Tamata ovi rorang Yesus rsinir Barnabas ovu Saulus ma ti rfabana karya ovi Ubu nala verin ira
1 Sidovung tamata ovi rorang Yesus na'a Antiokhia ni nabi boku,
ovu tamata boku vali rair Surat Ralan verin tamata ra.
Nararira ra:
Barnabas,
Simeon i nangtoan,
Lukius i ntali kota Kirene,
Saulus ovu Menahem i lan ana irua Raja Herodes Antipas dawan ira na'a rahan isa.
2 Amar isa,
na tamata ovi rorang Yesus raraning Duila'a ovu rtolat,
ma Ubu Ni Roh nfalak verin ira ne,
“Fyili watan Barnabas ovu Saulus verin Ya'a,
boma ti rfabana karya i ufadoku roak verin ira.”
3 Ira rtolat ovu raflurut munuk roak,
na rfadoku limarira ra na'a ira,
beti rsinir ira ma rti.
Barnabas irua Saulus rfamalik Ubu Ni Ivar Lolin na'a Siprus
4 Ubu Ni Roh nsinir Barnabas irua Saulus ma rti kota Seleukia.
Rtali inyai,
na ravul kabal lar ma robal rti nuhu isa naran Siprus.
5 Ba ti raran kota Salamis,
na rfamalik Ubu Ni vaivatul ra na'a Yahudi rira rahan falurut ra.
Yohanes i rfanara vali ia ne Markus,
norang vali ma nlobang ira.
6-8 Ira rban-lilit lahir nuhu yai ma ti raran kota Pafos.
Na'a inyai,
na rtuan tamata Yahudi isa naran Baryesus,
na'a vai Yunani naran Elimas.
Ia ba'i ntaha afa te notu ni afnitu ra al nlabir waweang tamata ra,
ovu nsiklabir ma nfalak ne nabi ia.
Ia notu kida ovu nuhu yai ni gubernur naran Sergius Paulus.
Gubernur yai ni kaka'a dawan ma nera Barnabas irua Saulus,
tevek inan ma nrenar Ubu Ni vaivatul ra.
Na'uk Elimas i ntaha afa te notu ni afnitu ra,
nangal teri ira,
boma gubernur yai deka norang Yesus.
9 Na'uk Ubu Ni Roh nsoru lahir Saulus i rfanara vali ia ne Paulus,
ma nsi'ik nanuang Elimas,
10 ma nfalak ne,
“Oa nitdawan yanan oa,
ba mangal teri lalawatan afa ovi kena ra,
ovu mlabir tia ma watan tamata ra.
Duila'a Yesus Ni afa ovi notu ra rmalola,
na'uk inam ma fwakiluk afa avyai.
11 Eka msi'ik kikyai,
Duila'a veka nukun oa ma mkibu,
ma amar ifira nelak wol mrea lera vanan a!”
Paulus nfalak munuk wean inyai,
na brian munuk lova nteri matan a ma wol nsirea,
ma nbana nteman tia ma watan al ndava tamata ma nfabana ia.
12 Gubernur yai nsi'ik afa yai,
ba norang lahir Yesus.
Ia ntalkaka,
tevek rala ngrebat tali Ubu al rair Duila'a verin tamata ra.
Paulus nfamalik Ubu Ni Ivar Lolin a na'a kota Antiokhia
13 Paulus ovu ni kida ra rban-talik Pafos ma ravul kabal lar isa ma robal rti kota Perga na'a propinsi Pamfilia.
Na'uk Yohanes Markus nban-talik ira ma newal ia nti Yerusalem.
14 Ira rban-talik Perga ma rti raran kota Antiokhia i na'a propinsi Pisidia.
Nata ti naran amar i Yahudi ra ryari ira,
na rti ma rdoku rira rahan falurut ralan a.
15 Tamata isa nbas tali Ubu Ni inukun ovi Musa nfadoku na'a ni kitab ra,
ovu vali tali nabi rira kitab ra.
Ti ma nbas munuk roak,
na dawan ovi rna'a rahan falurut yai rsinir tamata isa ma nfalak verin ira ne,
“Tamata Yahudi averi,
amera verin bir tinemun ne,
wean i bira snurak lolin boku ma myala verin tamata ovi rna'a ini,
na fyalak verin ira.”
16 Paulus ndiri ma nala liman a ma al notu faneak ma deka vair,
beti nfalak verin ira ne,
“Terang a valing Israel averi ovu tamata ovi wol Israel mia na'uk myorang Ubu,
eka mryenar ma lolin afa ovi ufalak ra!
17 Lalan a Ubu i Israel ra ba'i raraning Ia nfili roak ubud-nusid ra,
ovu notu ma rivun ila'a ira na'ut i rleal Mesir.
Ubu novun ira ovu Ni ngrebat a ma rdir-talik Mesir.
18 Varat vutfa'at,
na Ia ntahang watan ralan verin ira na'a rira afa ovi rotu ra na'a wan lean vu dawan.
19 Ubu novun Israel ra ma rot-visal bangsa ifitu na'a Kanaan,
beti nala lanun yai verin ira,
boma rira lanun yai.
20 Varat ratut ifa'at vutlima,
na rotu munuk afa avyai.
Nata Ubu nfili tamata dawan boku ma rfareta ira,
ma ti naran na'ut i nabi Samuel nva'at a,
na tamata avyai rfareta Israel ra.
21 Israel ra rera verin Ubu ma nala raja isa ma nfareta ira.
Ba Ubu nala Saul i yaman a naran Kish verin ira ma nfareta ira varat vutfa'at.
Kish ini ubun-nusin ra rtali Yahudi rira arun dawan i naran Benyamin.
22 Ba ti ma Ubu nfasuka Saul tali ni fareta,
na nsikat Daud ma notu raja verin ira.
Ubu nfamalik na'a Daud ne,
‘Ya'a urea roak Isai yanan i naran Daud a.
Ya'a inak urun ia,
tevek ni vava'at nfakena lahir afa ovi ralang nfalak ra.’
23 Tali Daud ubun-nusin ra,
na Ubu nala Yesus verin Israel ra ma nsikat ira tali rira salasilan ra,
ma rira vava'at kakiwal.
Ubu notu wean inyai al nfakena Ni tnorung yai verin Daud.*
24 Yesus wol nfabana Ni karya obin,
na Yohanes nfalak roak verin Israel ra ma rahil ma rtalik tali rira salasilan ra,
boma nbaptis ira.
25 Sarseri ma Yohanes notu munuk ni karya a,
na norat ira ne,
‘Tali bir tinemun,
na minovak ne ya'a ini iki?
Ya'a wol weang Raja i ntevut dida salasilan ra!
Mingnanang ma lolin afa ini,
tevek ya'a uma lan ma ufavotuk verin mia ne,
Ia veka nma.
Wol inovan lahir ma aling ni tatea a,
tevek ya'a wol verang a ratang Ia.’
26 Eka mryenar ta terang a valing ovi ububir-nusibira verin Abraham,
ovu ovi wol Yahudi mia,
na'uk myorang Ubu!
Ia nala roak verin ita ivar i nfamalik ne,
wean inba ma nsikat ita tali dida salasilan ra,
ma dida vava'at kakiwal.
27 Tamata Yahudi ovi rna'a Yerusalem ovu rira dawan ra wol rka'a ne,
Yesus yai Tamata i nabi ra rfamalik lan roak.
Lokat amar i ryari ira,
na rbas vaivatul ra tali nabi ra,
na'uk wol rfan-aran.
Ira rukun Yesus ma nmata,
ba rfakena vaivatul avyai.
28 Velik ne wol rtuan sala isa vali na'a Yesus ma rukun Ia,
na'uk rera roak verin gubernur Pilatus ma ni suldadu ra rfedan Ia.
29 Ba rfakena munuk roak afa ovi lan a rfadoku na'a Surat Ralan a,
beti rfasuka tenan a tali aa walwalur ma rfanuba Ia na'a van matmatan isa ralan.
30 Na'uk Ubu nfava'at ewal Ia tali matmatan.
31 Nata Yesus nfavotuk Ia na'a amar rivun verin tamata ovi rban-orang Ia tali Galilea,
ma irmunuk rti Yerusalem.
* Fiang ini tamata avyai rfamalik Yesus verin Yahudi ra.
32,33 Ba amfalak ivar lolin ini verin mia.
Ubu nfakena munuk roak Ni tnorung i lalan a nfalak verin ubud-nusid ra,
ma nfava'at ewal Yesus.
Mazmur pasal irua nfalak wean ini,
*
‘Ya'a Yanak Oa!
Amar ini lahir,
ufalak verin Oa ne, Yamam Ya'a.’
34 Ubu nfava'at ewal roak Ia tali matmatan,
ba Ia veka wol nmata roak.
Ubu nfavotuk afa yai nahu Ni vaivatul ovi ne:
‘Ya'a veka ufakena lahir Ning tnorung ovi rmerat urun verin Oa.
Tnorung avyai lalan a ufalak roak verin Daud.’*
35 Daud nfamalik vali na'a Mazmur liak ma nfalak verin Ubu ne,
‘Oa veka wol mtorung ma Mu Tamata i nmerat urun yai tenan a nakvisal.’*
36 Daud notu munuk roak afa ovi Ubu ralan nfalak ma notu na'ut i nva'at obin,
nata ti naran i nmata,
ma ti rfadok-ebang ia ovu ubun-nusin ra,
ba tenan nakvisal munuk.
37 Na'uk Yesus i Ubu nfava'at ewal Ia tali matmatan yai,
tenan a wol nakvisal.
38,39 Ba terang a valing averi,
mia musti mkya'a ne,
ami amfamalik ne,
Ubu sa'i na'i vatuk dida salasilan ra,
tevek Yesus nmata verin ita.
Tamata iki watan norang Yesus,
na Ubu veka na'i vatuk ni salasilan ra vali.
Mia myorang Musa ni inukun ra,
na'uk inukun avyai wol ra'i vatuk nala bira salasilan ra.
40 Ba msyi'ik wabira ma lolin,
boma afa ovi nabi ra rfadoku roak na'a rira kitab ra deka rkena mia:
41 ‘Eka mryenar ma lolin!
Mia tamata ovi fyalak sian Ya'a.
Mia veka mtyalkaka lahir ma myata!
Tevek fiang ini,
na Ya'a veka otu afa isa,
na'uk mia wol myorang,
velik ne tamata isa nfalyawang roak verin mia.’ ”*
42 Paulus irua Barnabas rsilyaha tali Yahudi rira rahan falurut,
na tamata ra rasweang ira ma rfamalik ewal afa avyai verin ira,
na'ut amar i veka nma ma Yahudi ra ryari ira.
43 Ti ma tamata ra rsilyaha munuk roak tali rira rahan falurut a,
na tamata Yahudi rivun,
ovu vali ovi wol Yahudi ira na'uk rorang Yahudi rira agama,
rban-orang Paulus ovu Barnabas.
Ba rasul irua ini rangrihi al rsurak ira ma rorang lalawatan Ubu i nlobang ita,
ovu nala Ni rala lolin verin ita.
44 Ba amar i Yahudi ra ryari ira nma ewal,
na tamata ovi rna'a kota yai labir mane munuk lahir rasdovu ira ma rarenar Ubu Ni vaivatul ra.
45 Ti ma Yahudi ra rsi'ik tamata rivun avyai,
na ralarira sian urun Paulus,
ba rangrihi ma rworuk-rwak ia ovu wol rtorung afa ovi nfalak ra.
46 Na'uk Paulus irua Barnabas rabrahi watan ma rfalak verin ira ne,
“Ubu nfareta ma amfamalik lan Ni vaivatul ra verin mia,
tamata Yahudi ra,
na'uk mifena ma myorang.
Mifena,
ba mia ka'i fyaturu ne,
wol inovan ma bira vava'at kakiwal ovu Ubu.
Ba wean inyai bi amban-talik mia ma amati watan tamata ovi wol Yahudi ra.
47 Amotu wean inyai,
tevek Ubu nfareta ami ma nfalak ne,
*
‘Ya'a ufadoku roak mia ma myeluk lyawan verin tamata ovi wol Yahudi ira,
boma mia veka fyamalik verin tamata ra na'a lanit ivavan a munuk ne,
wean inba ma Ya'a veka usikat ira tali rira salasilan ra, ma rira vava'at kakiwal.’ ”
48 Ba tamata ovi wol Yahudi ira rarenar afa avyai,
na inar lolin ma rfadawang Ubu,
tevek Ni vaivatul ra na'a Yesus.
Tamata ovi Ubu nfili roak ira ma rira vava'at kakiwal,
rorang Ni vaivatul ra.
49 Ba Ubu Ni vaivatul ra ti rsoru munuk wan yai.
50 Na'uk Yahudi ra rfakeri vata mela boku ovu rira dawan boku na'a kota yai,
ralarira ra.
Vata ovi wol Yahudi ira,
na'uk ralang Ubu.
Ira rotu wean inyai ma rwi-rwa Paulus irua Barnabas,
ma rala'ing ira tali inyai.
51 Ba irua rasnabar vatuk kyavu tali earira ra ma al rtabu ira,
beti rban-talik ira ma rti kota Ikonium.*
52 Tamata ovi rorang Yesus na'a Antiokhia ralarira lolin urun,
ovu Ubu Ni Roh nfangrebat ira.