Timotius ntuan Paulus irua Silas ma norang lahir ira
1 Paulus irua Silas rti lan kota Derbe,
beti rti kota Listra.
Tamata isa i norang Yesus naran Timotius nana'a inyai.
Renan Yahudi ia ma norang roak Yesus,
na'uk yaman a tamata Yunani ia.
2 Tamata ovi rorang Yesus na'a Listra ovu kota Ikonium rfalak ne,
Timotius tamata lolin ia.
3 Paulus inan ma Timotius novu vali ma irmunuk,
ba rsunat ia,
tevek Yahudi ovi rna'a wan yai rka'a ne,
Timotius yaman ntali Yunani.*
4 Nata rtali ahu isa rti ahu isa ma rsurak tamata ovi rorang Yesus.
Ira rfamalik verin ira na'a afa ovi rasul ra ovu dawan kareda ovi reluk penatua na'a Yerusalem rfadoku roak a,
boma sidovung tamata ovi rorang Yesus rot-orang.*
5 Ba amar nkati amar,
na sidovung tamata ovi rorang Yesus rira inorang ntafal ma nangrebat,
ovu vali ntafal ma rivun ira.
Paulus wean i namifi na'uk wol ntub-lufa na'a kota Troas
6 Ubu Ni Roh notu teri ma Paulus irua Silas deka rfamalik Ni Ivar Lolin na'a propinsi Asia,
ba irua rbana rti propinsi Frigia ovu propinsi Galatia.
7 Ti raran propinsi Misia ni elat ratan a,
mane rti propinsi Bitinia,
na'uk Yesus Ni Roh notu teri ma deka rti inyai.
8 Ba rban-etal Misia ma rti lahir kota Troas.
9 Ni ovan ana,
Paulus wean i namifi na'uk wol ntub-lufa ma nrea ne,
brana isa ntali propinsi Makedonia ndiri wahan ralan a,
ma nera ovu ralan urun ne,
“O baba,
eka mwa Makedonia ma mlobang ami.”
10 Paulus wean i namifi munuk,
na amasusan wamami ma amban-talik lahir wan yai ma amati Makedonia,
* tevek amka'a ne,
Ubu nera ami ma ti amfamalik Ni Ivar Lolin verin tamata ovi rna'a ineri.
Lidia norang vali Yesus
11 Amavul kabal lar isa na'a Troas ma amobal amati lahir nuhu isa naran Samotrake,
ma ni ilyan ana,
amati kota Neapolis.
12 Tali inyai,
na amati kota dawan isa naran Filipi na'a propinsi Makedonia.
Tamata Roma rivun rleal kota yai,
ovu amna'a inyai amar ifira vali.
13 Naran amar i ami tamata Yahudi amyari ami,
na amahu kota ni falfolat ila'a i na'a ni fidu ma amati oar isa nelan,
tevek amanovak ne,
tamata ra rasdovu ira ma raflurut na'a inyai.
Ba amdoku ma amangrihi ovu vata ovi rasdovu ira na'a inyai.
14 Tali vata avyai,
na isa ntali kota Tiatira naran Lidia.
Ia nfedi maloli ungu.
Vata yai ba'i nraning Ubu.
Ba na'ut i nrenar afa ovi Paulus nfalak ra,
na Duila'a notu ma ralan natvelar ma ntorung afa avyai.*
15 Ira rbaptis ia ovu ni rahan teta a.
Nata vata yai nera verin ami ne,
“Ning kida averi,
wean i mkya'a roak ne,
ya'a orang urun Duila'a Yesus,
na mya ma milola ami na'a ning rahan veki.”
Ia nkiwal nala ami ma amna'a ni rahan.
Ra'abu'i Paulus irua Silas na'a Filipi
16 Amar isa,
na mane amati wan falurut i na'a oar nelan yai,
na amtuan vata sansinir isa.
Vata yai nait sian nleal ia,
ma notu ma nanovak nala afa ovi veka rvotuk na'a amar ovi veka rma.
Vata yai notu ma duan ra rira kubang a dawan,
tevek tamata ra rbahir ia ma nfalak afa ovi veka rkena ira.
17 Vata yai norang lalawatan Paulus ovu ami ma nafwak ne,
“Brana ovi rkarya verin Ubu i Ni dawan nlia munuk afakataka.
Ira rfamalik ne,
wean inba ma Ia veka nsikat mia tali bira salasilan ra,
ma bira vava'at kakiwal!”
18 Amar ifira lahir vata yai nafwak wean inyai,
ba ti nata Paulus wol ntahang nala roak,
ba nfulak ia ma nfalak verin nait sian yai ne,
“Ya'a ala Yesus Kristus naran ovu Ni ngrebat,
ma ufareta oa ma muti talik vata ini!”
Na'ut inyai lahir,
na nait sian yai nti talik ia.
19 Vata yai duan ra rka'a roak ne,
wol rdav-nala roak kubang tali ia.
Ba rtaha Paulus irua Silas ma rlia soli-sasan ira rti wan i rfedi-rfaha afa na'a,
ma rdiri dawan fareta waharira ralan ra.
20 Ba vata yai duan ra rtaha roak Paulus ovu Silas verin Roma rira dawan fareta ra ma rfalak ne,
“Tamata irua ini Yahudi ira.
Rma ma rotu ma vangoa-vanga na'a dida kota a!
21 Ira rair tamata ra ma rot-orang rira adat ovu inukun ovi wol kena ovu ita,
tamata Roma,
dida adat ovu inukun ra!
Ba deka torang rira adat ra!”
22 Tamata rivun rdiri vali ma rangal Paulus irua Silas.
Dawan fareta avyai rfareta rira tamata ra ma raling irua rira kadaravit ra,
beti rala navnaval ra ma al rvaval ira.
23 Rvaval ma dawan roak ira,
beti rovun ira ma ti rvatuk ira na'a bu'i ralan.
Nata rfareta tamata dawan i nfareta bu'i ma nsi'ik ma lolin ira.
24 Tamata yai norang afa ovi ni dawan ra rfalak verin ia,
ba nvatuk lahir ira na'a bu'i ralan,
beti nala kakeak tma'an al ndadul earira ra na'a liri dawan ra.
25 Ka'a bi nafafruan tenan,
na Paulus irua Silas raflurut ovu rdedang ma al raraning Ubu.
Tamata liak ovi ra'abu'i roak ira na'a inyai rarenar vali.
26 Brian munuk,
na ruru dawan urun i lahir,
ma bu'i yai nawelu ma ti naran ni fanderen a.
Falfolat ra munuk ratvadil lahir ovu kakeak tma'an ra munuk rablewar ma rleka tali tamata ovi rna'a bu'i ralan.
27 Dawan i nfareta bu'i yai nbatar ma nsi'ik,
na falfolat ra ratvadil roak,
ba ntavar ni nahin blawat mane nfedan tenan,
tevek nanarin ne,
tamata ovi rna'a bu'i ralan rafla munuk roak.
28 Na'uk Paulus nafwak ma vain dawan ma nfalak ne,
“Deka fwedan tenam a!
Ami amna'a munuk ini obin!”
29 Tamata dawan yai nera ma rala ulu isa,
ma nafla ovu ulu yai nti ralan.
Nti naran,
na tenan a raruru ma nsangatur nulu Paulus irua Silas.
30 Nata novun ira rti murin ma norat ne,
“Baba averi,
ya'a musti otu afaka,
boma Ubu nsikat ya'a tali ning salasilan ra,
ma ning vava'at kakiwal?”
31 Ira rfalak verin ia ne,
“Morang Duila'a Yesus Kristus,
boma Ia veka nsikat oa tali mu salasilan ra,
ma mu vava'at kakiwal,
oa ovu vali mu rahan teta!”
32 Nata ira rfamalik Ubu Ni vaivatul ra verin ia ovu tamata ovi rna'a ni rahan a munuk.
33 Nafafruan tenan yai vali,
na dawan i nfareta bu'i yai novun irua ma nfamerat rira mngala ra.
Nata rbaptis lahir ia ovu ni rahan teta munuk.
34 Rbaptis munuk ira,
beti novun Paulus irua Silas rti ni rahan ma nfa'an ira.
Ia ovu ni rahan teta inar lolin,
tevek rorang roak Ubu.
35 Ni ilyan varverak a,
na Roma rira dawan fareta ra rsinir rira tamata ra rti ma rfalak verin dawan i nfareta bu'i yai ne,
“Fwatalik kikyai tamata irua yai!”
36 Ba dawan i nfareta bu'i yai nfalak ivar yai verin Paulus.
Ia nfalak ne,
“Baba averi,
dawan fareta ra rfalak roak ma ufatalik mia,
ba myewal mia kikyai ovu byana ma lolin.”
37 Na'uk Paulus nfalak verin dawan fareta rira tamata avyai ne,
“Ya'i yo,
ami tamata Roma ami,
* na'uk wol fyaleka inukun verin ami obin,
na rvaval ma dawan roak ami na'a tamata rivun waharira ralan ra,
nata rvatuk ami ti bu'i ralan ma rdadul ami.
Ira mane rfareta ami ma amban-talik wan ini,
na'uk rfonak ma tamata ra deka rka'a.
Wol kena lahir!
Eka msyinir dawan fareta avyai ma ka'i rma ma rfatalik ami!”
38 Roma rira dawan fareta ra rira tamata ra ti rfamalik afa ini verin ira,
ba rarenar ne Paulus irua Silas tamata Roma ira,
na rbobar urun,
tevek wol rot-orang Roma rira inukun ra.
39 Ba rti ma rera verin Paulus irua Silas ma rabun afa sian ovi rotu verin ira.
Nata rovun irua tali bu'i ralan ma rera ovu ralar urun verin ira,
ma rban-talik kota yai.
40 Paulus irua Silas rban-talik roak bu'i yai ma rti Lidia ni rahan.
Na'a inyai,
na rtuan tamata ovi rorang Yesus,
ba irua rsurak ira,
boma rira inorang deka kako'u,
beti rban-talik ira.