Paulus nsiair na'a Korintus
1 Nata Paulus nban-talik kota Atena ma nti kota Korintus.
2 Na'a inyai,
na ntuan tamata Yahudi isa naran Akwila,
ntali propinsi Pontus.
Ia ovu awan naran Priskila beti rtali Italia rma Korintus,
tevek Kaisar Klaudius nfareta ma Yahudi ra munuk rdir-talik kota Roma.
Paulus ti nalola ira.
3 Nata nleal inyai ma nkarya ovu ira,
tevek ira munuk rotu afwatan ulin na'a befak ma al rdava kubang.
4 Lokat amar i Yahudi ra ryari ira,
na Paulus nti Yahudi rira rahan falurut ma nfamalik ni inorang a.
Paulus nfamalik Ubu Ni vaivatul ra verin tamata Yahudi ra ovu ovi wol Yahudi ra,
ma ndava ralarira ra ma rorang Yesus.
5 Silas irua Timotius rtali propinsi Makedonia rma vali,
ba Paulus wol notu befak roak.
Ia nala munuk ni amar ra ma al nfamalik Ubu Ni vaivatul ra verin Yahudi ra ne,
Yesus yai Raja i ntevut dida salasilan ra.
6 Na'uk tamata Yahudi ovi rna'a inyai rangal Paulus ma rfalak sian ia,
ba nasyaruk vatuk kyavu tali ni kadaravit ma notu faneak ne,
sala ira.
Ia nfalak verin ira ne,
“Amar isa,
na Ubu veka nukun mia ma ka'i byara bira salasilan ra!
Ya'a wol ning varvara roak verin mia,
ba tali amar ini,
mane uti ma ufamalik Ubu Ni Ivar Lolin verin tamata ovi wol Yahudi ra.”
7 Ba Paulus nban-talik ira ma ti nsiair na'a rahan i nebang rahan falurut yai.
Tamata i ni rahan yai naran Titus Yustus.
Ia wol Yahudi ia,
na'uk nraning vali Ubu.
8 Tamata dawan isa naran Krispus nfareta rira rahan falurut.
Ia ovu ni rahan teta,
ovu vali tamata Korintus rivun,
rarenar afa ovi Paulus nfalak ra ma rorang Duila'a Yesus,
beti rbaptis ira.
9 Ovan isa,
na Paulus wean i namifi na'uk wol ntub-lufa ma nrenar Duila'a nfalak verin ia ne,
“Deka bwobar ta baba!
Fwamalik lalawatan Ning vaivatul ra ma deka mtalik.
10 Tevek ovun oa,
ba wol tamata isa vali veka nkena tenam a ma notu sian oa,
tevek Ning tamata rivun na'a kota ini.”
11 Ba Paulus nleal Korintus varat isa vulan inean,
ma nair Ubu Ni vaivatul ra verin tamata ra.
12 Na'ut inyai,
na tamata isa naran Galio nfareta propinsi Akhaya,
ovu tamata Yahudi ra ra'an vai isa ma rtaha Paulus ma rti wan i ba'i rfaleka inukun verin tamata ra.
13 Ira rfalak verin Galio ne,
“Tamata ini nair tamata ra ma raraning Ubu,
na'uk afa ovi nair ra rangal Musa ni inukun ra!”
14 Paulus mane nangrihi,
na Galio nfalak lan roak verin tamata Yahudi ra ne,
“O tamata Yahudi averi!
Wean i myangadu tamata ini,
tevek ni sala maraan te sala aleman,
ki unaban ma urenar mia.
15 Na'uk vaibira na'a bira adat a,
vaivatul ra ovu tamata nararira ra,
ba mia ka'i myotu ma lolin watan.
Ufena ma ufaleka inukun na'a afa avyai!”
16 Ba Galio nfalak ma rala'ing vatuk ira tali wan i ba'i rfaleka inukun na'a yai.
17 Ira rtaha lahir Sostenes i nfareta Yahudi rira rahan falurut a,
ma rvaval ia na'a Galio wahan ralan a,
na'uk Galio wol nkamlabir.
Paulus newal ia nti Antiokhia
18 Paulus mnanat vali ia na'a Korintus,
beti nti talik tamata ovi rorang Yesus na'a inyai.
Irmunuk Priskila ovu Akwila rti kota isa naran Kengkrea,
ma Paulus nacukur lahir ni vut ma nfaturu ne,
nfakena roak ni tnorung verin Ubu.
* Nata rarata kabal lar ma robal rti propinsi Siria.
19 Ti ma raran kota Efesus,
na Paulus nsuta ma nban-talik Priskila ovu Akwila,
ma nti Yahudi rira rahan falurut isa ma ia ovu tamata Yahudi ra rsisoal ira.
20 Ira rera ma Paulus mnanat ia na'a inyai,
na'uk nafena.
21 Mane nban-talik ira,
na nfalak ne,
“Wean i Ubu ralan nfalak,
na ki uma ewal.”
Nfalak munuk wean inyai,
beti nrata ewal kabal lar ma nti talik Efesus.
22 Kabal lar yai ti naran kota Kaisarea,
na Paulus nsuta ma nra Yerusalem,
ma ntuli tamata ovi rorang Yesus na'a inyai,
beti nti Antiokhia.
23 Ti naran Antiokhia,
na ni amar ifira vali na'a inyai,
beti ntali ahu isa nti ahu isa na'a propinsi Galatia ovu propinsi Frigia,
ma nalola tamata ovi rorang Yesus na'a inyai ma nfangrebat rira inorang a.
Apolos nfamalik Ubu Ni vaivatul ra verin tamata ra
24 Na'ut inyai,
na tamata Yahudi isa naran Apolos,
rarali ia na'a kota Aleksandria.
Ia beti naran kota Efesus.
Ia nka'a nangrihi ma lolin,
ovu nka'a ma lolin Surat Ralan ihin a.
25 Rair roak ia ma nka'a Duila'a Yesus Ni Linga'an a,
ba inan urun i lahir ma nfamalik Yesus.
Afa ovi nair ra kena vali,
na'uk ni kaka'a ti naran watan i Yohanes nbaptis tamata ra.
26 Ia ralan dawan ma nsiair na'a Yahudi rira rahan falurut ralan a.
Priskila irua Akwila rarenar afa ovi nair ra,
ba rasweang vali ia ma nana'a rira rahan,
boma rfalyawang ma lolin lahir verin ia na'a Ubu Ni Linga'an a.
27 Nata Apolos mane nti propinsi Akhaya,
ba tamata ovi rorang Yesus na'a Efesus rfangrebat ralan a,
ma rasusan surat isa verin tamata ovi rorang Yesus na'a Akhaya,
boma rtorung ma rala ia ovu ralar lolin.
Ba ti naran inyai,
na nlobang ma dawan tamata ovi rorang roak Yesus,
tevek Ubu nala roak Ni rala lolin verin ira.
28 Apolos ni dardirin nangrebat ma nfaleka tamata Yahudi ra ovu ni vaivatul ra na'a tamata rivun waharira ralan ra.
Ia nala vaivatul ovi rtali Surat Ralan ma nfalyawang ne,
Raja i ntevut dida salasilan ra,
inyai Yesus.