Yahudi rira mela falurut ra ovu rira dawan ra ranovak mane rukun Petrus irua Yohanes
1 Na'ut i Petrus irua Yohanes rangrihi nulu tamata rivun avyai obin,
na Yahudi rira mela falurut ra ovu tamata i nfareta suldadu ovi rwanar Yahudi rira Rahan Dawan Falurut a,
ovu vali tamata boku tali Yahudi rira sidovung isa naran Saduki,
rma ma rtuan ira.
2 Tamata dawan avyai rangrova urun,
tevek irua rair tamata ra ovu rfalak ne,
Ubu veka nfava'at ewal tamata ovi rmata ra,
wean i nfava'at roak Yesus tali matmatan.
3 Ba ira rtaha Petrus ovu Yohanes ma ti rvatuk ira na'a bu'i ralan.
Ovan roak,
ba rtahang teri ira na'a inyai ma ti naran ilyan.
4 Na'uk tali tamata rivun ovi rarenar afa ovi rair ra,
na rivun ila'a rorang Yesus.
Ira rarekan brana ra,
na ka'a bi rivun ilima rorang roak Yesus.
5 Ni ilyan ana,
Yahudi rira dawan ovi rair Musa ni inukun ra,
ovu dawan Yahudi ra ovu dawan ovi rban-ulu verin ira,
rasdovu ira na'a Yahudi rira sidovung dawan na'a Yerusalem.
6 Rira Mela Falurut Ila'a naran Hanas,
ovu Kayafas,
Yohanes,
Aleksander,
ovu ni tiniman liak ra munuk rdoku sidovung dawan yai.*
7 Ira rovun Petrus irua Yohanes ma rdiri waharira ralan ra,
ma rorat ira ne,
“Mia myotu ma lolin brana laklukut yai ovu ngrebat tali iki,
ovu myala iki naran a ma myotu afa ini?”
8 Ubu Ni Roh nsoru lahir Petrus ralan a ma nfalak ne,
“Dawan Yahudi averi ovu dawan ovi byan-ulu verin ami!
9 Amar ini myera ma amfamalik na'a i wean inba ma amlobang tamata laklukut yai,
ovu vali wean inbinimi tamata yai lolin roak ia.
10 Mane ufalyawang verin mia ovu vali Israel ra munuk ma mkya'a ne,
Yesus Kristus i ntali ahu Nazaret nala ngrebat verin ami ma amotu ma lolin tamata ini ma ndiri wahabira ralan ra.
Mia myotu ma rbaku Yesus na'a aa walwalur,
na'uk Ubu nfava'at ewal Ia.
11 Rtulis roak na'a Surat Ralan ne,
Yesus wean vatu i tukan ra rvatuk.
Mia wean tukan ovi rvatuk vatu yai:
‘Na'uk Ubu nala vatu i byatuk yai ma notu ma wean vatu i fyawan lia munuk ma al nfangrebat rahan yai.’*
12 Yesus a'uk sa'i nsikat ita tali dida salasilan ra,
ma dida vava'at kakiwal.
Ubu wol nfili tamata liak isa vali na'a lanit ivavan ini ma nsikat ita tali dida salasilan ra.”
13 Tamata ovi rna'a sidovung dawan yai rsi'ik roak ne,
Petrus irua Yohanes rabrahi,
ovu rka'a vali ne,
irua wol raskola,
ba rtalkaka.
Ira rka'a ne,
tamata irua ini rorang lalawatan Yesus.
14 Na'uk tamata avyai wol bisma rfalak afakataka,
tevek tamata i Petrus irua Yohanes beti rotu ma lolin ia yai ndir-ebang ira.
15 Ba rfareta Petrus ovu Yohanes ma rti sidovung dawan murin a,
boma tamata avyai rfamalik ewal ira.
16 Ba rsiorat ira ne,
“Ita veka totu aka verin tamata irua ini?
Tamata ra munuk na'a Yerusalem rka'a roak ne,
tamata irua yai rotu mujizat i betfasa tamata ra rarea,
ba rtalkaka.
Wol talak nala roak ita na'a mujizat yai.
17 Na'uk totu ma tamata liak wol rarenar mujizat i rfamalik yai,
ba eka tfalak teri ira,
boma deka rfamalik Yesus verin tamata ra.”
18 Ba rera ewal Petrus irua Yohanes ma rti ralan,
ma rfareta ira boma deka rfamalik te rair ewal Yesus verin tamata ra.
19 Na'uk Petrus irua Yohanes rfalak ne,
“Eka fyanovak watan na'a ralabira ra ne,
afaka kena na'a Ubu wahan ralan a:
ami amorang afa ovi fyalak ra,
te amorang Ia.
20 Ami wol bisma amtalik ma amfamalik afa ovi amsi'ik ovu amrea roak.”
21 Ira wol rdav-nala linga'an mane rukun Petrus irua Yohanes,
tevek tamata ra munuk na'a inyai rfadawang Ubu na'a afa i tamata irua ini rotu a.
Ba ral-ewal vaivatul aleman al rfabobar ira,
beti rfatalik ira.
22 Tamata ra munuk rka'a roak ne,
Ubu notu mujizat,
tevek tamata laklukut i beti rotu ma lolin ia ini,
ni varat vutfa'at rahin roak.
Yahudi rira Mela Falurut Ila'a ovu rira dawan ra rala vaivatul aleman al rtabu Petrus ovu Yohanes (Kisah 4:21)
Tamata ovi rorang Yesus rera ma Ubu nfangrebat tenarira ra
23 Ti ma rfatalik roak Petrus irua Yohanes,
na rewal ira rti ma rtuan rira kida ra.
Ba rfamalik munuk afa ovi Yahudi rira dawan mela falurut ra ovu dawan Yahudi ra rfalak verin ira.
24 Ti ma rira kida ra rarenar afa ovi rfalak ra,
na irmunuk ralarira isa ma rera verin Ubu ne,
“Duila'a,
Oa sa'i fwareta afakataka munuk.
Oa motu lanit ivavan a ovu lanit ratan.
Oa motu vali tahat ovu afa ovi rna'a ralan.
25 Ubumam-nusimami Raja Daud nkarya verin Oa,
ba lalan ana,
fwalak ma Mu Roh notu ma Daud nfalak ne,
‘Notu afakinimi bangsa ovi wol Yahudi ra rangrova ma dawan i?
Afaka notu ma tamata ra rvolan ma rotu afa ovi wol ihir lahir?
26 Raja ovi rna'a lanit ivavan rasusan warira mane rotu rihi,
ovu vali mela dawan ra rasdovu ira ma ra'an vai isa ma rangal Duila'a ovu Ni Raja i ntevut dida salasilan ra.’*
27 Daud nfalak kena,
tevek Raja Herodes irua gubernur Pontius Pilatus rasdovu roak tamata Israel ra ovu ovi wol Israel ra na'a Yerusalem,
mane rangal Yesus,
Mu Sansinir i nmerat urun.
Oa fwili roak Ia ma neluk Raja i ntevut dida salasilan ra.
28 Duila'a,
Oa sa'i mungrebat,
ba ira rot-nala watan afa ovi ralam nfalak roak ma rotu.
Oa bwolan roak ma rotu afa avyai.
29 Duila'a,
amera verin Oa ma mrenar ovu msi'ik ira!
Ira rworuk-rwak ami,
ba mlobang ami,
boma ralamami dawan ma amfamalik ma lolin Mu vaivatul ra,
tevek amkarya verin Oa.
30 Mala Mu ngrebat,
boma tamata ovi rira suhut ra veka lolin ewal ira.
Fara motu wean inyai,
tevek Yesus,
Mu sansinir i nmerat urun a,
veka notu ma amotu vali mujizat ra ovu faneak ovi tamata ra wol rot-nala.”
31 Ti ma raflurut munuk,
na ruru na'a wan i rasdovu ira na'a yai.
Ubu Ni Roh nsoru lahir ralarira ra,
ba wol rbobar ma rfamalik Ubu Ni vaivatul ra.
Tamata ovi rorang Yesus rsilobang ira
32 Tamata ovi rorang Yesus munuk ralarira isa,
ba wol tamata isa tali ira nafena ma nala ni metan ra verin rira sidovung.
33 Ubu nala ngrebat dawan verin rasul ra ma rfamalik ne,
Ia nfava'at ewal Duila'a Yesus tali matmatan,
ba Ubu naflahar ma dawan tamata ovi rorang Ia.
34 Wol tamata isa tali ira kasian ia,
tevek amar boku,
na tamata ra rfedi rira rahan te lanun ra ma rala kubang avyai
35 verin rasul ra.
Nata rtanang kubang avyai ma inovan ovu afa ovi tamata ra rperlu.