Ubu nfadoku ma Abraham wean tamata i ni vava'at nmalola, tevek ni inorang
1 Ita tfamalik afaka na'a Abraham i ubun-nusin verin tamata Yahudi ra ni afa ovi notu ra?
Wean inba ma Ubu notu ma ni vava'at nmalola ovu Ia?
2 Wean i Ubu ntorung ma nala Abraham wean tamata i ni vava'at nmalola tali afa ovi notu ra,
na ni lola roak ma nfakaratat tenan a.
Na'uk wol bisma notu wean inyai na'a Ubu wahan ralan a.
3 Rtulis roak na'a Surat Ralan ne,
“Abraham norang urun Ubu,
ba ni inorang a notu ma Ubu nfadoku ma nala ia wean tamata i ni vava'at a nmalola.”*
4 Wean i tamata isa nkarya,
na inovan ma nala ni kadi.
Ba tamata ra wol bisma rfalak ne,
ni kadi yai rala watan ma neluk rangrangwaha verin ia,
na'uk inyai al nkati ni farea a.
5 Na'uk dida vava'at ovu Ubu wol wean tamata ovi rkarya ma rala kadi.
Ba karya te afa ovi totu ra wol rot-nala ma Ubu nala ita wean tamata ovi rira vava'at ra rmalola na'a wahan ralan a.
Wean i torang Ubu,
velik ne tamata ktufan ita,
na Ia nfadoku ma nala ita wean tamata ovi rira vava'at ra rmalola,
tevek dida inorang verin Ia.
6 Daud nfalak vali wean inyai ma nfalyawang ne,
lolin urun verin tamata i Ubu nfadoku roak ma nala ia ma neluk tamata i ni vava'at a nmalola.
Ubu notu wean inyai,
wol mane ntali afa ovi tamata ra rotu.
Daud nfalak ne,
7 “Lolin urun verin tamata ovi Ubu na'i vatuk roak afa sala ovi rotu ra,
ovu na'i vatuk roak rira salasilan ra.
8 Lolin urun verin tamata i Duila'a wol nrekan ni salasilan ra.”*
Na'ut i wol rsunat Abraham obin, na Ubu nfadoku roak ma nala ia wean tamata i ni vava'at nmalola, tevek ni inorang a
9 Vaivatul lolin ovi Daud nfalak lan roak yai wol mane nfalak watan verin tamata Yahudi ovi rsunat roak ira,
na'uk verin tamata ovi wol Yahudi ra vali,
velik ne wol rsunat ira.
Amfalak lan roak ne,
Ubu notu ma Abraham ni vava'at nmalola ovu Ia,
tevek ni inorang a.
10 Na'ut ba Ubu notu wean inyai?
Ubu nfadoku ma nala Abraham wean tamata i ni vava'at nmalola na'ut i rsunat roak ia,
te wol rsunat ia obin?
Ubu notu wean inyai na'ut i wol rsunat ia obin!
11 Rsunat Abraham ma neluk faneak ne,
Ubu nfadoku lan roak ma nala ia wean tamata i ni vava'at nmalola,
tevek ni inorang a.
Ubu notu wean inyai na'ut i wol rsunat Abraham obin.
Afa yai nvotuk ma nfaturu ne,
Abraham neluk bapa verin tamata ovi rorang Ubu munuk,
velik ne wol rsunat ira,
ovu Ubu nfadoku ma nala ira ma wean tamata ovi rira vava'at ra rmalola.
12 Abraham neluk bapa vali verin tamata Yahudi ovi rsunat roak ira.
Tamata avyai wol mane rsunat watan ira,
na'uk rorang Ubu wean lahir Abraham na'ut i wol rsunat ia obin.
Ubu nala Ni tnorung verin Abraham tevek ni inorang a
13 Ubu Ni tnorung verin Abraham ovu ubun-nusin ra ne,
veka nala lanit ivavan a verin ira.
Ia notu tnorung yai,
tevek Abraham ni inorang verin Ia,
wol mane notu tnorung yai tevek Abraham not-orang Musa ni inukun ra.
* Ba tali ni inorang a,
bi Ubu nfadoku ma nala ia wean tamata i ni vava'at a nmalola.
14 Wean i Ubu nala Ni tnorung verin tamata ovi rot-orang Musa ni inukun ra watan,
na dida inorang na'a Ubu wol ihin akataka,
ovu tnorung yai vu watan.
15 Tamata ra munuk rangal Musa ni inukun ra,
ba wean i rangal inukun avyai,
na Ubu veka nfaturu Ni ngrova verin ira.
Na'uk wean i inukun ra wol rna'a,
na tamata wol bisma rangal inukun avyai.
16 Ba Ubu nala Ni tnorung a verin Abraham,
tevek ni inorang verin Ia.
Notu wean inyai tali watan Ni rala lolin a.
Wean inyai,
na Ubu Ni tnorung yai neluk tnorung mnga'un verin ita munuk,
tamata ovi teluk Abraham ubun-nusin ra.
Ubu nala tnorung yai,
wol mane verin tamata Yahudi ovi rot-orang Musa ni inukun ra watan,
na'uk verin tamata iki watan i ni inorang verin Ubu wean Abraham.
Tevek Abraham neluk bapa verin ita munuk,
tamata ovi torang Ubu.
17 Ia nfalak verin Abraham na'a Surat Ralan wean ini,
“Ya'a ufadoku roak ma oa meluk bapa verin bangsa rivun.”
Ubu nala Ni tnorung yai verin Abraham ma neluk bapa verin ita na'a Ubu wahan ralan a,
tevek norang Ia.
Ia Ubu i nfava'at matmatan ra,
ovu tali Ni vaivatul ra,
na afa ovi wol rna'a ra,
notu ma rna'a.*
18 Ubu Ni tnorung verin Abraham ma veka yanan,
velik ne wol bisma yanan roak.
Na'uk Abraham norang lalawatan Ubu ovu nfaklo'i a'uk ni vava'at a verin Ia.
Ba Abraham neluk bapa verin bangsa rivun,
wean lahir afa ovi rtulis roak na'a Surat Ralan.
Ubu nfalak verin ia na'ut i wol yanan obin ne,
“Ubum-nusim ra veka rivun ila'a matan ira,
wean nara ra na'a lanit.”*
19 Na'ut inyai,
na Abraham nka'a roak ne,
wol bisma yanan,
tevek tenan a nmafun ila'a roak,
ovu ni varat a nlabas ratut isa roak.
Ia nka'a vali ne,
awan i Sara itvata ila'a roak ia ma wol bisma yanan.
Velik ne wean inyai,
Abraham ni inorang a wol nmafun,
ma norang urun Ubu.*
20 Na'uk Abraham norang urun Ubu Ni tnorung a,
ma ia wol ralan raruan,
na'uk ni inorang ntafal ma nangrebat ovu nfadawang a'uk Ubu.
21 Ia norang urun ne,
Ubu Ni ngrebat ma not-nala munuk afa ovi nfadoku roak na'a Ni tnorung a.
22 Wean inyai bi,
Ubu nfadoku ma nala ia wean tamata i ni vava'at a nmalola.
23 Vaivatul ovi rtulis ne,
“Abraham ni inorang verin Ubu notu ma Ubu nala ia wean tamata i ni vava'at nmalola,”
wol mane rtulis watan verin Abraham.*
24 Na'uk rtulis vali vaivatul avyai verin ita.
Ubu nala vali ita weadida tamata ovi rira vava'at ra rmalola,
tevek dida inorang vali verin Ia i nfava'at dida Duila'a Yesus tali matmatan.
25 Ubu ntorung ma tamata ra rfedan Yesus,
tevek dida salasilan ra.
Nata nfava'at ewal Ia,
boma dida vava'at ra rmalola na'a Ubu wahan ralan a.