1 Wol mnanat,

na Yesus nban-lilit tali kota nti kota,

ovu ahu nti ahu,

ma nfamalik Ubu Ni Ivar Lolin ne,

Ubu nfareta tamata ra wean lahir Raja.

Ni tamata vutu rahin irua yai rorang Ia.

2 Vata ovi Yesus naling vatuk roak nait sian ra ovu notu ma lolin ira tali rira suhut ra,

rorang vali Ia.

Vata avyai,

isa naran Maria i ba'i rera ia ne Magdalena.

^* Yesus naling vatuk roak nait sian ifitu tali ia.

3 Vata isa vali naran Yohana i awan verin Khuza.

Khuza ini ba'i nasusan Herodes ni kubang ra.

Vata isa vali naran Susana,

ovu vata liak ra rivun vali rorang Yesus.

Vata avyai rala rira kubang ma rlobang Yesus ovu Ni tamata ovi rorang Ia.

4 Tamata rivun ila'a tali ahu rivun rma ma rasdovu ira ma rarenar afa ovi Yesus nfalak ra.

Ba Yesus nala vaivatul kamkuma isa ma nfalak verin ira ne,

5 “Amar isa,

na tamata va'i isa ti ma navuri nabat ra.

Na'ut i navuri nabat ra,

na boku rleka na'a linga'an ralan ma tamata ra rbana ma rta watan ira,

ovu manut nangan ra ra'an vali boku.

6 Nabat boku rleka vali na'a vatralan i lanun kadkedan watan,

ba ti ma rarubu,

na rakla ma rangaran lahir,

tevek lanun yai near watan.

7 Nabat boku vali rleka na'a kadkadir ralan.

Kadkadir avyai rmel-yatak irubun ra,

ma irubun ra rmata.

8 Na'uk nabat boku rleka na'a lanun tinemun,

ba ti ma rarubu,

na vuar ma faratratut.”

Yesus nfamalik munuk vaivatul kamkuma yai,

na vain a dawan ma nfalak ne,

“Iki arun,

na eka nrenar ma lolin!”

9 Yesus Ni tamata ovi rorang Ia rorat ne,

“Vaivatul kamkuma yai ihin aka?”

10 Ba Yesus nfalak verin ira ne,

“Ubu notu ma fyan-aran afa ovi Ia wol nfavotuk obin verin tamata ra,

na'a i wean inba ma nfareta tamata ra wean lahir Raja.

Na'uk verin tamata liak ra,

na air ira ovu vaivatul kamkuma ra,

boma velik ne rsi'ik afa ovi otu ra,

na'uk wol rarea afa avyai.

Rarenar Ning vaivatul ra,

na'uk wol rfan-aran vali.

11 Vaivatul kamkuma yai ihin a wean ini:

nabat avyai rfaturu Ubu Ni vaivatul ra.

12 Nabat ovi rleka na'a linga'an ralan rfaturu tamata ovi rarenar roak Ubu Ni vaivatul ra,

na nitdawan nma ma nal-ewal vaivatul avyai ma wol rna'a ralarira ra.

Nitdawan notu wean inyai,

boma tamata avyai deka rorang Ubu,

ovu Ubu wol nsikat ira tali rira salasilan ra,

boma deka rira vava'at kakiwal.

13 Nabat ovi rleka na'a vatralan i lanun kadkedan watan a,

rfaturu tamata ovi rarenar roak Ubu Ni vaivatul ra ma rtorung ovu ralarira lolin na'ut i rarenar vaivatul avyai.

Na'uk vaivatul avyai wol rabwa'ar na'a ralarira ra,

ba rira inorang a wol ntahang ma mnanat.

Na'ut i rtuan angangal,

na rafla talik rira inorang a.

14 Nabat ovi rleka na'a kadkadir ralan ra rfaturu tamata ovi rarenar roak Ubu Ni vaivatul ra,

na'uk rfikir lalawatan afa liak,

ma ralarira kako'u na'a rira vava'at ra.

Ira inar vali ma rtafal ila'a rira metan ra,

ovu rotu inar lolin watan na'a lanit ivavan ini.

Afa avyai rotu ma wol rorang Ubu Ni vaivatul ra,

ma wol enarira akataka na'a rira vava'at ra.

15 Nabat ovi rleka na'a lanun tinemun,

rfaturu tamata ovi rarenar Ubu Ni vaivatul ra ma rala na'a ralarira ra,

ovu ralarira ila'a ra lolin urun ovu rmalola.

Ba velik ne rtuan angangal,

na'uk rtahang nal ralarira watan,

ma rira vava'at ra kena ovu Ni vaivatul ra.”

16 Yesus ntafal ma nfalak ne,

“Wol tamata isa ntutun damar ma nulang teri ovu ngusi,

te nfadoku na'a ko'i vavan a.

Na'uk nfadoku na'a damar wan i karatat a,

boma nyeba munuk tamata ovi rma rahan ralan yai.

17 Wean inyai bi,

afa fanfonak ra veka lyawan,

ovu afa ovi tamata ra wol rka'a veka rvotuk ma lyawan verin tamata ra.

18 Eka mingnanang ma lolin afa ovi mryenar roak tali Ya'a,

tevek tamata iki watan inan ma nfan-aran Ubu Ni vaivatul ra,

na Ubu veka ntafal ni kaka'a.

Na'uk tamata iki watan wol inan ma nfan-aran Ubu Ni vaivatul ra,

na Ubu veka nala munuk kaka'a yai tali ia,

velik ne nfikir ne,

nka'a kadkedan roak.”

19 Yesus renan ovu warin ra rma ma rtuan Ia,

na'uk wol rfaser-nala,

tevek tamata rivun rdir-lilit Ia.

20 Ba tamata isa nfalak verin Yesus ne,

“Baba,

renam a ovu warim ra rdiri watan murin eri ovu inar ma rtuan Oa.”

21 Na'uk Yesus nfalak ne,

“Tamata ovi rarenar Ubu Ni vaivatul ra ovu rot-orang,

na tamata avyai renang ovu waring verin ira.”

22 Amar isa,

na Yesus ovu Ni tamata ovi rorang Ia rarata kumal isa.

Yesus nfalak verin ira ne,

“Mya ma tati danau Galilea ni lihir a.”

Ba irmunuk robal ma rti lahir danau yai ni lihir a.

23 Na'ut i robal a,

na Yesus ntuba.

Brian munuk,

na nait fufakmetan nkena ira na'a danau yai ralan a,

ba saksakan ra dawan ma wear a ndata lahir rira kumal ralan a.

Ira sarseri mane rakduvul roak,

ma wol rka'a ne,

veka rmata te rva'at.

24 Ba Yesus Ni tamata ovi rorang Ia rkadu Ia ma rfalak ne,

“Tuan Guru!

Ita mane takduvul roak!”

Yesus nbatar ma nfareta nait ovu saksakan ra,

ba nait ovu saksakan ra rtalik lahir ma danau yai ngarlina ewal.

25 Nata Yesus nfalak verin ira ne,

“Afakinimi wol myorang Ya'a?”

Ba ira rbobar urun i lahir ovu rtalkaka ma rsifalak afa verin ira ne,

“Ini tamata iki mnga'un ma nfareta nait ovu saksakan ra ma rorang Ia?”

26 Yesus ovu Ni tamata ovi rorang Ia robal ewal ma rti raran wan i tamata Gerasa rleal na'a danau Galilea ni lihir a.^*

27 Ti ma Yesus nsuta tali kumal a,

na brana isa ntali ahu i sarseri wan yai nma ma ntuan Ia.

Brana yai nait sian ra rlabir ia ovu mnanat roak wol nung a neluk ia,

ovu vali ia wol nana'a rahan,

na'uk nana'a watan van ovi rfadoku tamata matmatan ra rna'a.

28 Ba na'ut i nsi'ik Yesus,

na nafwak ma vain a dawan,

beti nsangatur lahir na'a Yesus wahan ralan a ma nafwak ne,

“Yesus,

mwa ini ma motu afaka verin ya'a?

Oa ini Ubu i Ni dawan lia munuk afakataka Yanan Oa.

Era lablobang verin Oa ma deka motu sian ya'a.”

29 Ia nfalak wean inyai,

tevek Yesus nfareta roak ma nait sian avyai rti talik ia.

Brana ini nait sian avyai ba'i rlabir ia,

ba velik ne rkeak liman ovu ean a ovu kakeak tma'an,

ovu vali rwanar ia,

na'uk nkametal nala munuk kakeak tma'an avyai,

beti nait sian avyai rovun ia nti wan ovi wol tamata rna'a.

30 Ba Yesus norat brana yai ne,

“Oa naram iki?”

Ba nfalak ne,

“Ya'a narang Legion.”

^* Ia nfalak wean inyai,

tevek nait sian rivun roak rlabir ia.

31 Nait sian avyai rera lablobang verin Yesus ma deka nala'ing vatuk ira rti tivat matmatan i bilaman urun a.

32 Na'a wan yai,

na vavu dur dawan isa rafnuak na'a ma rdava rira fana'an ra na'a vuar ni dadudur a.

Ba nait sian avyai rera lablobang verin Yesus ma ti rna'a vavu avyai.

Yesus ntorung afa i rera yai.^*

33 Ba nait sian avyai rti talik brana yai ma ti rna'a vavu dur yai.

Nata vavu avyai rafla ma rti rtobur tali bili'in nelan a,

ma rsuta danau ralan ma rakduvul ma rmata munuk.

34 Ti ma tamata ovi rfawatak vavu avyai rsi'ik afa yai,

na rafla lahir rti ma rfamalik ivar yai na'a kota ovu na'a ahu ovi rfaseri wan yai.

35 Ba tamata ra rma ma rsi'ik afa ovi Yesus notu roak a.

Ira rma ma rtuan Yesus,

na rarea lahir brana i Yesus naling vatuk roak nait sian ra tali ia.

Brana yai ndok-ebang Yesus ean a.

Ia nung a neluk roak ia,

ovu ni fikiran a lolin ewal roak,

ba tamata avyai rbobar urun i lahir.

36 Tamata ovi rsi'ik lahir afa i Yesus notu roak yai rfamalik verin tamata ovi beti rma wan yai,

na'a brana i Yesus naling vatuk roak nait sian ra tali ia.

37 Ba tamata ovi rna'a Gerasa munuk lahir rera lablobang verin Yesus ma nti talik ira,

tevek rbobar urun.

Ba Yesus nrata kumal a ma robal ewal.^*

38 Brana i nait sian ra rti talik roak ia yai nera urun verin Yesus,

boma ia novu vali.

Na'uk Yesus nsinir ma newal ia ma nfalak ne,

39 “Mewal oa muti mu rahan ma fwamalik munuk afa ovi Ubu notu roak verin oa.”

Ba brana yai nti ma nban-lilit kota a ma nfamalik afa ovi Yesus notu roak verin ia.^*

40 Na'ut i Yesus newal Ia ma nti danau Galilea ni lihir varat a,

na tamata rivun rsa'a Ia,

tevek rnaban watan Ia.

41 Na'a wan yai,

na tamata isa naran Yairus,

ia nban-ulu na'a tamata Yahudi rira rahan falurut a.

Ia nma ma nsangatur ma nsoak wahan a na'a Yesus wahan ralan a,

ma nera urun verin Yesus ma nti ni rahan.

42 Yairus nera wean inyai,

tevek yanan vata nawar ia,

sarseri mane nmata.

Yanan vata yai ikisa lalo'i,

ovu ni varat vutu rahin irua.

Na'ut i Yesus nbana nti Yairus ni rahan a,

na tamata rivun rna'a inyai,

ba rsidekin ira ma rdekin nala vali Yesus.

43 Tali tamata rivun avyai,

na vata isa laran nvoat ma dawan da'in,

ti naran varat vutu rahin irua roak,

na'uk wol tamata isa vali bis notu ma lolin ewal ia.^*

44 Vata yai nahu Yesus murin a ma ti nfaseri Ia ma nkena Ni ravit blawat ni wahan a,

ba na'ut inyai vali,

na laran i nvoat a ntalik lahir.

45 Ba Yesus nfalak ne,

“Iki nkena Ya'a?”

Wol tamata isa vali ntali ira ntorung ne,

nkena Ia.

Ba Petrus nfalak ne,

“Tuan Guru,

tamata rivun rdir-lilit Oa,

ma rdekin kena Oa.”

46 Na'uk Yesus nfalak ne,

“Tamata isa nkena Ya'a,

tevek ufarnuang ne,

Ning ngrebat nlobang tamata isa.”

47 Vata yai nsi'ik ne,

Yesus nka'a roak afa i notu a,

ba nbobar ma raruru lalean ia,

ma nsangatur ma nsoak wahan na'a Yesus wahan ralan a.

Ia nfamalik verin tamata rivun avyai,

ma al nfalyawang ne,

afakinimi nkena Yesus,

ovu na'ut inyai,

na lolin lahir ia.

48 Yesus nfalak verin vata yai ne,

“Titi,

oa morang Ya'a,

ba lolin roak oa.

Mewal oa,

ovu fara Ubu nala Ni malinan verin oa.”

49 Na'ut i Yesus nangrihi obin,

na Yairus i nban-ulu na'a Yahudi rira rahan falurut yai,

ni tamata isa ntali ni rahan nma.

Ia nfalak verin Yairus ne,

“Itrana,

yanam vata nmata roak,

ba deka fwafrea Tuan Guru.”

50 Na'uk Yesus nrenar vaivatul yai,

ba nfalak verin Yairus ne,

“Baba,

deka bwobar.

Morang watan Ya'a,

na yanam a veka nva'at ewal.”

51 Ti ma raran Yairus ni rahan,

na Yesus wol ntorung ma tamata liak rorang Ia rti ralan,

na'uk ntorung watan ma Petrus,

Yakobus,

Yohanes ovu kasiko'u yai renan a yaman a rovu Ia.

52 Tamata ra munuk ralarira lalau ma rvakar ma vairira dawan.

Na'uk Yesus nfalak ne,

“Deka byakar,

tevek ia wol nmata,

na'uk ntub-lufa watan.”^*

53 Tamata avyai rmalit waweang Ia,

tevek ira rka'a ne,

kasiko'u yai nmata roak.

54 Na'uk Yesus ntaha kasiko'u yai liman a ma nfalak ne,

“Titi,

bwatar kikyai!”

55 Ba kasiko'u yai nva'at ewal^* ma nbatar ma ndiri lahir.

Nata Yesus nsinir ira ma rala afamtahan verin ia ma na'an.

56 Kasiko'u yai renan yaman a rtalkaka lahir,

na'uk Yesus nfalak teri ma deka rfaivar verin iki watan na'a afa i notu a.