Paulus nsurak tamata ovi rorang Yesus na'a afa ovi rotu ma rfaloling Ubu ralan a
1 Teramam-valimami averi na'a Yesus Kristus,
amera verin mia ovu ralamami urun ma myorang afa ovi amair roak verin mia,
boma bira vava'at ra rotu ma Ubu ralan a lolin.
Velik aba afa ovi myotu ra lolin roak.
Na'uk amsurak mia ma mtyafal ma myotu afa ovi lolin ra,
tevek dida vava'at ra isa roak ovu Duila'a Yesus.
2 Tevek mia fyan-aran roak afa ovi amair verin mia na'a ngrebat i amala tali Duila'a Yesus.
3 Ubu ralan nfalak ma bira vava'at ra rmalola,
ba deka mtyuba ovu tamata ovi wol awabira verin ira.
4 Msyi'ik ma lolin ma myatar tenabira ra,
ovu msyi'ik ma lolin awabira ra.
Myotu wean inyai,
boma bira vava'at ra rmalola na'a Ubu wahan ralan,
ovu na'a tamata ra waharira ralan ra.
5 Deka myot-orang bira ininan sian ra,
wean tamata ovi wol rorang Yesus ba'i rotu ra.
6 Tamata inorang wol bisma rotu wean inyai verin tamata iki watan,
ovu nlia tali inyai,
na ira wol bisma rotu sian i wean inyai verin terarir-valirira ovi rorang Yesus.
* Amfalak lan roak verin mia ne,
Duila'a veka nukun tamata ovi rotu afa sian avyai.
7 Ubu nera ita ma dida vava'at ra rmalola.
Ia wol nera ita ma tfangra tenadida ra ovu tot-orang dida ininan sian ra.
8 Ba wean i tamata iki watan nafena ma norang afa avyai,
na ia wol nafena watan tamata ra,
na'uk ia nafena lahir Ubu i nala roak Ni Roh a verin ita.
9 Teramam-valimami averi,
na'a surat ini,
na ami wol amsurak mia ma wean inba ma mlyobang tamata inorang ra,
tevek Ubu nair roak mia ma msyilobang mia.
10 Mia mlyobang roak tamata inorang ra munuk na'a propinsi Makedonia,
na'uk amera tali mia ta kida averi ma mtyafal ma myotu afa lolin avyai.
11 Msyi'ik ma lolin ma bira vava'at ra malinan watan ovu tamata liak ra.
Deka myurus tamata liak rira rahan teta ra,
na'uk msyi'ik bira karya ra na'a bira fana'an-fanenu ra,
wean i amsurak roak verin mia.
12 Wean i bira vava'at wean inyai,
na wol fyaklo'i bira vava'at ra verin tamata liak,
ba tamata ovi wol rorang Yesus veka ralang mia.
Duila'a Yesus veka nma ma nala Ni tamata ra
13 Teramam-valimami averi,
inamami ma mkya'a ne,
wean i tamata ovi rorang Yesus rmata roak,
na wean inba verin ira,
boma ralabira deka lalau,
wean tamata ovi wol rfaklo'i rira vava'at ra verin Yesus.
14 Ralabira deka lalau wean ira,
tevek ita torang roak ne,
Yesus nmata na'uk nva'at ewal.
Ba ita torang ne,
Ubu veka nala vali tamata inorang ovi rmata roak a,
ma veka irmunuk Yesus rna'a wan isa.
15 Duila'a nfavotuk roak verin ami na'a afa ovi amfalak verin mia.
Amfalak verin mia ne,
na'ut amar i Duila'a Yesus veka nma,
na Ubu veka nala lan tamata inorang ovi rmata roak yai,
beti tamata inorang ovi rva'at obin a.
16 Tevek na'ut amar i Duila'a Yesus ntali lanit ratan nsuta ma nfareta ovu vain dawan,
na ita veka trenar Ni sansinir ra tali lanit ratan rira dawan a nangrihi,
ovu Ubu Ni tarompet a ngoan.
Tamata inorang ovi rmata roak yai veka rva'at ewal,
ma ula ira.
17 Notu munuk roak afa avyai,
beti Ubu nsikat tamata inorang ovi rva'at obin ma itmunuk tna'a mutan ralan ra,
ma tatuan Duila'a Yesus na'a lanit.
Itmunuk Duila'a na'a inyai,
nata ti wol ni wahan.
18 Ba msyifangrebat mia ovu vaivatul avyai,
boma ralabira ra lolin watan.