Tsi'ik wadida ma lolin
1 Teramam-valimami averi na'a Yesus Kristus,
na'a surat ini,
na ami wol amfalak ne,
na'ut amar aka Yesus Kristus veka newal Ia.
2 Tevek mia ka'i mkya'a roak ne,
Duila'a Ni amar i veka nma yai,
wean tamata barborin i nma nafafruan tenan.
3 Na'a amar i veka nma yai,
na tamata ra rfalak ne,
“Tamata ra malinan watan,
ba wol vangoa-vanga roak.”
Brian munuk,
na rtuan susa i dawan ila'a* ovu wol rafla talik nala!
Ira veka wearira vata i nfarnuang wawa'uk na'ut i mane nrali ia,
ba Ubu nukun ira ovu wol rfonak nala tenarira ra.
4 Na'uk teramam-valimami averi,
mia myorang Yesus,
ba wol mnya'a dedan ralan.
Ba na'ut amar i Yesus nma ewal,
na wol nfabriang mia,
wean tamata barborin.
5 Tevek bira vava'at ra rfaturu ne,
mnya'a lyawan.
Ita wol mane wean tamata ovi rleal dedan ralan ma rotu lalawatan sian a.
6 Ba wean inyai,
na ita deka tbosa ma tatuba wean tamata ovi wol rorang Ubu.
Eka matad ratvelar ma tsi'ik wadida ma lolin.
7 Tevek ovan beti tamata ra rtuba,
ovu vali ovan beti tamata ra ranavut.
8 Na'uk ita tna'a lyawan,
ba eka tatahang raladida.
Torang a'uk Yesus ovu dida silobang a dawan,
boma tangrebat,
wean suldadu i noru ravit tma'an al nteri tenan a.
Ita musti tfaklo'i a'uk dida vava'at ra verin Ubu i veka nsikat ita tali dida salasilan ra,
boma tangrebat wean vali suldadu i nala kalulu tma'an al nteri ulun a.
9 Ubu wol nfadoku ma nfaturu lahir Ni ngrova verin ita,
na'uk veka nsikat ita tali dida salasilan ra,
ma dida vava'at kakiwal nahu Duila'a Yesus Kristus.
10 Yesus Kristus nmata al nakvanak ita tali dida salasilan ra,
boma ti naran amar i veka nma yai,
na nala ita ma tleal isa,
velik ne tva'at obin te tmata roak.
11 Ba wean inyai ta did tinemun,
na msyilobang mia ovu msyifangrebat ralabira ra,
wean i fiang ini myotu roak a.
Paulus nsurak tamata ovi rorang Yesus na'a rira vava'at ra
12 Teramam-valimami averi na'a Yesus Kristus,
amera verin mia ma myalang tamata ovi iva'ur ma rfabana Ubu Ni karya na'a bira sidovung a,
tevek ira rban-ulu verin mia,
ovu rsurak mia vali.
13 Myalang ma dawan ira ovu mlyobang ira,
tevek rfabana Ubu Ni karya.
Fara msyiotu lolin watan mia,
boma bira vava'at ra malinan.
14 Amsurak vali mia ma mtyabu tamata ovi rafena ma rkarya.
Fyangrebat tamata ovi ralarira ra kako'u,
mlyobang tamata ovi wol rangrebat*,
ovu vali mtyahang ralabira verin iki watan.
15 Msyi'ik wabira ma lolin boma,
wean i tamata isa notu sian mia,
na deka myotu sian ia.
Ni lolin a,
bir tinemun msyiotu lolin watan mia,
ovu vali verin tamata iki watan.
16-17 Fara bir tinemun ralabira ra lolin lalawatan ovu miflurut ovan-amar.
18 Na'a afaka watan,
na fyalak fara weninyai verin Ubu,
tevek Ia inan ma myotu wean inyai,
wean tamata ovi rorang Kristus Yesus ba'i rotu a.
19 Deka myangal Ubu Ni Roh a,
20 ovu deka mifena ma mryenar ivar i Ubu Ni Roh nala verin tamata ovi rorang Ia.
21 Na'a snurak afaka watan,
na mlyabir teman ia veki,
beti myorang afa ovi kena ra.
22 Fyaroa tenabira ra tali afa ovi sian ra.
23 Fara Ubu i notu ma dida vava'at ra malinan,
notu ma raladida ra munuk rmalola.
Amera vali ma fara Ubu nlobang mia,
boma tenabira ra,
ovu ralabira ra,
ntafal vali bira roh a rmalola,
boma wol bira sala,
ti naran amar i dida Duila'a Yesus Kristus nma ewal.
24 Ubu nera roak mia ma myorang Ni vaivatul ra,
ba Ia veka nfangrebat mia ma myot-orang afa ovi nfalak ra,
tevek Ia notu lalawatan afa ovi nfalak ra.
25 Teramam-valimami averi na'a Yesus Kristus,
era ma miflurut verin ami.
26 Myala vali mami salam a verin teramam-valimami ovi rorang Yesus,
ovu msyivoan mia ovu Ubu Ni lolin a.*
27 Ya'a ala Ubu naran a,
ma era verin mia ovu ralang urun,
boma byas surat ini verin tamata ovi rorang Yesus munuk.
28 Fara dida Duila'a Yesus Kristus nala Ni rala lolin verin bir tinemun.
Ning surat i utulis ini,
lawan watan ini.Ya'a Paulus,
ala salam verin mia