1 Ivar Lolin i nfamalik Ubu Yanan a Yesus Kristus beti nvotuk.

2 Lalan ana,

nabi Yesaya ntulis Ivar Lolin yai ne,

4-6 Tamata i Ubu nsinir ia yai naran Yohanes.

Ia nleal wan lean vu dawan isa ma nbaptis tamata ra.

Ni ravit a blawat i noru a,

rotu tali afwatan i naran unta,

vulun ra.

Ni ngesa rotu vali tali afwatan ulin.

Ni fana'an a kabina ovu wenan vahan i na'a nangan.

Ia nfamalik Ubu Ni vaivatul ra verin tamata ra,

ma rahil ma rtalik tali rira salasilan ra,

boma Ubu na'i vatuk rira salasilan ra,

beti rala tenarira ra ma nbaptis ira.

Tamata rivun ila'a rtali propinsi Yudea ovu kota Yerusalem rti ma rarenar afa ovi Yohanes nfalak ra.

Ira rahil ma rfavotuk rira salasilan ra verin Ubu,

ba Yohanes nbaptis ira na'a oar Yordan.

7 Ia nfamalik lalawatan verin tamata ra ne,

“Wol mnanat,

na tamata isa veka nma,

ovu Ni ngrebat a nlia ya'a.

Ya'a wol verang a ratan Ia,

ba wol inovan ma usangatur ma aling ni tatea ni tatur a.

8 Ya'a ubaptis mia ovu wear,

na'uk Ia veka nbaptis mia ovu Ni Roh a.”^*

9 Na'ut i Yohanes nbaptis tamata ra,

na Yesus ntali ahu Nazaret i nana'a propinsi Galilea nma ma Yohanes nbaptis Ia na'a oar Yordan.

10 Na'ut i Yesus ndata tali wear,

na brian munuk nsi'ik,

na wean i lanit natvadil,

ma Ubu Ni Roh nsuta wean modarlaka ma ndoku tenan a.

11 Vai isa ntali lanit ratan nfalak ne,

“Oa ini Yanak i ulobang urun a.

Oa motu ma ralang a lolin urun.”

12 Ubu Ni Roh novun lahir Yesus ma nti wan lean vu dawan isa.

13 Ba Ia nana'a wan lean vu dawan yai,

na nitdawan nlabir teman Ia ma naran amar vutfa'at.

Yesus nana'a inyai ovu afwatan ra,

na Ubu Ni sansinir ra tali lanit ratan rfatuang Ia ma rlobang Ia.

14 Fareta ra ra'abu'i roak Yohanes.

Nata Yesus nti propinsi Galilea ma nfamalik Ubu Ni Ivar Lolin a.

15 Ba Ia nfalak ne,

“Amar nma ma naran roak ma Ubu nfareta wean lahir Raja.

Myahil ma mtyalik tali bira salasilan ra ma myorang a'uk Ubu Ni Ivar Lolin!”

16 Amar isa,

na Yesus nbana na'a danau Galilea nelan a,

na nrea tamata irua,

iya'an iwarin ira.

Isa naran Simon ovu isa vali naran Andreas.

Ira sinat roal ira,

ba rfasuka rira jaring na'a inyai ma al rdava ian.

17 Ba Yesus nfalak verin ira ne,

“Mya ma myorang Ya'a!

Mia wol fyasuka jaring roak ma nala ian,

tevek ala karya verin mia ma myair tamata ra ma rorang Ya'a.”

18 Ba rfadoku lahir rira jaring ra na'a inyai ma rorang Ia.

19 Nata nban-ewal ma nsi'ik Yakobus irua warin a naran Yohanes,

yamarira naran Zebedeus.

Ira rna'a rira kumal ralan ma rlavan rira jaring ra.

20 Yesus nera lahir ira ma rorang Ia,

ba rsuta talik yamarira ovu tamata ovi ra'an kadi tali ira na'a rira kumal yai,

ma rorang Ia.

21 Yesus ovu Ni tamata ovi rorang Ia rti raran ahu isa naran Kapernaum.

Na'ut amar i Yahudi ryari ira,

na Yesus nti lahir Yahudi rira rahan falurut ralan a,

ma nsiair na'a inyai.

22 Tamata ovi rarenar afa ovi nair ra rtalkaka lahir,

tevek nsiair ovu Ubu Ni ngrebat a,

wol wean Yahudi ovi rair Musa ni inukun ra.

23 Brian munuk,

na brana isa i nait sian nleal ia nti Yahudi rira rahan falurut ralan a,

ma nait sian notu ma brana yai nafwak ne,

24 “Hoi,

Yesus tamata Nazaret,

deka mlabir ami!

Oa mwa ini mane fwedan ami?

Ya'a uka'a ne iki Oa.

Oa sansinir i ralam nmerat urun tali Ubu.”

25 Yesus nfalak verin nait sian yai ne,

“Deka vaim!

Muti talik brana ini!”

26 Nait sian yai notu ma brana yai nafwak ma vain a dawan,

ovu notu ma tenan raruru lalean,

nata nti talik ia.

27 Tamata ra munuk rtalkaka,

ba rsiorat ira ne,

“Ya'i yo,

ini afaka?

Ia Ni ngrebat ma nair afa ngorva'an!

Ia bisma nfareta nait sian ra vali ma rot-orang afa ovi nfalak ra.”

28 Tamata ra rfamalik Yesus verin tamata rivun na'a wan Galilea munuk.

29 Yesus irtelu Yakobus ovu Yohanes rtali Yahudi rira rahan falurut ralan rti murin,

beti rti Simon ovu Andreas rira rahan a.

30 Tamata ovi rna'a rahan yai rfalak verin Yesus ne,

“Simon avan a tenan ngnea,

ba ntuba watan.”

31 Yesus nti wan i vata yai nana'a ma ntaha liman a,

ma nfabatar ia,

na lolin lahir ia.

Ba vata yai nasusan afamtahan verin ira ma ra'an.

32 Lera nakduvul ma laflofan roak,

beti tamata ra rovun tamata ovi raruru ira,

ovu ovi nait sian ra rleal ira ti verin Yesus.

33 Tamata ra munuk na'a ahu yai rasdovu ira na'a rahan ngoran.

34 Yesus notu ma lolin tamata rivun tali rira suhut afaka watan,

ovu naling vatuk nait sian ra tali tamata ra.

Ia wol ntorung ma nait sian ra rangrihi,

tevek rka'a munuk roak ne,

Ubu Yanan Ia.

35 Nfada'ing amar,

na Yesus nbatar ma nti talik rahan yai.

Ia nti wan lean vu isa,

ma naflurut na'a inyai.

36 Nata Simon ovu ni kida ra ti rdava Ia.

37 Ba rdav-nala Ia,

na rfalak ne,

“Tamata rivun rdava Oa!”

38 Yesus nfalak ne,

“Eka tati ahu liak ra vali ma ufamalik Ubu Ni Ivar Lolin a verin tamata ovi rna'a ineri,

tevek Ubu Ni Ivar Lolin yai bi uma ini.”

39 Ba nban-soru wan Galilea munuk ma nfamalik Ubu Ni Ivar Lolin na'a Yahudi rira rahan falurut ra,

ovu naling vatuk nait sian ra tali tamata ra.

40 Tamata isa ni suhut ngabaa nma ma ntuan Yesus,

ma nsangatur na'a wahan ralan al nera verin Ia ne,

“Baba,

wean i mtorung,

na fara motu ma lolin ewal ya'a.”

41 Yesus nfaturu Ni silobang verin tamata yai,

ba nlauk liman a ma nkena ia,

ma nfalak ne,

“Ya'a ulobang oa,

ba lolin kikyai oa!”

42 Brian munuk,

na tamata yai lolin ia,

tevek ni suhut nlia roak.

43-44 Ba Yesus nsinir lahir ia ma nfalak ne,

“Ufangnanang oa ne,

deka fwamalik afa ini verin tamata iki watan.

Na'uk muti lahir ma fwaturu tenam a verin Yahudi rira mela falurut a ma nsi'ik oa.

Mala mu korban verin Ubu,

wean i rfalak roak na'a Musa ni inukun ra,

boma tamata ra rka'a ne,

lolin roak oa.”

45 Na'uk tamata yai ti nfaivar soru ne,

lolin roak ia.

Ba Yesus wol nti ahu ralan,

boma tamata ra deka rarea Ia.

Ia nti ahu murin watan ma nleal wan i wol tamata rna'a,

na'uk tamata ra rtali wan rivun rma lalawatan ma rtuan Ia na'a inyai.