Ivar tali Yohanes i nbaptis tamata ra
1 Kaisar Tiberius nfareta Roma varat vutu rahin ifa'at teran roak.
Na'ut inyai Pontius Pilatus notu gubernur na'a propinsi Yudea.
Herodes notu raja ma nfareta na'a propinsi Galilea,
ovu Herodes a'an i Filipus,
notu raja ma nfareta na'a propinsi Iturea ovu Trakhonitis.
Lisanias notu raja ma nfareta vali na'a propinsi Abilene.*
2 Na'ut inyai,
na Hanas ovu Kayafas reluk Yahudi rira Mela Falurut Ila'a ma rkarya verin Ubu.
Na'a varat yai vali,
na Ubu nangrihi verin Yohanes na'a wan lean vu dawan.
Yohanes ini yaman a verin Zakharia.
3 Ba Yohanes nti munuk wan ovi rfaseri oar Yordan a,
ovu nafwak ma vain a dawan urun al nfamalik Ubu Ni Ivar a ne,
“Myahil kikyai tali bira salasilan ra,
ovu myala tenabira ra ma ti rbaptis mia,
boma Ubu veka na'i vatuk bira salasilan ra.”
4 Wean i nabi Yesaya ntulis na'a ni kitab a ne,
“Tamata isa nafwak na'a wan lean vu dawan ne,
‘Misusan linga'an verin Duila'a,
ovu fyamalola linga'an a verin Ia.*
5 Lanun ovi wol manesan ra,
myotu ma manesan,
ovu myotu vali ma sakvuar ovu vuar ra manesan,
ovu vali linga'an ovi rkiluk ra,
fyamalola ira.
Lanun i suta-rata ra,
myotu vali ma manesan.
6 Ba tamata ovi rna'a lanit ivavan a munuk veka rsi'ik i Ubu nsikat tamata ra tali rira salasilan ra,
ma rira vava'at kakiwal.’ ”
7 Yohanes nfalak verin tamata rivun ovi rma ma nbaptis ira yai ne,
“Mia sian urun mia wean aru ra!
Iki nfalak verin mia ne,
Ubu Ni inukun i veka nma yai wol nkena mia?
8 Fyaturu lahir na'a bira vava'at ra ne,
myahil roak tali bira salasilan ra!
Deka minovak na'a ralabira ra ne,
ububir-nusibira Abraham,
ba Ubu veka wol nukun mia!
Mryenar ma lolin afa ovi ufalak ini!
Ubu bis notu watan ma Abraham yanan ra,
rtali vatu ovi!
9 Ubu Ni amar sarseri roak ma nfaleka inukun verin tamata ra.
Ni inukun a wean tamata i ntaha savi ma veka netal aa ra tali rira wa'ar ra.
Aa ovi vuarira wol lolin ra,
na veka netal vatuk ira ma nala ira rti yafu ralan.”
10 Ba tamata rivun avyai rorat ia ne,
“Wean inyai,
na ami veka amotu afaka?”
11 Yohanes nfalak ne,
“Wean i tamata isa ni ravit irua,
na musti nala isa verin tamata i wol nia a.
Wean iki ni afamtahan,
na ia musti notu vali wean inyai.”
12 Tamata ovi ba'i rera babahir kulu ra,
rma vali ma Yohanes nbaptis ira.
Ira rorat ne,
“Tuan Guru,
ami veka amotu afaka?”
13 Ia nfalak ne,
“Deka myera ma nlia tali i fareta nfadoku roak a.”
14 Suldadu ra rma vali ma rorat ne,
“Ami veka amotu afaka?”
Ia nfalak ne,
“Deka mkyiwal tamata ra ma rala rira kubang verin mia,
te deka fyasala tia ma watan tamata ra ma myala rira kubang ra.
Fyikir watan ne,
bira kadi naran roak ma bya'at.”
15 Na'ut inyai,
na tamata ra rnaban lalawatan Raja i ntevut ita tali dida salasilan ra.
Ira ka'i rorat watan na'a ralarira ra ne,
“Yohanes ini,
betane Raja i ntevut ita tali dida salasilan ra?”
16 Ba Yohanes nfalak verin ira ne,
“Ya'a ubaptis mia ovu wear,
na'uk Ia i veka nma a Ni ngrebat a nlia ya'a.
Ya'a wol verang a ratang Ia,
ba wol inovan lahir ma aling Ni tatea ni tatur ra.
Ia veka nbaptis mia ovu Ni Roh a ovu vali yafu a.*
17 Ia wean tamata isa i ntaha fanan lafan ma al ntafi wanat ra.
Wanat vatul ovi lolin ra,
nfadok-aling ira na'a wan i ba'i rfadoku wanat ra na'a,
na'uk ovi sian ra ovu kukan ra nasnuri ira na'a yafu i wol nmat-nala.”*
18 Na'ut i Yohanes nfamalik Ubu Ni Ivar Lolin a,
na nala snurak rivun verin tamata ra.
19 Ia ntabu Herodes i notu raja na'a Galilea,
tevek nsifa ovu ifarn i Filipus awan a,
naran Herodias.
Yohanes ntabu vali Herodes na'a ni afa sian liak ovi notu ra munuk.*
20 Ti nata,
Herodes ntafal ma naktufan,
ovu nala Yohanes ma nti bu'i ralan.
Yohanes a nbaptis Yesus
21 Na'ut i Yohanes wol nana'a bu'i ralan obin,
na ia nbaptis tamata ra,
ovu nbaptis vali Yesus.
Ti ma Yohanes nbaptis roak Yesus,
na Yesus naflurut.
Na'ut i naflurut obin,
na lanit ratan a natvadil,*
22 ovu Ubu Ni Roh a nsuta wean modarlaka ma ndoku Yesus tenan a.
Nata vai isa ntali lanit ratan nma ma nfalak ne,
“Oa ini Yanak i ulobang urun a.
Oa motu ma ralang a lolin urun.”
Yesus ubun a nusin ra
23 Na'ut i Yesus betmane nfabana Ni karya a,
na snain a Ni varat vututelu.
Tamata ra ranovak ne,
Yesus yaman verin Yusuf i yaman verin Eli.*
24 Eli yaman verin Matat,
Matat yaman a verin Lewi,
Lewi yaman a verin Malkhi,
Malkhi yaman verin Yanai,
Yanai yaman a verin Yusuf.
25 Yusuf yaman a verin Matica,
Matica yaman a verin Amos,
Amos yaman a verin Nahum,
Nahum yaman a verin Hesli,
Hesli yaman a verin Nagai,
26 Nagai yaman a verin Maat,
Maat yaman a verin Matica.
Matica yaman a verin Simei,
Simei yaman a verin Yosekh,
Yosekh yaman a verin Yoda,
27 Yoda yaman a verin Yohanan,
Yohanan yaman a verin Resa,
Resa yaman a verin Zerubabel,
Zerubabel yaman a verin Sealtiel,
Sealtiel yaman a verin Neri,
28 Neri yaman a verin Malkhi,
Malkhi yaman a verin Adi,
Adi yaman a verin Kosam,
Kosam yaman a verin Elmadam,
Elmadam yaman a verin Er,
29 Er yaman a verin Yesua,
Yesua yaman a verin Eliezer,
Eliezer yaman a verin Yorim,
Yorim yaman a verin Matat.
30 Matat yaman a verin Lewi,
Lewi yaman a verin Simeon,
Simeon yaman a verin Yehuda,
Yehuda yaman a verin Yusuf.
Yusuf yaman a verin Yonam,
Yonam yaman a verin Elyakim,
31 Elyakim yaman a verin Melea,
Melea yaman a verin Mina,
Mina yaman a verin Matata,
Matata yaman verin Natan,
Natan yaman verin Daud,
32 Daud yaman a verin Isai,
Isai yaman a verin Obed,
Obed yaman a verin Boas,
Boas yaman a verin Salmon,
Salmon yaman a verin Nahason,
33 Nahason yaman a verin Aminadab,
Aminadab yaman a verin Admin,
Admin yaman a verin Arni,
Arni yaman a verin Hezron,
Hezron yaman a verin Peres,
Peres yaman a verin Yehuda,
34 Yehuda yaman a verin Yakub,
Yakub yaman a verin Ishak,
Ishak yaman a verin Abraham,
Abraham yaman a verin Terah,
Terah yaman a verin Nahor,
35 Nahor yaman a verin Serug,
Serug yaman a verin Rehu,
Rehu yaman a verin Peleg,
Peleg yaman a verin Eber,
Eber yaman a verin Salmon.
36 Salmon yaman a verin Kenan,
Kenan yaman a verin Arpakhsad,
Arpakhsad yaman a verin Sem,
Sem yaman a verin Nuh,
Nuh yaman a verin Lamekh,
37 Lamekh yaman a verin Metusalah,
Metusalah yaman a verin Henokh,
Henokh yaman a verin Yared,
Yared yaman a verin Mahalaleel,
Mahalaleel yaman a verin Kenan,
38 Kenan yaman a verin Enos,
Enos yaman a verin Set,
Set yaman a verin Adam,
Adam yaman a verin Ubu.