Paulus nsinir Timotius ma ti nalola tamata ovi rorang Yesus na'a kota Tesalonika
1 Ami wol amtahang nala roak ralamami ra,
tevek amaseak mia,
ba ama'an vai isa roak ma amna'a kota Atena watan,
2 ovu amsinir roak teradida isa naran Timotius ma nti nalola mia.
Ia nkarya vali na'a Ubu Ni va'i ralan a,
ba amamunuk weamami isa watan ma amfamalik Ivar Lolin na'a Kristus.
Amsinir ia ma ti nalola mia ovu nfangrebat ewal bira inorang a,
ma myorang a'uk Yesus Kristus.
3 Wean inyai,
boma wol tamata isa vali ni inorang a kako'u,
tevek afa sian ovi mtyuan a.
Mia mkya'a roak ne,
Ubu ralan nfalak vali ma tamata ovi rorang Yesus veka rtuan susa vali,
tevek rira inorang a.
4 Na'ut i itmunuk obin,
na amfalak lan roak verin mia ne,
ita veka tatuan susa.
Mia msyi'ik roak ne,
tatuan afa avyai.
5 Wean inyai bi usinir Timotius ma nti,
boma uka'a mnga'un ne,
bira inorang a wean inba,
tevek wol utahang nal ralang roak.
Ya'a ralang raruan beta ne nitdawan nweang nala mia,
ma mami karya i amfamalik Yesus verin tamata ra wol ihin akataka.
6 Ba fiang ini Timotius newal roak ia ma nfaloling ralamami ra ma nfamalik bira silobang a,
ovu nfamalik vali ne,
bira inorang verin Yesus nangrebat.
Ia nfamalik vali ne,
mia mingnanang lalawatan ami,
ovu inabira ma mtyuan ami,
wean vali ami inamami ma amtuan mia.
7 Amrenar ivar yai,
na ralamami ra lolin watan.
Velik ne tamata ra rwi-rwa ami ovu amtuan susa rivun,
na'uk amrenar tamata ra rfamalik bira inorang verin Yesus,
ba ralamami ra dawan watan.
8 Ba fiang ini ralamami ra lolin urun,
tevek bira inorang verin Ubu nangrebat.
9 Ralamami lolin urun i lahir na'a Ubu wahan ralan a ma amfalak fara weninyai verin Ia,
tevek bira inorang a nangrebat.
10 Ovan-amar amaflurut verin Ia ovu ralamami urun,
boma tsituan ewal ita,
ma amtafal ma amfangrebat bira inorang na'a Yesus Kristus.
Paulus naflurut verin tamata ovi rorang Yesus na'a Tesalonika
11 Amaflurut verin Yamadida Ubila'a ovu dida Duila'a Yesus,
ma fara nfamalola mami linga'an a ma tsituan ewal ita.
12 Amera vali ma fara Ubu notu ma ka'i msyiotu lolin mia,
ovu bira silobang ntafal verin tamata ra munuk,
wean mami silobang verin mia.
13 Amera vali verin Duila'a ma nfangrebat ralabira ra ma notu ma ralabira ra rmerat urun,
ovu vali wol bira sala na'a Yamadida Ubila'a wahan ralan a,
na'ut i dida Duila'a Yesus nma ewal ovu Ni tamata ovi rorang Ia.*