1 Na'ut inyai,

na tamata ovi rorang Yesus ntafal lalawatan ma rivun ira.

Boku tali ira rala a'uk vai Yunani,

na'uk etal dawan rala vai Ibrani.

Tamata ovi rala vai Yunani rafngamu'ur,

tevek lokat amar,

na tamata ovi rala vai Ibrani rtanang afamtahan verin varu ra,

na'uk tamata ovi rala vai Yunani rfalak ne,

wol rala afamtahan verin rira varu ra.

2 Ba rasul vutu rahin irua yai rasdovu munuk tamata ovi rorang Yesus,

ma rfalak verin ira ne,

“Wol kena ma amtanang afamtahan verin varu ra,

tevek wean inyai,

na wol mami amar roak ma amair ovu amfamalik Ubu Ni vaivatul ra.

3 Ba teramam-valimami averi,

eka fyili tamata^* ifitu tali bir tinemun.

Fyili tamata ovi mkya'a roak ne,

Ubu Ni Roh nsoru lahir ira,

ovu rira kaka'a dawan,

boma amala varvara ini verin ira.

4 Wean inyai bi ralamami isa ma amaflurut verin Ubu,

ovu amfamalik watan Ni vaivatul ra.”

5 Rira tinemun inar,

ba rtorung afa ovi rasul ra rfalak.

Ira rfili tamata isa naran Stefanus i ni inorang nangrebat,

ovu Ubu Ni Roh nsoru lahir ia.

Ira rfili vali Filipus,

Prokhorus,

Nikanor,

Timon,

Parmenas,

ovu isa ntali Antiokhia naran Nikolaus.

Ia wol Yahudi ia,

na'uk norang Yahudi rira agama.^*

6 Ira rovun tamata ifitu yai ti verin rasul ra,

ba rasul ra rfadoku limarira ra na'a tamata ifitu yai,

beti raflurut verin ira.

7 Ba tamata ovi rorang Yesus ti rfamalik Ubu Ni vaivatul ra verin tamata rivun.

Tamata ovi rorang Yesus na'a Yerusalem ntafal ma rivun ila'a.

Yahudi rira mela falurut ra,

rivun vali ira rorang Yesus.

8 Ubu naflahar ma dawan Stefanus,

ba nkarya ovu Ni ngrebat ma notu mujizat dawan ra ovu faneak^* dawan ovi tamata ra wol rot-nala na'a tamata rivun waharira ralan ra.

9 Na'uk Yahudi boku rangal vali ia.

Ira rtali Yahudi rira rahan falurut i naran “Libertini.”

^* Yahudi avyai rtali kota Kirene ovu kota Aleksandria,

boku vali rtali propinsi Kilikia ovu propinsi Asia.

Ira rsisoal ira ovu Stefanus,

10 na'uk wol rvalat nala afa ovi nfalak ra,

tevek Ubu Ni Roh nala kaka'a dawan verin ia ma nangrihi ma lolin buas.

11 Ba rangrihi fanfonak verin tamata ifira ma rala ralarira ra,

ma tamata avyai rfalak ne,

“Ami amrenar lahir i Stefanus near nfasoba Musa ovu Ubu!”

12 Rotu wean inyai,

na rfakeri tamata Yahudi ralarira ra,

dawan Yahudi ra ovu rira dawan ovi rair Musa ni inukun ra.

Ba rti ma rtaha Stefanus ma rovun ia ti ndiri Yahudi rira sidovung dawan waharira ralan ra.

13 Ira rera tamata boku ma rti sidovung dawan ma rala vaivatul siklabir ma rfalak sian Stefanus.

Tamata avyai rfalak ne,

“Tamata ini nfalak sian lalawatan dida Rahan Dawan Falurut.

Ia nfalak sian vali inukun ovi Ubu nala verin Musa.

14 Ami amrenar roak ia nfalak ne,

Yesus i ntali ahu Nazaret yai veka na'ar vatuk Rahan Dawan Falurut ini,

ovu veka nkati vali adat ovi Musa nfadoku verin ami.”

15 Rfalak munuk wean inyai,

na tamata ovi rdoku Yahudi rira sidovung dawan yai munuk rsi'ik nanuang Stefanus,

na wahan a wean Ubu Ni sansinir ntali lanit ratan.