Taflurut verin dida dawan ra ovu tamata ra munuk
1 Timotius,
mane usurak oa wean ini.
Ya'a era ma muflurut verin tamata ra munuk.
Muflurut ila'a verin Ubu ma nlobang tamata ra munuk,
ovu fwalak fara weninyai verin Ubu,
tevek nlobang roak tamata rivun.
2 Muflurut vali wean inyai verin raja ra ovu dawan fareta ra munuk,
boma dida vava'at ra malinan watan.
Ba fara dida vava'at ra rmalola ovu talang tamata ra.
3 Taflurut wean inyai,
na inyai lolin.
Totu wean inyai,
na nfaloling Ubu ralan a,
ovu Ia nsikat ita tali dida salasilan ra,
ma dida vava'at kakiwal.
4 Ubu inan ma nsikat tamata ra munuk tali rira salasilan ra,
ma rira vava'at kakiwal,
ovu Ia inan ma rka'a vaivatul ovi kena ra.
5 Ubu ikisa watan,
ovu Tamata ikisa watan neluk leta verin tamata ra ma rti Ubu,
na inyai Kristus Yesus.
6 Ia nala roak tenan a ma al ntevut tamata ra munuk tali rira salasilan ra.
Ia notu afa yai,
boma na'a amar i Ubu nfadoku a,
na ita tka'a ne,
Ubu inan ma nsikat tamata ra munuk tali rira salasilan ra,
ma rira vava'at kakiwal.
7 Ba afa avyai,
bi Ubu nfili ya'a ma eluk Ni rasul.
Ia nsinir ya'a ma ufamalik vaivatul ovi kena ra verin tamata ovi wol Yahudi ra,
boma rorang Yesus.
Afa ovi ufalak ini kena!
Ya'a wol usiklabir!
Paulus nair Timotius na'a afa ovi vata ovu brana ra rotu na'a rira sidovung
8 Ya'a inak ma na'a inba watan misdovu mia,
na era ma brana ra rsikat limarira ra ma raflurut.
Brana ra musti rira vava'at ra rmalola,
ovu wean i mane raflurut,
na deka rsingarahi te rsingrova ira.
9 Ufalak vali ma wean i vata ra rung a reluk ira,
na reluk kadaravit ovi inovan verin vata ra,
boma rfaturu ne,
rira vava'at lolin.
Deka rtebung rira vut ra ma nlia da'in.
Deka reluk kadaravit ovi fyawar urun,
te rfaklo'i masa te mutiara na'a tenarira ra.
10 Na'uk ni lolin a,
na vata ra rotu watan afa ovi lolin ra,
boma tamata ra veka rfalak ne,
vata avyai rira vava'at ra rfaturu ne,
rorang Ubu.
11 Wean i tamata ra rair Ubu Ni vaivatul ra verin vata ra na'a rira sidovung a,
na fara vata ra rfakabava tenarira ra ovu deka rangrihi.
12 Ya'a wol utorung ma vata ra rair te rfareta brana ra.
Ira musti rarenar ma lolin ovu deka vair.
13 Tevek Ubu notu lan Adam,
beti Hawa.
14 Nitdawan nweang nala Hawa,
na Adam wahal,
ba Hawa nangal afa i Ubu nfareta verin ira.
15 Velik ne wean inyai,
na'uk Ubu veka nsikat vata ra tali rira salasilan ra,
ma rira vava'at kakiwal na'a amar i rarali yanarira ra.
Ia notu wean inyai,
asal ne rorang lalawatan Yesus ovu rlobang tamata ra,
ovu rira vava'at ra rmalola,
ovu vali ma rtahang nal ralarira ra na'a afaka watan.