Tasdovu ita ma taflurut, na vata ra musti ralang brana ra
1 Ba era verin mia ma na'a bira vava'at ra,
na myot-orang afa ovi otu ovu ufalak ra,
wean lahir i ya'a vali orang Kristus.
2 Terang a valing averi,
ya'a musti ufadawang mia,
tevek na'a afaka watan,
na mingnanang ya'a ovu myot-orang afa ovi air roak verin mia.
3 Na'uk ya'a inak ma mkya'a afa i ufalak ini.
Kristus nfareta brana ovi rsifa roak ra.
Brana ovi rsifa roak ra rfareta awarira ra.
Ubu nfareta Kristus.
4 Wean i brana isa naflurut te nfamalik vaivatul ovi nrenar lahir tali Ubu,
na nkum-teri ulun a,
na ia wol nalang roak Kristus i nfareta ia.*
5 Na'uk wean i vata isa naflurut te nfamalik vaivatul ovi nrenar lahir tali Ubu na'a tamata rivun waharira ralan ra,
ovu wol nkum-teri ulun a,
na inyai nfaturu ne,
wol nalang roak awan a.
Notu wean inyai,
na ia wean lahir vata i racukur ni vut a ma rfama'it ia,
ma al nfaturu sian i notu a.
6 Wean i vata isa nafena ma nkum-teri ulun a,
na ni lolin a rngotal te racukur ni vut a.
Na'uk wean i rngotal te racukur vata ni vut a,
na rfama'it roak ia,
ba musti nkum-teri ulun a.
7 Brana ra wol bisma rkum-teri ulurira ra,
tevek Ubu notu ma felarira wean Ia,
ovu vali notu ma Ni dawan a nvotuk na'a ira.
Na'uk vata ra,
ira rfaturu lahir ne,
awarira ra dawan ira ovu felarira ra lolin.
8-9 Na'ut i Ubu notu lanit ivavan ini,
na Ia wol notu brana a tali vata a,
na'uk Ia notu vata a tali brana.
Brana a vali,
Ubu wol notu ia verin vata a,
na'uk Ia notu vata a verin brana a.
10 Wean inyai bi vata ra musti rkum-teri ulurira ra ma neluk faneak ne,
awarira ra rfareta ira.
Rotu wean inyai,
boma rfaloling Ubu Ni sansinir ra tali lanit ratan.
11 Velik ne wean urun inyai,
na'uk dida vava'at a na'a Duila'a,
ba vata ra wol bisma rdir-aling ira tali brana ra,
ovu vali brana ra wol bisma rdir-aling vali ira tali vata ra.
12 Kena urun,
Ubu notu ma vata i ula lalean a,
ntali brana,
na'uk brana liak ra munuk,
na vata ra rarali ira.
Afakataka munuk rtali Ubu.
13 Era ma eka minovak ma lolin!
Wean i vata isa naflurut verin Ubu,
na wol nkum-teri ulun a,
na inyai kena?
14-15 Na'a tamata rivun waharira ralan ra,
na ita tka'a roak ne,
brana ovi rira vut ra blawat a,
tamata ra wol ralang ira.
Na'uk vata ovi rira vut ra blawat a,
tamata ra ralang ira.
Tevek Ubu notu ma vata rira vut ra blawat ma nteri ulurira ra.
16 Na'uk wean i tamata boku wol rtorung ma vata ra rkum-teri ulurira ra na'ut i raflurut,
na mane ufalak afa isa watan.
Ya'a ufalak watan ne,
ami ovu sidovung tamata ovi rorang Yesus wol amtorung tamata avyai rira fikiran ra.
Paulus ntabu sidovung i na'a Korintus, tevek rotu sian a na'ut i ra'an roti ovu renu anggur ma al rangnanang Yesus Ni matmatan a
17 Terang a valing averi,
ya'a wol mane ufadawang mia na'a afa ovi mane ufalak ini.
Misdovu mia na'a bira sidovung tamata ovi rorang Yesus a,
na wol nvua afa lolin,
na'uk nvua watan afa ovi sian ra.
18 Ya'a urenar lan roak ne,
na'ut i misdovu mia na'a bira sidovung a,
na msyingarahi ma myotu bira sidovung alaling.
Ya'a orang ne,
afa boku tali ivar yai kena.
19 Inovan ma bira sidovung a nama'ar,
boma nfaturu lahir ne,
tali bir tinemun,
na iki tamata inorang mnga'un ia na'a Ubu wahan ralan a.
20 Velik ne mia mnyari ne misdovu mia ma mifna'an al mingnanang Duila'a Yesus,
na afa yai wol kena.
21 Tevek na'ut i misdovu mia ma mifna'an yai,
na tamata boku ra'an lan rira afamtahan ra,
na'uk tamata boku wol rira afamtahan,
ba rablafar watan,
na tamata boku vali ranavut.*
22 Notu afakinimi myotu wean inyai i?
Mia wol bira rahan ma mifna'an-mifnenu na'a?
Mia mane fyalak sian Ubu Ni sidovung tamata ovi rorang Yesus a,
ovu mane fyama'it tamata kasian ra?
Ya'a ki ufalak afaka ewal verin mia?
Ya'a mane ufadawang mia?
Na'a afa ovi ufalak ini,
na ya'a wol utorung lahir ma ufadawang mia.
23 Ya'a air roak mia tali afa i Duila'a nala roak verin ya'a.
Afa yai wean ini:
ovan i Yudas nfedi dida Duila'a Yesus,
na'uk wol rtaha Ia obin,
na Ia nala roti ma
24 nfalak fara weninyai verin Ubu,
beti nvisul roti a ma nfalak ne,
“Ini Ya'a tenang a ma ala verin mia.
Mian roti ini ma al mingnanang Ya'a.”
25 Nata Yesus nala vali kobi i nsa'a anggur a ma nfalak ne,
“Anggur i nana'a kobi ini nfaturu lahir Ubu Ni tnorung ngorva'an a verin tamata ra.
Ubu nfabana tnorung ngorva'an ini ovu larang a.
Lokat amar i myenu anggur ini,
na mingnanang Ya'a.”*
26 Ba lokat amar i mian roti ini ovu myenu anggur ini,
na mia fyamalik roak Duila'a Ni matmatan a,
nata ti naran amar i nma ewal a.
27 Ba wean i tamata iki watan ni afa ovi notu ra,
na'ut i na'an roti yai ovu nenu anggur yai,
wol inovan na'a Ubu wahan ralan a ovu wol nalang Duila'a,
na ia ni salasilan roak verin Duila'a.
Ira ranovak ne,
Yesus tenan a ovu laran a wol fyawan akataka a.*
28 Ba lokat tamata musti ranovak lan na'a ralarira ra,
ovu ka'i rsi'ik vali tenarira ra veki,
beti ra'an roti ovu renu anggur a.
29 Tevek tamata iki watan na'an roti ovu nenu anggur a,
na'uk wol nalang Duila'a tenan a,
na Duila'a veka nukun ia.*
30 Wean inyai bi,
tali bira sidovung a,
na tamata rivun tenarira ra rmafun,
ovu boku vali nawar ira,
ovu vali rivun ira rmata.
31 Na'uk wean i ita ka'i tanovak lan na'a raladida ra,
ovu tsi'ik tenadida ra veki,
na Duila'a veka wol nukun ita wean inyai.
32 Na'uk wean i Duila'a nukun ita ma tatuan susa,
na Ia nfakena ita.
Ia notu wean inyai ma ti naran amar i veka nma ma nukun lanit ivavan ini,
na Ia veka wol nukun ita.