1 Terang a valing averi,

fiang ini Ubu nala roak vava'at ngorva'an verin mia ovu Yesus Kristus,

ba fyikir ovu mdyava a'uk afa ovi rna'a lanit ratan,

na'a wan i Kristus a ndoku ma nfareta na'a Ubu Ni lihir mela a.

2 Fyikir afa ovi rna'a lanit ratan,

ma deka fyikir afa sian ovi tamata ra inar ma rotu na'a lanit ivavan ini.^*

3 Mia wean i myata roak ovu Yesus Kristus,

ba bira vava'at mnanat i na'a lanit i vavan a,

nlia nmamu munuk roak.

Fiang ini,

bira vava'at ngorva'an roak ovu Kristus na'a Ubu wahan ralan a.

Tamata ovi wol rka'a Ubu,

wol rfan-aran bira vava'at ngorva'an ini.

4 Yesus Kristus nala vava'at mnga'un verin mia.

Na'a amar i veka nma ewal,

na mia veka mnya'a vali ovu Ia na'a vanan i nfitik nyadat ma felan lolin urun,

ba mia weabira vali Ia.

5 Byatuk lahir bira ininan sian ovi myotu ra munuk.

Afa sian avyai,

wean i mtyuba ovu tamata ovi wol awabira verin ira,

myotu afa sian ovi rotu ma fyangra tenabira ra,

myot-orang bira ininan sian ra,

bira fikiran sian ra,

ovu mlyobang bira kubang ra ma fyikir a'uk tenabira ra.

Wean i fyikir a'uk tenabira ra wean inyai,

na wean watan i msyangatur roak ma mryaning walut ra.^*

6 Ba Ubu veka nfaturu lahir Ni ngrova a verin tamata ovi rotu afa avyai.^*

7 Lan ana,

mia myotu vali afa sian avyai na'a bira vava'at ra.

8 Na'uk fiang ini,

deka myotu kikyai afa sian ra.

Deka msyingrova mia,

deka myoruk-myak tamata ra,

deka fyalak sian tamata ra te myi'it ira,

ovu deka myala vaivatul ovi ngra ra.

9 Deka msyiklabir-sikual mia,

tevek byatuk roak bira vava'at mnanat ovu afa sian ovi ba'i myotu ra.

10 Bya'at roak na'a vava'at ngorva'an i Ubu notu verin mia.

Ia notu ma bira vava'at ngorva'an lalawatan,

boma myotu afa ovi wean i notu ra.

Ia notu wean inyai,

boma mkya'a urun Ia.

11 Ba na'a bira vava'at ngorva'an i Ubu nala roak verin mia yai,

byatuk bira fikiran i msyifili tamata.

Fiang ini deka fyikir roak ne,

tamata Yahudi te wol Yahudi,

tamata ovi rsunat roak ira te wol rsunat ira obin,

tamata dakan te tamata ovi wearira tamata nangan ra,

tamata sansinir te wol tamata sansinir.

Kristus Ni dawan a nlia munuk afa avyai ovu nleal raladida ra munuk.

12 Ubu nfili roak mia ovu nfamerat munuk roak mia.

Ia nlobang urun mia ovu Ni munuk roak mia.

Ia notu wean inyai,

ba fara msyilobang urun mia,

ovu vali fyaturu bira rala lolin verin tamata liak ra.

Fyakabava tenabira ra ma fyikir tamata liak ra,

ovu mtyahang nal ralabira.

13 Tamata ra wol wear isa,

ba ngalalahang watan ovu ira.

Deka msyitonan mia,

na'uk myabun watan tamata ovi rotu sala verin mia,

wean lahir i Ubu na'i vatuk roak bira salasilan ra.

Ba mia musti myotu vali wean inyai ma myabun afa sian ovi tamata liak rotu verin mia.

14 Nlia tali afa avyai munuk,

na msyilobang mia,

tevek wean inyai,

na Ia nfatnemung munuk bira vava'at ra ma isa watan mia.

15 Kristus nala roak malinan verin mia.

Ba mtyorung watan ma malinan yai nfareta ralabira ra.

Myotu wean inyai,

tevek bira sidovung ikisa watan ovu fyalak vali fara weninyai verin Ubu.

16 Fara Kristus Ni vaivatul ra rna'a lalawatan ralabira ra.

Msyiair ovu msifangnanang mia ma myot-orang Ni vaivatul ra ovu Ni kaka'a a.

Mryaning Ubu naran a ovu dadedang ovi tamata inorang ra rdedang.

Mdyedang vali dadedang ovi Ubu Ni Roh nala verin tamata ra ovu dadedang tali mazmur.

Fyalak fara weninyai verin Ubu na'a ralabira ra,

wean i mdyedang wean inyai.^*

17 Fara afa ovi myotu ra munuk,

ovu afa ovi fyalak ra munuk musti wean lahir i myotu ma fyaturu lahir Duila'a Yesus na'a bira vava'at ra.

Fyalak fara weninyai lalawatan verin Yamadida Ubila'a,

nahu Yesus.

18 Terang a valing averi,

mane ungrihi verin vata ovi msyifa roak a.

Fyakabava tenabira ra ma myot-orang watan afa ovi awabira rfalak ra,

tevek afa yai inovan verin tamata ovi rorang Duila'a,

ma ira wear isa roak ovu Ia.

19 Brana ovi msyifa roak ra,

mlyobang awabira ra,

ovu deka myotu ira wean bira tamata ovi msyinir tia ma watan ira.

20 Kasiko'u ra vali musti mryenar renabir-yamabira ra ovu myot-orang munuk afa ovi rfalak ra.

Myotu wean inyai,

na myotu ma Duila'a ralan a lolin.

21 Brana ovi yanabira roak,

deka mingrova da'in yanabira ra ma ralarira sian ovu ralarira kako'u ma rafena rotu akataka.

22 Tamata sansinir^* ra myot-orang watan bira dawan ovi rna'a lanit ivavan ini,

rira afa ovi rfalak ra verin mia na'a afaka watan.

Deka mdyava wahabira ralan ma myotu afa ovi rfalak ra na'ut i rsi'ik mia watan,

boma inar mia.

Na'uk mkyarya ma lolin watan,

tevek myalang Duila'a Yesus.

23 Na'a afaka watan,

na mkyarya ovu ralabira urun,

wean lahir i mkyarya verin Duila'a.

Ba deka minovak na'a ralabira ra ne,

mkyarya verin tamata ra watan.

24 Myotu wean inyai,

tevek mkya'a roak ne,

Duila'a Yesus mane naval bira rala lolin ra,

ovu naflahar mia wean i nfalak roak na'a Ni tnorung ra.

Mingnanang:

bira dua dawan verin Duila'a Yesus Kristus,

ba mkyarya verin Ia.

25 Tamata iki watan notu afa ovi sala ra,

na Ubu veka nukun ia ma inovan ovu afa ovi notu ra,

tevek Ubu wol nfili tamata.^*