Raladida lolin urun, tevek Ubu naflahar roak ita ma dida vava'at ra rmalola
1 Fiang ini Ubu nala roak ita ma weadida lahir tamata ovi rira vava'at ra rmalola,
tevek torang Yesus.
Ba dida vava'at ra malinan ewal ovu Ubu,
tevek afa i dida Duila'a Yesus Kristus notu a.*
2 Yesus notu linga'an roak verin ita,
bi Ubu nfaturu Ni rala lolin verin ita tevek torang Ia.
Fiang ini dida vava'at na'a roak Ubu Ni rala lolin a ovu inadida lolin,
tevek torang urun ne,
Ubu veka nala ita ma tovu Ia na'a vanan i nfitik nyadat a.*
3 Nlia tali inyai,
na ita totu inadida lolin na'ut i tatuan susa ra,
tevek tka'a ne,
tali susa avyai,
na bisma tatahang nal raladida.
4 Wean i tatahang nal raladida na'a dida susa ra,
na dida vava'at ra rotu ma Ubu ralan lolin.
Totu wean inyai,
na notu ma tfaklo'i a'uk dida vava'at ra verin Ia,
tevek torang urun ne,
Ia veka notu afa ovi nfalak ra.
5 Wean i tfaklo'i a'uk dida vava'at ra verin Ubu wean inyai,
na raladida ra veka wol lalau,
tevek Ubu nala roak Ni silobang i dawan urun a verin ita.
Ubu nala Ni Roh verin ita,
ovu Ni Roh nfaturu lahir Ni silobang dawan yai verin ita.
6 Na'ut i ita wol dida linga'an ma tati talik inukun i musti tatuan tevek dida salasilan ra,
na Kristus ka'i nmata verin ita,
tamata ovi tafena ma tot-orang afa ovi Ubu nfalak ra.
Ia notu wean inyai na'a amar i nfadoku roak.
7 Wol ka'i trea ne,
tamata isa nmata verin tamata i wol ni sala.
Na'uk snain a tamata boku rabrahi ma rmata verin tamata i ni vava'at lolin.
8 Na'uk Ubu nfaturu Ni silobang i dawan urun verin ita nahu Kristus i nmata roak verin ita,
na'ut i tamata salasilan ita obin.
9 Fiang ini Ubu nala roak ita wean tamata ovi rira vava'at ra rmalola nahu Kristus laran i nvoat na'a aa walwalur.
Nlia ntali afa yai,
na tka'a urun ne,
na'a amar i veka nma,
na Kristus veka nfatalik ita tali Ubu Ni ngrova i nvua inukun.
10 Na'ut i ita wol inadida lahir Ubu,
na Ia notu ma dida vava'at ra lolin ewal ovu Ia,
nahu Yanan Ni matmatan a.
Ba nlia tali inyai,
nahu Yanan a Ni vava'at a,
na tka'a urun ne,
Ia veka nfatalik ita tali Ubu Ni ngrova.
11 Wol mane inyai watan!
Na'uk Ubu notu ma inadida lolin tali dida Duila'a Yesus Kristus,
tevek Ia notu roak ma Ubu ntorung ma dida vava'at ra lolin ewal ovu Ia.
Adam ovu Kristus rsialing ira
12 Salasilan nma lanit ivavan ini nahu Adam i nangal Ubu.
Adam nmata tevek ni salasilan,
ba matmatan nana'a roak lanit ivavan a.
Wean inyai,
na tamata ra munuk veka rmata,
tevek tamata ra munuk rotu salasilan.
13 Musa ni inukun ra wol rna'a obin,
na'uk tamata ra rotu roak salasilan.
Na'uk Ubu wol nrekan salasilan avyai,
tevek inukun avyai wol rna'a obin.
14 Velik ne wean inyai,
na'uk tamata ra munuk rmata na'ut i Adam nva'at obin a,
ti naran na'ut i Musa nva'at.
Velik ne tamata ra wol rangal afa ovi Ubu nfalak wean Adam,
na'uk rmata vali,
tevek rotu salasilan.
Adam ula ia,
beti Kristus.
Afa i Adam notu yai,
nkena munuk tamata ra.
Kristus Ni afa i notu a,
nkena munuk vali tamata ra.
15 Na'uk Ubu Ni rala lolin wol wean salasilan i Adam notu a,
tevek Ubu Ni rala lolin a dawan lia salasilan yai.
Adam nangal roak afa ovi Ubu nfalak ra,
ba tali afa yai,
na tamata ra munuk musti rmata.
Na'uk Ubu Ni rala lolin a nlia munuk lahir afa yai.
Ia nala lahir Ni rala lolin a verin tamata ra munuk nahu tamata isa;
inyai Yesus Kristus.
16 Ubu Ni rala lolin verin ita dawan lia tamata isa ni salasilan a.
Adam ni salasilan bi Ubu nukun tamata ra munuk.
Na'uk Ubu nala Ni rala lolin verin ita,
ovu nala ita weadida tamata ovi rira vava'at ra rmalola,
velik ne totu salasilan rivun roak.
17 Kena ma tamata isa ni salasilan a nvua matmatan verin tamata ra munuk.
Na'uk afa i Yesus notu lolin rahi afa yai!
Tamata iki watan norang Yesus,
na ni vava'at kakiwal ovu Ia,
ovu vali nfareta ovu Ia.
Ia veka nia afa ovi Ubu nala yai,
tevek Ubu Ni rala lolin dawan urun i lahir,
ovu nala roak ia wean tamata i ni vava'at nmalola na'a wahan ralan nahu Yesus Kristus.
Ubu ralan nfalak ma ka'i notu watan wean inyai.
18 Ba ntali Adam ni salasilan a,
bi Ubu nukun tamata ra munuk.
Ba wean vali inyai na'a afa i Yesus Kristus notu a.
Yesus not-orang lahir afa i Ubu nfalak a,
boma tamata ra munuk rira vava'at ra bisma rmalola ovu rira vava'at kakiwal.
19 Ba inyai wean watan tamata isa i nangal lahir afa ovi Ubu nfalak ra,
notu ma tamata ra munuk rira salasilan.
Wean vali Yesus,
Ia not-orang afa ovi Ubu nfalak ra,
notu ma tamata rivun rira vava'at ra veka rmalola na'a Ubu wahan ralan a.
20 Ubu nfasuka inukun ra verin Musa,
ba tamata rtafal ma rangal inukun avyai.
Velik ne tamata rira salasilan ra rtafal ma rivun,
na'uk Ubu Ni rala lolin a ntafal ma dawan lia salasilan ra.
21 Ba wean lan a,
na salasilan nfareta tamata ra munuk ma musti rmata tevek rira salasilan ra.
Na'uk fiang ini,
Ubu nala Ni rala lolin a verin ita,
ma nala ita wean tamata ovi rira vava'at ra rmalola,
ovu vali nala vava'at kakiwal a nahu dida Duila'a Yesus Kristus.