Tamata Farisi ra wol rtorung ma Yesus notu ma lolin tamata ra na'ut amar i Yahudi ra ryari ira
1 Yesus newal Ia nti Yahudi rira rahan falurut ralan a,
na brana isa na'a inyai liman lihir nmata.
2 Tamata Farisi ovi rna'a inyai rsi'ik nanuang Ia,
betane notu ma lolin brana yai na'a amar i Yahudi ra ryari ira,
boma rmangadu Ia.
3 Ia nfalak verin brana i liman nmata yai ne,
“Mwa ma mdiri tamata ovi rna'a ini waharira ralan ra!”
4 Nata,
Yesus norat tamata avyai ne,
“Dida agama ni inukun ra rfalak ma bis totu afaka na'ut amar i tyari ita?
Totu afa ovi lolin ra,
te afa ovi sian ra?
Tlobang tamata ra ma rva'at,
te tfedan ira?”
Na'uk ira wol vair lahir.
5 Yesus ralan a lalau,
tevek ralarira ra rangrebat dalang,
ba nsi'ik lilit ira ovu wahan nangrova.
Ia nfalak verin brana yai ne,
“Mlauk limam a mwa.”
Ia nlauk liman a ma Yesus notu ma lolin lahir ia.
6 Tamata Farisi ra rdir-talik wan yai ma rti murin.
Ba Farisi ra ovu tamata ovi rorang Herodes rasdovu lahir ira ma al ranovak ma ra'an vai isa mane rfedan Yesus.
Tamata rivun rdava Yesus ma rsi'ik Ni lolin a
7-8 Yesus ovu Ni tamata ovi rorang Ia rewal ira rti danau Galilea.
Tamata rivun ila'a rtali propinsi Galilea rorang ira,
ovu tamata ovi rma vali rtali propinsi Yudea,
rtali kota Yerusalem,
propinsi Idumea,
wan ovi rna'a oar Yordan ni lihir a,
ovu vali rtali wan ovi sarseri ovu kota Tirus ovu kota Sidon.
Tamata rivun ila'a rarenar ne,
Yesus notu mujizat rivun,
ba rma ma rtuan Yesus.
9 Ia nfalak verin Ni tamata ovi rorang Ia ma ti rala kumal isa verin Ia,
boma wean i tamata rivun avyai rdir-sidekin ira,
na wol rdekin kena Ia.
10 Ia notu ma lolin roak tamata rivun ovi rira suhut ra,
ba tamata liak ovi rira suhut obin rdir-sidekin ira ma rkiwal ma rkena Ia.
11 Tamata liak boku vali nait sian ra rleal ira,
ma na'ut i rsi'ik Yesus,
na rsangatur lahir verin Ia ma rafwak ne,
“Ubu Yanan Oa!”
12 Na'uk Yesus nfalak teri lahir ma deka rfalak ne,
iki Ia.
Yesus nfili tamata vutu rahin irua ma reluk Ni rasul ma rorang Ia na'a Ni karya
13 Yesus nva'al vuar isa ma nera tamata ovi ralan nfalak a ma rorang Ia.
Ba tamata avyai rma ma rtuan Ia.
14 Ia nfili tamata vutu rahin irua ma reluk Ni rasul ma rorang Ia,
boma nsinir ma rti rfamalik Ubu Ni Ivar Lolin,
15 ovu nala Ni ngrebat verin ira ma raling vatuk nait sian ra tali tamata ra.
16 Tamata ovi Yesus nfili ra,
nararira Simon i Yesus nfanara ia ne Petrus,
17 Yakobus irua warin a Yohanes,
yamarira naran Zebedeus (Yesus nfanara ira ne Boanerges,
ihin a vairira wean dodung).
18 Andreas,
Filipus,
Bartolomeus,
Matius,
Tomas,
Yakobus i yaman naran Alfeus,
Tadeus,
Simon i ntali sidovung isa naran Zelot,
19 ovu Yudas Iskariot i nfedi Yesus.
Yahudi rira dawan ovi rair Ubu Ni inukun ra rfalak ne Yesus Ni ngrebat ntali Beelzebul
20 Nata Yesus ovu Ni tamata ovi rorang Ia rewal ira rti rahan i nleal a,
na tamata rivun rasdovu ewal ira,
ba Yesus ovu Ni tamata ra wol bisma rafna'an.
21 Ni tiniman rarenar afa yai,
ba rti lahir ma rala Ia.
Ira rfalak ne,
“Yesus nfoar-nlakat roak!”
22 Yahudi rira dawan boku ovi rair Ubu Ni inukun ra rtali Yerusalem rma ma rfalak ne,
“Beelzebul i nitdawan ia nleal Yesus!
Nait sian rira dawan ini nala ngrebat verin Ia ma naling vatuk nait sian ra.”
23 Ba Yesus nera tamata rivun avyai ma nala vaivatul kamkuma al nfalak verin ira ne,
“Nitdawan wol naling nala ni nait sian ra tali tamata.
24 Wean i rsiduk nuhu dawan isa na'ut ifira ma sidovung ra rotu rihi,
na nuhu dawan yai veka nama'ar.
25 Wean i tamata ra rsingarahi na'a rahan teta isa,
na rira rahan teta veka nama'ar vali.
26 Ba wean vali i nitdawan nsingarahi-sikual ovu ni nait sian ra,
na ni fareta veka nama'ar ma wol nfaret-nala roak ira.
27 Wean vali inyai,
wol tamata nti nala tamata ngrebat isa ni rahan ma nbori ni metan ra,
na'uk musti nkeak ia veki,
beti nbor-nala ni metan ra.*
28 Afa i ufalak verin mia ini,
kena urun!
Ubu bisma na'i vatuk tamata rira salasilan ra,
velik ne rfalak sian Ia.
29 Na'uk tamata ovi rfalak sian Ubu Ni Roh,
na Ubu veka wol na'i vatuk roak rira salasilan ra.
Ba rira salasilan yai nana'a,
nata ti wol ni wahan.”
30 Yesus nfalak wean inyai,
tevek tamata boku rfalak ne,
nait sian nleal Ia.
Yesus renan ovu warin ra
31 Nata Yesus renan ovu warin ra rma,
na'uk rdiri rahan murin watan,
ba rsinir tamata ra ma ti rera Ia.
32 Tamata rivun rdok-lilit Yesus ma rfalak verin Ia ne,
“Baba,
ti ma msi'ik renam ovu warim ra rna'a murin eri.
Ira inar ma rangrihi nulu Oa.”
33 Yesus nfalak verin ira ne,
“Ya'a renang iki te waring aba?”