Tamata boku tali Yahudi rira sidovung Farisi ovu sidovung Saduki rera ma Yesus notu faneak i tamata ra wol rot-nala
1 Amar isa,
na tamata boku tali sidovung Farisi ovu Saduki rma mane rlabir teman Yesus.
Ira rera ma notu faneak i tamata ra wol rot-nala ma nfaturu ne,
Ubu nsinir urun Ia.
2 Yesus nfalak verin ira ne,
“Wean i lera mane nakduvul,
na fyalak ne,
‘Ilyan veka lera,
tevek lanit a navuli watan.’
3 Wean i varverak obin,
na fyalak ne,
‘Lanit navuli ovu mutan ra rdiri,
ba veka da'ut.’
Mia mkya'a ma msyi'ik lanit,
na fyalak lahir ne,
veka da'ut te wahal,
na'uk wol fyan-aran faneak ovi fiang ini Ubu notu ra.
4 Notu afakinimi tamata ktufan ovi rva'at na'a tuvu ini wol rorang Ya'a,
na'uk rera ma otu faneak i tamata ra wol rot-nala?
Fiang ini wol otu faneak akataka verin ira,
na'uk ki ufaturu faneak isa watan verin ira,
wean faneak i lan a Ubu notu roak verin nabi Yunus.”
Yesus nfalak munuk wean inyai,
beti nban-talik ira.*
Yesus nfalak ma Ni tamata ra rsi'ik warira ma lolin na'a sidovung tamata Farisi ovu sidovung tamata Saduki rira afa ovi rair ra
5 Yesus ovu Ni tamata ovi rorang Ia raran danau ni lihir a,
na'uk Ni tamata ra rablufang ma rtaha roti.
Na'ut inyai, na
6 Yesus nfalak verin ira ne,
“Msyi'ik wabira ma lolin.
Msyi'ik ma lolin tamata Farisi ovu tamata Saduki rira ragi a!”*
7 Yesus Ni tamata ra wol rfan-aran Ni vaivatul ra,
ba ka'i rsifalak afa verin ira ne,
“Ia nfalak wean inyai,
tevek tablufang ma tataha roti.”
8 Na'uk Yesus nka'a afa ovi rfalak ra,
ba norat ira ne,
“Notu afakinimi msyifalak afa na'a i wol mtyaha roti i?
Mia bira inorang a ko'u da'in!
9 Mia wol fyan-aran obin!
Wol mingnanang amar i uvisul roti ilima ma ufa'an tamata rivun ilima?
Miblufang vali ne,
misdovuk teran ra na'a ahir ifira?
10 Wean inba vali na'a amar i uvisul roti ifitu ma ufa'an tamata rivun ifa'at a?
Misdovuk teran ra na'a ahir ifira?
11 Notu afakinimi wol fyan-aran obin ne,
wol ufamalik na'a roti!
Msyi'ik ma lolin tamata Farisi ovu tamata Saduki rira ragi a.”
12 Ba Ni tamata ra beti rfan-aran ne,
Yesus wol nfamalik ragi i tamata ra ba'i rfadoku na'a roti.
Ia nfamalik wean inyai,
boma rsi'ik warira ma lolin na'a Farisi ovu Saduki rira afa ovi rair ra.
Petrus nfamalik Yesus ne, Raja i ntevut dida salasilan ra
13 Yesus ovu Ni tamata ovi rorang Ia rti wan ovi sarseri ovu kota Kaisarea Filipi.
Ia nana'a inyai,
na norat ira ne,
“Tamata ra rfalak ne,
Tamata Yanan yai,
iki ia?”
14 Ira rfalak ne,
“Tamata boku rfalak ne,
Oa ini Yohanes i nbaptis tamata ra.
Boku rfalak ne,
Oa ini nabi Elia.
Boku vali rfalak ne,
Oa ini nabi Yeremia,
te nabi liak isa vali.”
15 Ba norat ewal ira ne,
“Na'uk mia fyikir ne,
Ya'a ini iki?”
16 Simon Petrus nfalak ne,
“Oa ini Raja i mtevut mami salasilan ra,
ovu Ubu i nva'at a,
Yanan Oa.”
17 Yesus nfalak verin ia ne,
“Ubu naflahar oa,
Simon i yamam verin Yunus,
tevek tamata ra wol rfavotuk afa ini verin oa,
na'uk tali Yamang i na'a lanit ratan a.
18 Ufalak vali verin oa ne,
naram a Petrus,
ihin a vatminan.
Ya'a veka ufadiri Ning sidovung tamata ovi rorang Ya'a na'a vatminan ini ratan a.
Matmatan ni ngrebat wol nfalek-nala ira.
19 Ya'a wean ala kusi tali Ubu Ni Fareta ma ufadoku na'a limam ralan a,
boma wean i fwalak teri afaka watan na'a lanit ivavan a,
na Ubu nfalak teri vali na'a lanit ratan.
Wean i mtorung afaka watan na'a lanit ivavan a,
na Ubu veka ntorung vali na'a lanit ratan.”
20 Nata nfalak teri ma deka rfamalik verin tamata ra ne,
Ia Raja i ntevut rira salasilan ra.
Yesus nfamalik Ni matmatan a
21 Tali amar yai vali,
na Yesus nfalyawang verin Ni tamata ovi rorang Ia ne,
afaka veka nkena Ia.
Ia nfamalik verin ira ne,
musti nti Yerusalem ma dawan Yahudi ra,
Yahudi rira dawan mela falurut ra ovu vali Yahudi rira dawan ovi rair Musa ni inukun ra veka rotu sian Ia tia ma watan.
Ira vali veka rfedan Ia,
na'uk amar itelu nelak,
na Ubu veka nfava'at ewal Ia.
22 Ba Petrus novun Ia ma rdir-aling ira,
beti ntabu Ia nfalak ne,
“Duila'a,
deka fwalak wean inyai!
Era verin Ubu,
boma afa yai deka nkena Oa.”
23 Na'uk Yesus ndir-tamuri Petrus,
beti nfalak verin ia ne,
“Nitdawan,
muti vatuk oa tali ini!
Oa mangal Ya'a ma deka ot-orang Ubu Ni banbanan verin Ya'a.
Afa ovi fwikir ra wol rtali Ubu,
na'uk rtali watan tamata ra.”
Tamata ovi rorang Yesus musti rtorung ma rtuan susa
24 Nata,
Yesus nfalak verin Ni tamata ra ne,
“Tamata iki inan ma norang Ya'a,
na ia musti nalak tenan a ovu nvara ni aa walwalur ma norang a'uk Ya'a.
25 Tamata iki watan inan ma ntahang teri ni vava'at i na'a lanit ivavan a,
na ia wol ni vava'at kakiwal a.
Na'uk tamata iki nablufang ni vava'at a tevek norang Ya'a,
na veka ni vava'at kakiwal.
26 Wean i tamata isa nasdovu munuk metan ovi rna'a lanit ivavan a,
na'uk wol ni vava'at kakiwal,
na ihin aka?
Ia ki nala aka ma al nkati vava'at kakiwal yai?
Wol nala akataka lahir!
27 Ba myorang a'uk Ya'a ovu ralabira urun,
tevek Ning amar veka nma ma Ya'a,
Tamata Yanan Ya'a veka uma ewal,
ovu Yamang Ni ngrebat i nfitik nyadat a,
ovu vali Ni sansinir ra tali lanit ratan rovu vali Ya'a.
Na'ut amar yai,
na veka ukun tamata ra munuk ma inovan ovu afa ovi rotu ra.
28 Afa i ufalak verin mia ini,
kena urun!
Tali bir tinemun na'a wan ini,
na tamata boku wol rmata obin,
na'ut inyai na ira veka rsi'ik lahir Ya'a Tamata Yanan Ya'a veka uma ma ufareta wean lahir Raja.”