1 Nata tamata ovi rovu munuk sidovung dawan yai,

rdiri munuk lahir ma rovun Yesus nti verin Pilatus.^*

2 Ti ma raran Pilatus,

na rmangadu Ia ma rfalak ne,

“Ami amtuan roak tamata ini na'ut i nlabir nala mami tamata ra.

Ia nfalak teri tamata ra ma deka rbahir kulu verin Kaisar.

Ia nfalak vali ne,

Ia Raja i ntevut dida salasilan ra.”

3 Ba Pilatus norat Ia ne,

“Yahudi rira raja verin Oa?”

Yesus nfalak ne,

“Oa ka'i fwalak roak yai.”

4 Pilatus nfalak verin Yahudi rira dawan mela falurut ra ovu tamata rivun avyai ne,

“Ya'a wol utuan sala akataka na'a tamata ini.”

5 Na'uk ira rkiwal ila'a ma rfalak ne,

“Ia Ni afa ovi nair ra rsoru munuk roak tamata ovi rna'a Yudea,

bi tamata ra rotu vangoa-vanga.

Ia nsiair lan na'a Galilea,

beti nma naran wan ini.”^*

6 Pilatus nrenar afa yai,

ba norat ira ne,

“Tamata ini ntali Galilea?”

7 Ti ma Pilatus nka'a ne,

Yesus ntali wan i raja Herodes nfareta a,

na nsinir tamata ra ma rovun Yesus ti verin Herodes.

Na'ut inyai,

na Herodes nana'a vali Yerusalem.

8 Herodes nsi'ik Yesus,

na inan urun,

tevek mnanat ila'a roak nrenar watan tamata ra rfamalik Yesus,

ovu inan ma nsi'ik Ia.

Ia inan vali ma nsi'ik Yesus notu mujizat a.

9 Wean inyai bi norat afa rivun tali Yesus,

na'uk Yesus wol nvalat akataka.

10 Yahudi rira dawan mela falurut ra ovu rira dawan ovi rair Musa ni inukun ra rna'a vali inyai,

ba rmangadu Yesus ovu rira vaivatul ovi aleman ra.

11 Ba Herodes ovu ni suldadu ra rfalak sian ovu rangrihi ma rworuk-rwak Yesus,

beti rotu ma neluk ravit blawat i raja ra ba'i roru a.

Rotu munuk wean inyai,

beti rovun ewal Ia ti verin Pilatus.

12 Lan ana Herodes ovu Pilatus rsisala rala,

na'uk na'ut amar yai,

na irua rotu kida.

13 Pilatus nasdovu munuk Yahudi rira dawan mela falurut ra,

ovu rira dawan ra,

ovu vali tamata rivun,

14 beti nfalak verin ira ne,

“Mia myovun roak tamata ini nma verin ya'a ma fyalak ne,

Ia nlabir nala tamata ra.

Mia ka'i msyi'ik lahir i urus roak Ia,

na'uk wol utuan Ni sala isa vali tali afa ovi myangadu ra.^*

15 Herodes vali wol ntuan afa sala avyai.

Ba wean inyai bi nsinir roak ma rovun Ia nma verin ya'a.

Ufalak urun ne,

tamata ini wol Ni sala akataka,

ba wol inovan ma ufaleka inukun matmatan verin Ia.

16 Ba ya'a veka ufareta ma rasveva Ia,

beti ufatalik Ia.” [

17 Lokat snoba Paskah,

na Pilatus musti nfatalik tamata isa tali bu'i ralan verin tamata ra.^*]

18 Na'uk tamata rivun ovi rna'a inyai rafwak ne,

“Fwedan Ia!

Fwatalik Barabas verin ami!”

19 Pilatus ni suldadu ra ra'abu'i roak Barabas,

tevek ia novu vali vangoa-vanga i na'a kota ralan a,

ovu nsifedan.

20 Pilatus inan ma nfatalik Yesus,

ba nangrihi fasa ewal verin tamata rivun avyai ovu vain dawan.

21 Na'uk rafwak ma rfalak ne,

“Bwaku Ia na'a aa walwalur!

Bwaku Ia na'a aa walwalur!”

22 Nata Pilatus nfalak fasa ewal verin ira ma fatelu roak ne,

“Tamata ini Ni sala aka?

Ya'a wol utuan lahir ne,

notu sala ma inovan ma ukun Ia ma nmata.

Ba veka ufareta ma rasveva Ia,

beti ufatalik Ia.”

23 Na'uk ira rkiwal ila'a ma rafwak ovu vair dawan,

boma nfareta ma rbaku Yesus na'a aa walwalur.

Ti nata uturira.

24 Ba Pilatus nfaleka inukun verin Yesus,

boma nfakena tamata rivun avyai rira ininan a.

25 Ia norang rira ininan a ma nfatalik tamata i ra'abu'i roak ia,

velik ne notu vangoa-vanga ovu nsifedan.

Na'uk ia nala Yesus verin tamata avyai ma rotu tia ma watan Ia,

wean i ralarira rfalak a.

26 Na'ut i ira rovun Yesus,

na rtaha vali Simon i ntali kota Kirene a.

Ia beti naran Yerusalem.

Ira rkiwal ia ma nvara Yesus Ni aa walwalur a ma norang Ia.

27 Tamata rivun ila'a rorang Yesus.

Tali tamata avyai,

na vata boku rvakar ma rfaktanit Yesus.

28 Na'uk Yesus nfulak Ia ma nfalak verin ira ne,

“Vata Yerusalem averi!

Deka byakar Ya'a,

na'uk byakar a'uk tenabira ra ovu yanabira ra!

29 Tevek ni amar a veka nma ma tamata ra rfalak ne,

‘Lolin urun verin vata ovi wol rbarlewan,

ovu wol yanarira,

ovu vali wol rsisusu!’

30 Na'ut inyai,

na tamata ra veka rfalak verin vuar ra ne,

‘Fara mlyeka ma mtya'i ami!’

Ovu rfalak vali verin sakvuar ra ne,

‘Mya ma myoving ami!’^*

31 Tevek rotu roak wean ini verin Ya'a i wol ning salasilan a,

na ira veka rotu ma nlia verin mia,

tamata ovi bira salasilan roak a.

Ya'a weang aa i nva'at obin ma yafu wol bisma nasnuri nala.

Na'uk mia weabira aa ovi rangaran roak a ma yafu veka nasnuri munuk lahir!”^*

32 Ira rovun vali tamata ktufan irua ma veka rfaklo'i ira ma rmata ovu Yesus.

33 Ti ma raran wan i naran “Kalkulun a”,

na rbaku Yesus na'a aa walwalur.

Ira rbaku vali tamata ktufan irua yai,

ma isa na'a Ni lihir mela a,

na isa vali na'a Ni lihir balit a. [

34 Yesus nfalak ne,

“Bapa,

ma'i vatuk rira salasilan yai,

tevek wol rka'a afa i rotu a.”

Rotu munuk wean inyai,

beti rotu undi ma rtanang Ni kadaravit ra.]^*

35 Tamata rivun ovi rdiri inyai ramunin Ia na'a aa walwalur a.

Yahudi rira dawan ra rfalak sian Ia ne,

“Ia notu ma lolin ewal tamata liak ma wol rmata.

Ba wean i Ubu nfili Ia ma neluk Raja ma nsikat tamata ra tali rira salasilan ra,

na tsi'ik watan ne,

nlobang tenan ma nangal nala Ni matmatan ma nva'at te wahal!”

36 Roma rira suldadu ra rfalak sian vali Ia.

Ira rala anggur i nakbia a verin Ia,

37 ma rfalak ne,

“Wean i Oa meluk raja verin tamata Yahudi ra,

na msuta tali aa walwalur yai,

boma deka mwata!”

38 Rtulis vali vaivatul ra na'a aa walwalur,

na'a Yesus ulun ratan a ne:

“Yahudi rira Raja verin Ia.”

39 Tamata ktufan isa i raklo'i ia na'a aa walwalur yai nfalak sian Yesus ne,

“Oa ini Raja i mtevut tamata ra rira salasilan ra?

Eka mlobang tenam a ovu ami ma mangal nala matmatan a ma tva'at!”

40 Na'uk tamata ktufan isa vali ntabu ia ma nfalak ne,

“Oa wol bwobar Ubu?

Ira rfaleka vali inukun matmatan verin oa wean watan Ia.

41 Inovan ma rukun itrua,

tevek afa sian ovi totu ra.

Na'uk tamata ini wol Ni sala akataka.”

42 Nata nfalak verin Yesus ne,

“Na'ut i veka mwa ma meluk Raja ma fwareta,

na fara mungnanang vali ya'a.”

43 Ba Yesus nfalak verin ia ne,

“Afa i ufalak verin oa ini,

kena urun!

Amar ini veka movu lahir Ya'a ma tna'a Firdaus.”^*

44 Na'ut inyai lera ndirlola,

na deda fafyat nsoru munuk wan yai,

ti naran jam itelu.

45 Maloli dawan amafal i naklo'i Yahudi rira Rahan Dawan Falurut ralan namadir lahir na'ut irua.^*

46 Nata Yesus nafwak ovu vain dawan ne,

“Bapa,

ala munuk Ning vava'at a ma ufadoku na'a limam ralan a.”

Ti ma nfalak munuk wean inyai,

na nan a nakbosal vali.

47 Na'ut i dawan i nfareta Roma rira suldadu ra nsi'ik afa avyai,

na nfadawang lahir Ubu ma nfalak ne,

“Kena urun,

tamata ini Ni vava'at nmalola!”

48 Tamata rivun ovi rma ma ramunin,

rsi'ik vali afa avyai,

ba rewal ira ma na'a rira banbanan obin,

na ka'i rfefik buburira ra.^*

49 Tamata ovi rka'a Yesus,

ovu vata ovi rka'a vali Ia ma rorang Ia tali Galilea,

rdiri watan raroa ma rsi'ik afa avyai munuk.

50-51 Tamata isa naran Yusuf ntali ahu Arimatea na'a propinsi Yudea.

Ia tamata lolin ia ovu ni vava'at nmalola,

ovu vali nanaban ma Ubu nfareta tamata ra wean lahir Raja.

Velik ne ia ndoku vali Yahudi rira sidovung dawan a,

na'uk wol ntorung ma rfasala Yesus ma rala Ia verin fareta Roma a.

52 Ia nti ma ntuan Pilatus ma nera Yesus tenan a.

53 Nata,

ia nfasuka Yesus tenan tali aa walwalur,

ma nkuma Ia ovu maloli ngangiar,

beti ti nfanuba Yesus tenan a na'a vatu i rtivan roak ia ma wean van,

na'uk wol rfadoku matmatan ra na'a obin.^*

54 Amar yai amar i Yahudi ra rasusan warira ma rsa'a amar i mane ryari ira,

tevek lokat amar yai ni ovan,

na ira ryari roak ira.^*

55 Vata ovi rorang Yesus tali Galilea rorang vali Yusuf,

ti ma rsi'ik van i rfanuba Yesus.

Ira rsi'ik vali i wean inba ma rfanuba Yesus tenan a na'a van yai.

56 Nata rewal ira rti Yerusalem ma rasusan ngul ovi voarira lolin,

ovu voan ngul lolin i rfanara ia ne mur,

ma veka raslofi na'a Yesus tenan a.

Na'a amar i Yahudi ra ryari ira,

na ira wol rkarya,

ma rot-orang Musa ni inukun ra.