1-2 Terang a valing averi na'a kota Kolose,

myorang urun Kristus,

ovu bira vava'at isa roak ovu Ia,

ovu myot-orang lalawatan afa ovi nfalak ra.

Surat ini ntali ya'a,

Paulus.

Ubu nfili ya'a ma eluk rasul verin Kristus Yesus,

tevek ralan nfalak wean inyai.

Terad i Timotius nana'a ini ovu ya'a.

Uflurut verin Yamadida Ubila'a ma fara nala Ni rala lolin verin mia,

boma bira vava'at ra malinan watan.

3 Lokat amar i amaflurut verin mia,

na amfalak fara weninyai lalawatan verin Ubu i Yanan a verin dida Duila'a Yesus Kristus.

4 Amfalak fara weninyai verin Ubu,

tevek amrenar roak ne,

myorang Yesus Kristus ovu mlyobang munuk tamata ovi rorang Ia.

5 Mia myorang Ubu ovu mlyobang tamata ra,

tevek fyaklo'i a'uk bira vava'at ra verin Ia.

Myotu wean inyai,

tevek fyaklo'i bira vava'at ra na'a afa ovi Ubu nfadoku verin mia na'a lanit ratan,

ovu veka bira vava'at kakiwal na'a inyai.

Mia mryenar lan roak afa avyai tali tamata ovi rfamalik Ubu Ni Ivar Lolin a.

Ubu Ni Ivar Lolin yai kena lahir.

6 Ivar Lolin yai nbana obin ma veka ti nsoru wan rivun na'a lanit ivavan ini,

ma tamata rivun rorang Yesus Kristus,

ma rira vava'at ra kena ovu afa ovi Ubu ralan nfalak a.

Na'ut i beti mryenar Ivar mnga'un yai,

na mia weabira lahir ira ma myorang Yesus Kristus,

ovu fyan-aran Ubu Ni rala lolin verin mia.

7 Amlobang urun mami kida Epafras i amamunuk amkarya.

Epafras ini nair roak Ivar Lolin yai verin mia,

ovu neluk tamata sansinir verin Kristus ma nkarya urun al nlobang mia.

Ia not-orang lalawatan afa ovi Ubu nfalak ra.

8 Ia nfamalik verin ami bi amka'a ne,

Ubu Ni Roh nala ngrebat verin mia,

tamata ovi myorang Ia ma msyilobang mia.

9 Ba tali amar i beti amrenar bira ivar a,

ma naran amar ini,

na amaflurut lalawatan verin mia.

Amera verin Ubu ma fara nala Ni kaka'a verin mia,

boma mkya'a lahir ne,

inba kena ovu inba sala,

ovu vali fyan-aran afa ovi rotu ma Ubu ralan lolin.

10 Amaflurut vali ma bira vava'at ra veka kena urun ovu afa ovi Ubu ralan nfalak a,

ovu vali afa ovi myotu ra rotu ma ralan a lolin watan.

Fara myotu lalawatan afa ovi lolin ra,

ovu bira kaka'a na'a Ubu veka ntafal vali.

11 Fara Ubu Ni ngrebat i dawan urun a nfangrebat mia,

ma wean i mtyuan sian te lolin,

na bira inorang a nangrebat,

ovu mtyahang nal ralabira na'a afaka watan,

ovu vali inabira lolin.

12 Uflurut vali verin mia ma fara fyalak fara weninyai verin Yamadida,

tevek notu ma mtyuan afa ovi ralan nfalak roak verin mia na'a Ni tnorung a,

ma mimunuk tamata inorang ovi veka rna'a Ni Fareta i lyawan urun a.

13 Yamadida Ubila'a nfatalik roak ita tali nitdawan ni ngrebat a,

ma nala roak ita ma ti tna'a Yanan i nlobang a,

Ni Fareta a.

14 Yanan yai ntevut roak ita,

ma na'i vatuk roak dida salasilan ra,

tevek dida vava'at isa roak ovu Ia.

15 Ita wol trea Ubu.

Na'uk wean i tfan-aran Yanan ralan a,

na tfan-aran roak Ubu ralan a.

Ita bis tfalak ne,

Yesus ula lalean Ia tali afa ovi Ubu notu ra munuk,

tevek Ni ngrebat a nlia munuk.

^* Na'ut i Ubu wol notu afakataka obin,

na Yesus Kristus nana'a lan roak.

16 Ubu nfalak ma Yanan notu afakataka munuk na'a lanit ivavan ini ovu na'a lanit ratan.

Ia notu afa ovi trea ra ovu afa ovi wol trea ra.

Ia notu vali ma Ni sansinir ovi rna'a lanit ratan ra,

roh liak ovi rira ngrebat ra,

ovu vali rira fareta ra ma rira dakdokun ra rsialing ira.

Ubu nfalak ma Yesus Kristus notu afakataka munuk,

ma rfadawang Ia.

17 Kristus nana'a lan roak na'ut i wol akataka lahir obin.

Ia nasusan akataka munuk,

ma rna'a watan warira ra.

18 Kristus nfareta Ni tamata ovi rorang Ia,

wean lahir tamata ulun nfareta tenan a.

Ia nala vava'at verin tamata ovi rorang Ia rira sidovung a,

ovu nva'at lan roak tali matmatan ra,

boma Ia a'uk sa'i dawan lia munuk afakataka.

19 Tevek Ubu nfadoku roak ma Yanan Ni vava'at a,

ovu ralan a,

ovu vali Ni ngrebat a wean lahir Ia.

20 Ubu nfadoku lahir ma tali Yanan a,

na afakataka munuk na'a lanit ivavan ini,

ovu vali na'a lanit ratan malinan ewal roak ovu Ia.

Kristus laran nvoat na'a aa walwalur notu ma afakataka munuk malinan ewal ovu Ubu.

21 Lan ana,

ralabira ra raroa tali Ubu.

Mia myangal Ia ovu bira fikiran sian ra,

ovu vali afa sian ovi myotu ra.

22 Na'uk fiang ini,

Ia notu ma ralabira ra malinan ewal ovu Ubu,

tevek notu ma Kristus neluk tamata ma nmata roak.

Ni matmatan a notu vali ma nfamerat mia tali bira salasilan ra ma myerat urun,

na'a amar i veka mdyiri Ubu wahan ralan a.

23 Ba wean i inabira ma wean urun inyai,

na bira inorang a musti nabwa'ar.

Deka mane tamata liak rotu teri mia ma wol mnyaban afa lolin ovi Ubu ntorung roak ma veka nala verin tamata ovi rorang Yesus.

Mia mryenar roak Ubu Ni Ivar Lolin i nban-soru roak,

nti wan rivun na'a lanit ivavan ini.

Ubu nfili ya'a,

Paulus,

ma ufamalik Ni Ivar Lolin a verin tamata ra.

24 Ya'a ralang lolin urun,

velik ne fiang ini utuan susa,

tevek ukarya ma ulobang mia.

Ya'a veka utuan susa obin,

tevek ukarya verin Kristus.

Ba fiang ini utuan roak susa,

tevek ukarya verin tamata ovi rorang Kristus,

na'a afa susa ovi Kristus nfadoku ma utuan a.

Ita tamata ovi torang Kristus weadida tenan a.

25 Ubu nala varvara verin ya'a ma ukarya verin mia,

tamata ovi myorang Ia,

ma ufamalik munuk Ni Ivar Lolin a verin mia.

26 Tali lalan ana,

Ubu wol nfavotuk Ivar ini,

na'uk fiang ini nfavotuk roak verin Ni tamata ovi rorang Ia.

27 Ubu inan ma nfalyawang verin Ni tamata ra na'a afa fanfonak i lolin urun yai.

Ubu nfadoku roak ma nala Ni kalolin a verin tamata ovi wol Yahudi ra.

Ivar Lolin yai ihin a ne,

Kristus nleal ralabira ra,

boma mkya'a basil ne,

veka mimunuk Ubu na'a lanit ratan ovu Ni lyawan i nfitik nyadat a.

28 Amfamalik Ivar Lolin na'a Kristus verin tamata ra munuk.

Amfangnanang ovu amair ira ovu kaka'a dawan i Ubu nala verin ami,

boma ti naran amar i amfavotuk tamata ovi rorang Kristus verin Ubu,

na rira inorang nmela ma dawan roak.

29 Wean inyai,

bi ukarya urun,

tevek Kristus Ni ngrebat nlobang ya'a ma afa ovi otu ra lyawan roak.