Yesus notu mujizat ma nfamela roti ovu ian ra al nfa'an tamata rivun ifa'at
1 Na'ut inyai,
na tamata rivun ila'a rasdovu ira.
Ira wol rira afamtahan ma ra'an,
ba Yesus nera Ni tamata ovi rorang Ia ma nfalak verin ira ne,
2 “Ufaturu Ning silobang verin tamata rivun ovi,
tevek rorang Ya'a amar itelu roak,
ovu wol rira afamtahan ma ra'an.
3 Wean i usinir ma rewal ira ovu evurira vu,
na veka renweringun na'a linga'an ralan,
tevek boku rtali raroa rma.”
4 Ira rfalak ne,
“Na'a wan lean vu ini,
na tala roti tali inba ma naran ma al tfa'an tamata rivun ovi?”
5 Yesus norat ira ne,
“Bira roti ifira?”
Ira rfalak ne,
“Roti ifitu.”
6 Ia nsinir tamata rivun avyai ma rdoku lanun,
beti nala roti ifitu yai ma naflurut ovu nfalak fara weninyai verin Ubu.
Nata nvisul roti ra ma nala verin Ni tamata ra,
ma ki rtanang verin tamata rivun avyai.
Ba rtanang verin tamata rivun avyai.
7 Ira rira ian ko'u boku vali,
ba Yesus naflurut ovu nfalak fara weninyai verin Ubu na'a ian avyai,
beti nsinir Ni tamata ra ma rtanang vali ian avyai verin tamata ra.
8 Rafna'an ma evurira ra rveda roak,
beti Yesus Ni tamata ovi rorang Ia rasdovuk teran ra na'a ahir dawan ifitu rngora.
9 Tamata ovi rafna'an ini nlabas rivun ifa'at.
Ba Yesus nsinir ira ma rewal ira,
10 beti Ia ovu Ni tamata ovi rorang Ia rarata lahir kumal isa ma rti wan i naran Dalmanuta.
Tamata ovi rtali Yahudi rira sidovung Farisi rera ma Yesus notu mujizat
11 Amar isa,
na tamata Farisi boku rma ma rtuan Yesus,
ma rsisoal ira ovu Ia.
Ira rlabir teman Ia ma rera ma notu mujizat isa ma nfaturu ne,
Ubu nsinir Ia.
12 Yesus nanak ma dodun,
ma nfalak verin ira ne,
“Afakinimi tamata ovi rva'at fiang ini rera ma otu mujizat?
Afa i ufalak verin mia ini,
kena urun!
Ya'a veka wol otu mujizat verin mia!”
13 Nata nti talik ira ma nrata kumal ovu Ni tamata ovi rorang Ia,
ma retal danau yai rti ni lihir a.
Yesus nfalak ma Ni tamata ra rsi'ik warira ma lolin na'a tamata Farisi rira afa ovi rotu ra
14 Yesus Ni tamata ovi rorang Ia rablufang ma rtaha roti rivun.
Ira rtaha roti isa watan na'a kumal a.
15 Yesus nala vaivatul kamkuma al nsurak ira ne,
“Msyi'ik ma lolin tamata Farisi ra ovu raja Herodes rira ragi a.”*
16 Ira ka'i rsifalak afa verin ira ne,
“Ia nfalak wean inyai,
tevek wol dida roti.”
17 Yesus nka'a afa ovi rfalak ra,
ba norat ira ne,
“Notu afakinimi msyifalak afa na'a i wol mtyaha roti?
Mia wol mkya'a ovu wol fyan-aran obin?
Ralabira rangrebat da'in ma wol fyikir aran afa ini?
18 Matabira,
na'uk wol msyi'ik?
Arubira,
na'uk wol mifrenar?
Mia wol mingnanang ne,
19 amar i uvisul roti ilima verin tamata rivun ilima ma ra'an,
ovu vali rasdovuk teran ra na'a ahir ifira?”
Ira rfalak ne,
“Ahir vutu rahin irua.”
20 Yesus norat ewal ira ne,
“Amar i uvisul roti ifitu ma tamata rivun ifa'at ra'an,
na misdovuk teran ra na'a ahir ifira?”
Ira rfalak ne,
“Ahir ifitu.”
21 Ia nfalak verin ira ne,
“Notu afakinimi wol fyan-aran obin?”*
Yesus notu ma brana isa i nkibu a nsirea ewal
22 Yesus ovu Ni tamata ovi rorang Ia rbana ma raran ahu Betsaida,
na tamata boku ovi rna'a ahu yai rovun brana isa i nkibu verin Ia,
ma rera lablobang ma nkena tamata kibu yai,
boma nsirea ewal.
23 Ba Yesus ntaha tamata kibu yai liman a ovu nfabana ia ma rti ahu murin.
Nata nafnit na'a tamata yai matan a ovu nfadoku liman a na'a matan a,
beti norat ia ne,
“Msirea roak?”
24 Tamata yai ntadata ma nfalak ne,
“Ya'a usi'ik tamata ra,
na'uk wearira aa ra rbana.”
25 Ba Yesus nfadok-ewal liman a na'a tamata yai matan a,
ma lolin roak ia ba nsirea urun,
ma nsi'ik afa ra munuk ovu lyawan.
26 Tamata yai lolin roak ia,
beti Yesus nsinir ma newal ia nti ni rahan,
ovu nsurak ia ne,
“Deka muti ahu ralan veki.”
Petrus ntorung ne Yesus Raja i ntevut dida salasilan ra
27 Yesus ovu Ni tamata ovi rorang Ia rban-talik Betsaida ma rti ahu ovi rfaseri kota Kaisarea Filipi.
Ira rna'a linga'an ralan obin,
na Ia norat ira ne,
“Tamata ra rfalak ne,
Ya'a ini iki?”
28 Ira rfalak verin Ia ne,
“Tamata boku rfalak ne,
Oa ini Yohanes i nbaptis tamata ra.
Boku rfalak ne,
nabi Elia,
ovu vali boku rfalak ne,
tamata isa tali nabi ra.”
29 Ia norat ira ne,
“Na'uk mia fyikir ne,
Ya'a ini iki?”
Petrus nfalak ne,
“Oa ini Raja i mtevut mami salasilan ra!”*
30 Ba Yesus nfalak teri lahir ma deka rfamalik afa yai verin tamata iki watan.
Yesus nfamalik Ni matmatan
31 Tali amar yai,
Yesus nair Ni tamata ovi rorang Ia ne,
“Ya'a,
Tamata Yanan Ya'a,
musti utuan susa rivun.
Dawan Yahudi ra,
ovu Yahudi rira dawan mela falurut ra ovu vali Yahudi rira dawan ovi rair Musa ni inukun ra veka rala'ing Ya'a ma rfedan Ya'a,
na'uk amar itelu nelak,
na Ubu veka nfava'at ewal Ya'a.”
32 Yesus nfalyawang lahir afa yai verin ira.
Ba Petrus novun Ia ma rdir-aling ira,
beti ntabu Ia.
33 Na'uk Yesus ndir-tamuri Ia,
beti nfalak verin ia ne,
“Nitdawan,
muti vatuk oa tali ini!
Afa ovi fwikir ra wol rtali Ubu,
na'uk rtali watan tamata ra.”
34 Tamata rivun rna'a wan yai,
ba Yesus nera ira ovu vali Ni tamata ra ma nfalak ne,
“Tamata iki watan inan ma norang Ya'a,
na ia musti nalak tenan a ovu nvara ni aa walwalur a.
* Notu wean inyai,
beti bisma norang Ya'a.
35 Tamata iki watan inan ma ntahang teri ni vava'at i na'a lanit ivavan a,
na ia veka wol ni vava'at kakiwal a.
Na'uk tamata iki watan nmata tevek norang Ya'a,
ovu nfamalik Ubu Ni Ivar Lolin a,
na ia veka ni vava'at kakiwal a.
36 Wean i tamata isa nasdovu munuk metan ovi rna'a lanit ivavan a,
na'uk wol ni vava'at kakiwal,
na ihin aka?
37 Ia ki nala aka ma al nkati vava'at kakiwal?
Wol nala akataka lahir!
38 Fiang ini,
mlyeal tamata sian ovi rafena ma rorang Ya'a,
fruarira ra.
Na'uk tamata iki watan nma'it ma nfalak ne norang Ya'a,
ovu wol ntorung afa ovi ufalak ra,
na Ya'a,
Tamata Yanan Ya'a,
veka wol utorung vali tamata yai,
na'ut i uma ewal a ovu Yamang vanan i nfitik nyadat a,
ovu vali Ubu Ni sansinir ovi rmerat urun tali lanit ratan.”