1 Terang a valing averi,
ya'a inak ma mkya'a ne,
ukarya urun verin mia,
ovu tamata ovi rorang Yesus na'a kota Laodikia,
ovu vali tamata ovi wol utuan ira obin.*
2 Otu wean inyai ma ufaloling ralabira ra na'a bira inorang a,
boma msyilobang mia ma ralabira isa watan.
Myotu wean inyai,
na mia munuk veka fyan-aran urun afa ovi fiang ini Ubu nfavotuk roak,
ovu veka mkya'a urun Ia.
3 Kristus a'uk sa'i bis notu ma mia munuk mkya'a Ubu Ni kaka'a a,
ovu fyan-aran Ni Ivar i fyawan urun a.
Lan ana,
Ubu wol nfavotuk Ni kaka'a yai obin.
4-5 Velik ne raroa ya'a tali mia,
na'uk ufikir lalawatan mia.
Ya'a ralang a lolin urun,
tevek urenar ne,
ralabira isa ma myorang urun Kristus.
Ba utulis surat ini verin mia,
boma tamata ra deka rweang tia ma watan mia ovu rira vaivatul lolin ra,
na'uk rsiklabir sian.
Dida vava'at i kena ovu Kristus
6 Myorang roak Ivar Lolin i nfalak ne,
Kristus Yesus Duila'a Ia.
Ba myot-orang lalawatan afa ovi Ubu ralan nfalak a,
na'a bira vava'at ra.
7 Terang a valing averi,
fyaklo'i a'uk bira vava'at ra verin Kristus ovu mibwa'ar na'a Ia.
Fara bira inorang a verin Ia ntafal ma nangrebat,
wean afa ovi rair roak verin mia.
Fyalak fara weninyai lalawatan verin Kristus.
8 Msyi'ik wabira ma lolin,
boma tamata ra deka rlabir waweang mia,
ma rkiwal ovu rair mia,
ma myorang rira fikiran ovi rfalak ne rira kaka'a,
na'uk wol kena ovu vu watan.
Afa ovi rair ra wol rtali Kristus,
na'uk rtali afa ovi tamata ra ka'i rotu watan a,
ovu vali adat ovu inukun ovi rna'a lanit ivavan ini.*
9 Ba deka myorang afa ovi wol kena avyai,
tevek na'ut i Kristus neluk tamata,
na Ni vava'at a,
Ni ngrebat a ovu ralan a wean lahir Ubu.
10 Bira vava'at isa roak ovu Kristus,
ba afa ovi Ubu ralan nfalak verin mia,
rleal roak ralabira ra.
Kristus nfareta munuk afa ovi rira ngrebat ovu rira fareta ra na'a lanit ivavan a.*
11 Mia bira vava'at isa roak ovu Kristus,
ba inyai,
wean watan i rsunat roak mia.
Sunat yai wol wean sunat i tamata ra rotu a,
na'uk wean sunat i Kristus notu a.
Sunat yai nfatalik roak mia tali ngrebat i notu ma tamata ra rotu watan afa ovi inar ma rotu a.
12 Na'ut i rbaptis mia,
na inyai wean i myata roak ma roving mia ovu Kristus Ni matmatan a.
Baptis yai wean vali i bya'at ewal roak ovu Kristus,
tevek myorang Ubu i Ni ngrebat a nfava'at ewal Kristus tali matmatan a.
13 Lan ana,
na'ut i wol myorang Kristus obin,
na bira vava'at ra wean watan i myata roak,
tevek bira salasilan ra,
ovu ngrebat i notu ma tamata ra rotu watan afa ovi rira ininan sian a nfalak ra,
ovu vali wol rsunat mia obin wean tamata Yahudi ra rotu.
Na'uk fiang ini,
Ubu nala vava'at ngorva'an roak verin mia ovu Kristus.
Ia na'i vatuk roak bira salasilan ra munuk.*
14 Ubu na'i vatuk roak dida utan ovi ntulis na'a Ni buku inukun i nfadoku dida salasilan ra.
Na'ut i rbaku Kristus na'a aa walwalur a,
na Ubu na'i vatuk roak afa ovi totu ma musti nukun ita yai.*
15 Na'a aa walwalur a,
na Ubu nfaleka lahir nait sian ovi rfareta a,
ma wol rira ngrebat akataka roak.
Ia notu ma tamata ra bisma rsi'ik ne,
Ia utun roak ira,
tevek Kristus Ni matmatan a.
16 Terang a valing averi,
tamata boku inar ma rkiwal mia ma myot-orang afa ovi rfalak ra.
Ira rfalak sian mia,
tevek wol myotu wean ira na'a afa ovi mian te myenu ra.
Deka mtyorung ma rukun mia,
tevek wol myotu snoba wean ira na'a Yahudi rira amar dawan ra,
te vulan ngorva'an,
te amar i tyari ita.
Deka fyikir lahir afa ovi tamata avyai rfalak ra.
17 Inukun avyai munuk rtali Yahudi rira agama,
ma rfaturu watan na'a afa ovi veka rvotuk ra.
Na'uk Ubu nfakena munuk roak Ni tnorung ra na'a Kristus.*
18 Ba wean i tamata ra rukun mia,
tevek wol myorang afa ovi rair ra,
na deka fyikir afa ovi rfalak ra.
Tamata avyai rfalak ne,
Ubu nfaturu afa boku verin ira wean i ramifi na'uk wol rtub-lufa.
Ira rfalak ne,
Ubu veka wol naval bira rala lolin ra,
wean i wol fyakabava tenabira ra ovu wol fyadawang Ubu Ni sansinir ra tali lanit ratan.
Deka myotu ma tamata avyai rfaleka mia,
ovu deka fyadawang Ubu Ni sansinir ra tali lanit ratan.
Ira rfefik buburira ra,
na'uk wol rira dardirin akataka,
tevek rfikir watan afa ovi ralarira ra rfalak ma rotu a.
19 Tamata ovi rsiair wean inyai,
ira wol rorang roak afa ovi Kristus nair ra.
Kristus nfareta munuk Ni tamata ovi rorang Ia,
wean lahir i tamata ulun nfareta tenan a,
boma ita wead isa watan.
Ia nlobang ita ma tmela ma dida vava'at wean Kristus,
wean dida urat ra ovu lurid ko'u dawan ra rna'a tenadida ra,
ma tenadida rmela.
20 Terang a valing averi,
mia myorang roak Kristus ma bira vava'at isa roak ovu Ia,
ba wean i myata roak ovu Ia.
Ia nfatalik mia tali adat ovu inukun ovi rna'a lanit ivavan ini.
Ba afakinimi myorang tamata ovi lanit ivavan ini nkeak rira fikiran ra obin?
Afakinimi myorang rira fikiran ra te rira adat ra na'a afa rivun,*
21 wean i rfalak ne,
“Deka mtyaha afa ini”,
“Deka mian afa ini”,
“Deka mkyena afa ini!”
Era ma deka fyikir kikyai afa avyai.
22 Adat avyai rair ovu rfamalik afa ovi veka rmamu ra watan,
wean i totu roak.
Wean i tot-orang afa avyai,
na wol ihin akataka.
Deka fyikir ne,
musti myot-orang,
tevek afa avyai rtali watan tamata rira fikiran ra.*
23 Ni lolin a,
deka tot-orang adat avyai,
tevek rfalak ma tamata ra rotu afa ovi wol maraan ra.
Adat avyai felarira ra wean i rira kaka'a ntali Ubu,
tevek rfadawang Ubu wean ira ka'i rfalak.
Rfalak ma rfakabava tenarira ra,
ovu rtahang ralarira te rotu sian tenarira ra.
Na'uk adat avyai wol fyawarira ovu wol rotu teri nala tamata ra ma deka rotu salasilan,
wean i rira ininan sian ra rfareta ira ma rotu.