1 Varverak sumatan obin na'ut i amar kareda,

na vata avyai rtaha ngul ovi voarira lolin ma rti van matmatan i rfanuba Yesus tenan a.

Ira wol rti obin,

na rasusan lan roak afa avyai.

2 Ti raran inyai ma rsi'ik,

na vatu dawan i rala al rulang van matmatan yai ngoran a,

natsuar roak.

3 Ba rti lahir ralan ma rsi'ik,

na Duila'a Yesus tenan a wol nleal roak.

4 Ira rdiri watan ma wol rka'a ma raroal te rara,

tevek ranovak afa yai.

Brian munuk,

na tamata irua rdir-ebang lahir ira.

Tamata irua yai roru kadaravit ovi vanar urun a.

5 Ba vata avyai rbobar urun i lahir ma rsangatur nulu ira ma waharira rsuta rkena lanun.

Na'uk tamata irua yai rfalak verin ira ne,

“Notu afakinimi mdyava tamata i nva'at na'a tamata matmatan warira?

6 Ia wol nana'a roak wan ini.

Ia nva'at ewal roak!

Eka mingnanang afa ovi nfalak lan roak verin mia,

na'ut i nana'a propinsi Galilea ne,

7 ‘Ira musti rala Tamata Yanan verin tamata salasilan ra ma rbaku Ia na'a aa walwalur,

na'uk amar itelu nelak,

na veka nva'at ewal.’ ”

8 Ba vata avyai rangnanang nala ewal afa ovi Yesus nfalak roak verin ira.

9 Ti ma rewal ira tali van matmatan yai,

na rfamalik munuk lahir afa avyai verin Yesus Ni tamata vutu rahin isa ovi rorang Ia,

ovu vali verin tamata inorang liak ra.

10 Vata avyai nararira:

Maria Magdalena,

Yohana,

ovu Maria i yanan verin Yakobus,

ovu vali vata liak ovi rovu vali ira.

Irmunuk rfamalik afa avyai verin rasul ra.

11 Na'uk rasul avyai ranovak ne,

inyai ivar vu watan,

ba wol rorang afa ovi vata avyai rfalak a.

12 Velik ne wean inyai,

Petrus ndiri ma nafla lahir nti van matmatan yai.

Ti naran van yai,

na nsoak ia ma nsi'ik nti ralan,

na nrea watan maloli ra.

Nata newal ia ovu norat watan na'a ralan a,

na'a afa ovi rvotuk roak yai.

13 Amar yai vali,

na Yesus Ni tamata irua ovi rorang Ia rbana rti ahu i naran Emaus a.

Ahu yai ka'a bi kil vutu rahin isa tali Yerusalem.^*

14 Na'a rira banbanan a,

na rfamalik afa ovi rvotuk roak yai.

15 Na'ut i irua rfamalik afa ovu rsiforat ira,

na Yesus aksa Ia nma lahir ma nbana ovu ira.

16 Ira rsi'ik Yesus,

na'uk afa isa notu ma wol rka'a Ia.

17 Yesus nfalak verin ira ne,

“Mia byana fyamalik afakinyai?”

Ba rdir-teri lahir ovu waharira rfaturu ne,

ralarira lalau.

18 Tali tamata irua yai,

na isa naran Kleopas.

Ia norat Yesus ne,

“Baba,

afakinimi tali tamata dakan ovi rna'a ini,

na Oa a'uk sa'i wol mka'a afa ovi beti rvotuk inravin ovu ravruan a na'a Yerusalem?”

19 Ia nfalak verin ira ne,

“Mia fyalak afakinyai?”

Ba rfalak ne,

“Afaka nkena Yesus i ntali ahu Nazaret yai!

Ia nabi Ia,

ovu Ni vaivatul ra ovu afa ovi notu ra rira ngrebat na'a Ubu wahan ralan a,

ovu tamata ra munuk waharira ralan ra.

20 Mami dawan mela falurut ra ovu mami dawan ra rala roak Ia verin fareta ra ma rfaleka inukun matmatan verin Ia,

beti rbaku Ia na'a aa walwalur.

21 Na'uk lan ana,

amfaklo'i a'uk mami vava'at ra verin Ia ma amnaban ma nma,

boma nfatalik ami tamata Israel ra tali tamata ovi rira sian ami.

Nlia tali inyai,

na ini amar itelu roak,

ntali amar i rfedan Ia yai,

na'uk wol nfatalik ami obin.^*

22 Nlia tali inyai,

na vata ifira tali mami tamata ra rfabriang ami.

Varverak sumatan obin,

na ira rti roak van matmatan yai.

23 Na'uk na'a inyai,

na wol rtuan Yesus tenan a.

Ira rewal ira ma rfaivar verin ami ne,

rsi'ik Ubu Ni sansinir ovi rtali lanit ratan.

Sansinir avyai rfalak ne,

Yesus nva'at ewal roak.

24 Mami kida boku rti vali van matmatan yai.

Ti ma rsi'ik,

na wean lahir i vata avyai rfalak a,

na'uk wol rarea Ia.”

25 Ba Yesus nfalak verin ira ne,

“Hoi,

mia ini byoda urun!

Bira fikiran ra wol ka'i rbana ma lolin,

ma wol myorang munuk afa ovi nabi ra rfalak roak a.

26 Mia musti mkya'a ne,

Raja i ntevut roak tamata rira salasilan ra musti ntuan wawa'uk i dawan urun a veki,

beti nti vanan i nfitik nyadat a.”

27 Nata Yesus nfalyawang verin ira afa ovi rtulis roak na'a Ia na'a Surat Ralan.

Ia nfalyawang lan Ia na'a Musa ni kitab ra,

beti nabi liak rira kitab ra munuk.

28 Ti ma rfaseri roak ahu i rti yai,

na Yesus notu ma felan a wean i mane nbana lia ira.

29 Na'uk rkiwal Ia ma rfalak ne,

“Lera nakduvul ma laflofan roak,

ba itmunuk tna'a ini veki,

tevek mane ovan roak.”

Ba Yesus norang ira ma irmunuk rna'a inyai.

30 Na'ut i ndoku mane nafna'an ovu ira,

na Ia nala lan roti a ma nfalak fara weninyai verin Ubu,

beti nvisul roti yai ma nala verin ira.

31 Na'ut inyai beti rka'a lahir ne,

inyai Yesus.

Na'uk brian munuk,

na wol nleal lahir.

32 Ira ka'i rsifalak afa ma rfalak ne,

“Ita inadida lolin urun na'ut i tna'a linga'an ralan,

ma nangrihi verin ita ovu nfamalik Surat Ralan ihin a verin ita.”

33 Na'ut inyai,

na rewal lahir ira rti Yerusalem.

Raran roak Yerusalem,

na rtuan Yesus Ni tamata vutu rahin isa rasdovu ira ovu rira kida ra.

34 Tamata ovi rasdovu ira yai rfalak ne,

“Kena urun,

Duila'a nva'at ewal roak!

Ia nfavotuk roak Ia verin Simon.”

35 Nata tamata irua yai rfamalik afa i rarea na'ut i rbana na'a linga'an ralan a,

ovu vali wean inba ma rka'a Yesus na'ut i nvisul roti a.

36 Na'ut i Yesus Ni tamata ovi rorang Ia rfamalik afa ovi rarea roak a,

na brian munuk Yesus ndiri fruarira ra,

ma nfalak verin ira ne,

“Fara Ubu notu ma bira vava'at ra malinan watan!”

37 Ira rabrian ovu rbobar,

tevek rnarin ne rsi'ik nitu ngran.

38 Na'uk Yesus nfalak verin ira ne,

“Notu afakinimi byobar,

ovu afaka notu ma ralabira ra raruan?

39 Msyi'ik limang a ovu eang a;

Ini Ya'a!

Mtyeman tenang a ovu msyi'ik Ya'a,

tevek nitu ngran a wol ihin ovu wol lurin wean i msyi'ik na'a tenang a.”

40 Yesus nfalak wean inyai,

beti nfaturu liman a ovu ean a verin ira.

41 Na'uk ira wol rorang urun obin,

tevek rtalkaka ovu inarira urun ma rsi'ik Yesus.

Ba Yesus norat ira ne,

“Bira afamtahan na'a ini te wahal?”

42 Ba ira rala ian tantunun^* etal a verin Yesus.

43 Yesus nala ian yai ma na'an lahir na'a waharira ralan ra.

44 Ia nfalak verin ira ne,

“Ini afa ovi ufalak roak verin mia na'ut i itmunuk obin a.

Ufalak verin mia ne,

afa ovi Musa ntulis roak na'a ni kitab ra,

ovu nabi liak ra rtulis vali roak na'a rira kitab ra,

ovu vali na'a Mazmur,

na irmunuk rfamalik Ya'a.

Ubu nfadoku roak ma afa avyai fiang ini musti rvotuk munuk roak!”

45 Nata Yesus notu ma rira fikiran ra lyawan ma rfan-aran afa ovi rtulis roak na'a Surat Ralan.

46 Yesus nfalak verin ira ne,

“Rtulis roak na'a Surat Ralan ne,

Raja i ntevut tamata rira salasilan ra musti ntuan wawa'uk dawan ma nmata,

ma amar itelu nelak,

beti nva'at ewal tali matmatan.

47 Tamata ra veka rala narang ma ti rfamalik Ubu Ni Ivar Lolin a verin tamata ra munuk,

boma rahil ma rtalik tali rira salasilan ra,

ma Ubu na'i vatuk rira salasilan ra.

Rfamalik lan na'a Yerusalem,

beti rti nuhu ovi rna'a lanit ivavan ini munuk.

48 Mia ka'i msyi'ik lahir afa avyai munuk.^*

49 Ya'a veka ala Ubu Ni Roh a verin mia,

wean lahir Yamang Ni tnorung a verin mia.

Na'uk mia musti mnya'a kota ini veki,

ti naran i Ubu nfangora mia ovu Ni ngrebat a.”

50 Nata Yesus novun Ni tamata ovi rorang Ia ma rti kota Yerusalem murin a.

Ira rbana ma rfaseri ahu isa naran Betania.

Na'a inyai,

na nsikat liman a ma naflahar ira.^*

51 Na'ut i naflahar ira,

na Ia nti talik ira ma Ubu notu ma nrata lahir lanit ratan.

52 Ira munuk rsangatur ma raraning Ia.

Ira ralarira lolin urun,

ma rewal ira rti Yerusalem.

53 Lokat amar,

na ira rti rira Rahan Dawan Falurut ralan a ma rfadawang Ubu.