin Ya'a.
3 Wean i tamata isa ntabu mia,
na fyalak verin ia ne,
‘Duila'a nperlu keledai yai,’
na npake munuk,
beti rtaha lahir rma.”
4 Rotu wean inyai,
boma nfakena lahir vaivatul ovi nabi isa ntulis roak a.
Ia ntulis ne,
5 “Fyalak verin tamata ovi rna'a Sion ne,
*
‘Msyi'ik kikyai,
bira raja nma.
Ia nfakabava tenan a,
ma rata ndoku watan keledai isa i wol ka'i dawan ia obin.’ ”
6 Ba Yesus Ni tamata irua yai rti ma rot-orang afa ovi nfalak ra.
7 Tamata irua yai rovun keledai vata yai ovu yanan a rti verin Yesus,
ma rala rira ravit blawat ra ma al raraang tetarira ratan ra,
beti Yesus rata ndoku keledai ko'u yai.
8 Tamata rivun ovi rna'a inyai rvelar rira ravit a blawat ra na'a linga'an ralan.
Boku retal aa sanan tutul ra ma relir na'a linga'an ralan.*
9 Tamata rivun rban-orang Yesus,
boku rbana ula ira ovu boku vali rban-muri,
ovu rafwak ne,
“Mya ma traning Raja Daud ubun a nusin a!
Ubu naflahar Ia i nma ovu Duila'a naran a.
Ubu nana'a wan i karatat lia munuk a,
ba traning Ia!”*
10 Na'ut i Yesus ti naran Yerusalem,
na tamata ovi rna'a kota ralan yai vairira dawan.
Ira rorat ne,
“Ini tamata iki?”
11 Ba tamata rivun ovi rban-orang Yesus yai rfalak ne,
“Ini Yesus i nabi Ia,
ntali ahu Nazaret na'a propinsi Galilea.”
Yesus nala'ing vatuk tamata ovi rfedi-rfaha afa na'a tamata Yahudi rira Rahan Dawan Falurut i na'a Yerusalem ni lean a
12 Nata Yesus nati Yahudi rira Rahan Dawan Falurut ni lean a,
ma nala'ing vatuk tamata ovi rfedi-rfaha afa na'a inyai.
Ia nir-nar tamata ovi rsikati kubang rira meja ra,
ovu vali dakdokwan ovi tamata ra rdoku ma ala rfedi modarlaka.*
13 Ia nfalak verin tamata avyai ne,
“Surat Ralan nfalak wean ini,
‘Ning rahan a neluk rahan falurut ma tamata raflurut na'a,
na'uk mia myotu ma neluk wan ma tamata barborin ra rna'a.’ ”*
14 Ba tamata ovi rkibu ra ovu tamata ovi ratlukut ra,
rma rtuan Yesus na'a Rahan Dawan Falurut a,
ma notu ma lolin ewal ira.
15 Na'uk Yahudi rira dawan mela falurut ra ovu dawan ovi rair Musa ni inukun ra rangrova.
Ira rangrova,
tevek rsi'ik mujizat ovi Yesus notu ra,
ovu vali kasiko'u ra rafwak na'a Rahan Dawan Falurut ni lean a ne,
“Mya ma traning Yesus,
Raja Daud ubun-nusin a!”
Ba ralarira sian urun.
16 Nata rfalak verin Yesus ne,
“Oa mrenar afa ovi kasiko'u ra rfalak te wahal?”
Yesus nfalak ne,
“O'u,
Ya'a urenar roak,
na'uk wean inba ovu mia?
Mia wol byas obin na'a Surat Ralan ne,
tali kasiko'u ra ovu kasiko'u yanat ovi rsusu obin,
na veka rfadawang Ia?”
17 Nata Yesus nban-talik ira na'a kota Yerusalem ma nti ahu Betania,
ma Ni ovan na'a inyai.
Yesus near nfasoba aa isa naran ara, ovu nair tamata ra na'a rira inorang verin Ubu
18 Ni ilyan varverak a,
na Yesus ovu Ni tamata ovi rorang Ia rewal ira rti kota Yerusalem,
na Yesus nfarnuang Ni balafar roak.
19 Yesus nsi'ik na'a linga'an nelan,
na nrea aa ara isa.
Ba nbana nti inyai,
na'uk wol nrea vuan isa vali,
tevek aa ara yai roan lalawatan.
Ba Yesus nfalak verin aa ara yai ne,
“Tali amar ini,
na wol vuam roak nata ti mungaran watan.”
Brian munuk,
na aa ara yai nangaran lahir.
20 Yesus Ni tamata ra rsi'ik afa yai,
na rtalkaka.
Ba rorat Ia ne,
“Afakinimi brian munuk,
na aa ara yai nangaran lahir i?”
Aa ara vuan ra (Matius 21:19)
21 Yesus nfalak ne,
“Afa i ufalak verin mia ini,
kena urun!
Wean i myorang Ya'a ovu ralabira wol raruan,
na mia bisma myot-nala vali afa i otu verin aa ara yai.
Wol wean inyai watan,
na'uk bisma fyalak verin vuar isa ne,
‘Mlaun talik wam a kikyai,
ma roal mtuba tahat ralan’,
na veka wean urun inyai.
22 Myorang urun Ubu ma miflurut verin Ia,
ma myera afaka watan tali Ia,
na veka nala verin mia.”
Dawan Yahudi ra rorat Yesus ne Ni ngrebat ntali inba
23 Nata Yesus nati nsiair na'a Rahan Dawan Falurut ralan a.
Na'ut i nsiair,
na Yahudi rira dawan mela falurut ra ovu rira dawan ra rma ma rtuan Ia na'a inyai,
ba rorat Ia ne,
“Oa mu ngrebat aka ma al motu afa ovi?
Iki nala ngrebat yai verin Oa?”
24 Yesus nfalak verin ira ne,
“Ya'a mane orat mia na'a afa isa,
ba byalat Ya'a veki,
beti ufalak vali verin mia ne iki nala ngrebat ini verin Ya'a ma otu afa ovi.
25 Yohanes nbaptis tamata ra ovu ngrebat tali iki?
Ngrebat tali lanit ratan,
te tali tamata?”
Ira rsifalak afa verin ira ne,
“Wean i tfalak ne,
‘Yohanes ni ngrebat ntali lanit ratan,’
na Ia veka nfalak verin ita ne,
‘Notu afakinimi wol myorang ia?’
26 Na'uk wean i tfalak ne,
‘Ngrebat tali tamata,’
na tbobar tamata rivun veka rotu sian ita,
tevek ranovak ne,
Yohanes yai nabi ia.”
27 Ba rfalak verin Yesus ne,
“Ami wol amka'a.”
Yesus nfalak vali verin ira ne,
“Ba wean inyai,
na Ya'a veka wol ufalak vali verin mia ne,
ala ngrebat tali iki ma otu afa avyai.”
Yesus nfamalik vaivatul kamkuma na'a brana isa ovu yanan a brana irua
28 “Mia minovak aka na'a vaivatul kamkuma ini?
Tamata isa yanan a brana irua.
Amar isa,
na ia nti ma nfalak verin yanan iya'an a ne,
‘Baba,
amar ini muti ma mkarya na'a va'i anggur.’
29 Yanan iya'an yai nfalak ne,
‘Bapa,
ya'a ufena uti.’
Na'uk nfikir ewal,
ba nti nkarya na'a va'i anggur yai.
30 Tamata yai nti ma nfalak vali verin yanan iwarin a ne,
‘Baba,
amar ini muti ma mkarya na'a va'i anggur.’
Yanan iwarin yai nfalak ne,
‘O'u ta bapa.’
Na'uk ia wol nti ma nkarya.
31 Ba tali yanan a brana irua yai,
na iki not-orang afa i yaman a nfalak a?”
Ira rfalak ne,
“Yanan iya'an.”
Ba Yesus nfalak verin dawan Yahudi avyai ne,
“Afa i ufalak verin mia ini,
kena urun!
Tamata ovi ba'i rera babahir kulu,
ovu vatlean ra,
veka ula ira ma ti rna'a Ubu Ni Fareta,
beti mia.
32 Tevek Yohanes nma ma nair mia ma nfaturu banbanan ovi kena ra verin mia,
na'uk wol myorang ia.
Na'uk tamata ovi ba'i rera babahir kulu ra,
ovu vatlean ra,
sa'i rorang ia.
Mia mryenar ovu msyi'ik ne,
ira rahil roak ma rtalik tali rira salasilan ra,
na'uk wol myahil ma mtyalik tali bira salasilan ra ma myorang vaivatul ovi Yohanes nfalak a.”
Yesus nfalak ne, Yahudi rira dawan ra wearira tamata va'i ovi rangal duarira ra
33 “Eka mryenar vaivatul kamkuma isa ewal.
Tamata isa notu va'i anggur na'a ni lanun a.
Ia notu ngean ma nlilit ni va'i a,
ovu nkear wan isa ma al raramat anggur vuan ra na'a.
* Ia nfadiri sari isa felan a wean farwan ma rata rdoku al rwanar ni va'i a.
Notu munuk wean inyai,
na nala verin tamata va'i ra,
ma rasusan ni va'i yai,
ma ki rsiduk anggur boku verin ia.
Nata nban-talik ni ahu ma nti wan raroa.*
Anggur vuan ra, ovu wan i tamata ra raramat anggur vuan ra (Matius 21:33)
34 Ba ti ma naran amar i rfufu anggur vuan ra,
na va'i duan nsinir ni tamata sansinir boku ti ma rala ni wahat tali tamata ovi rwanar ni va'i a.
35 Na'uk tamata sansinir avyai rati raran va'i anggur yai,
na tamata ovi rwanar va'i yai rtaha lahir ira.
Ira rvaval isa,
rfedan isa ovu vali rteva isa.
36 Ba va'i duan nsinir ni tamata sansinir liak boku vali ma rti ewal,
na'uk ira rivun rahi tamata sansinir ovi rti ula roak ira.
Na'uk tamata ovi rwanar va'i yai rotu sian vali ira,
wean sansinir ovi rti lan roak a.
37 Ti nata va'i duan a nanovak ne,
‘Tamata avyai veka ralang yanan brana a,
ba nsinir yanan a ma nati vali.’
38 Na'uk ti ma tamata ovi rwanar va'i yai rarea va'i duan yanan brana yai,
na rsifalak afa verin ira ne,
‘Tamata ini va'i duan yanan a brana a,
ba mya ma tfedan ia,
boma tala va'i ini verin ita.’
39 Ba rtaha yanan yai ma ti rvatuk ia na'a va'i yai murin a,
beti rfedan ia.”
40 Yesus norat dawan Yahudi ra ne,
“Ba wean i va'i duan a nma,
na veka notu afaka verin tamata ovi rwanar ni va'i a?”
41 Ira rfalak verin Yesus ne,
“Ia veka nma ma nfedan tamata ktufan avyai.
Ia nala ni va'i a verin tamata liak ma rwanar,
boma naran ni amar i rfufu anggur ra,
na rala vali ni wahat a verin ia.”
42 Yesus nfalak verin ira ne,
“Mia wol byas obin Ubu Ni vaivatul ovi na'a Surat Ralan?
Vaivatul avyai wean ini:
* Vatu i tukan ra rvatuk yai,
fyawan lia munuk ma al nfangrebat rahan a.
Afa i Duila'a notu lolin urun,
ovu notu ma tamata ra rtalkaka.*
43 Ba ufalak verin mia ne,
Ubu veka notu ma wol wabira roak na'a Ni Fareta a,
na'uk veka nala tamata ovi rot-orang afa ovi ralan a nfalak ra ma notu ma rna'a Ni Fareta a. [
44 Tamata iki watan wol norang Ubu,
na ia wean tamata i nleka nsuta vatu yai ratan a ma nablewar lahir.
Wean i vatu yai nleka ma nta'i tamata isa,
na tamata yai veka manminan lahir ia.”]
45 Ti ma Yahudi rira dawan mela falurut ra ovu tamata Farisi ra rarenar vaivatul kamkuma yai,
na ira rfan-aran lahir,
tevek vaivatul avyai Yesus nala al nta'ing ira.
46 Ba ira rdava linga'an mane rtaha Yesus,
na'uk rbobar,
tevek tamata rivun rorang ne,
Yesus yai nabi Ia.