Paulus nfalyawang dawan kareda ovi rban-ulu verin rira sidovung ra
1 Vaivatul ovi kena urun:
tamata i inan ma neluk dawan kareda i nban-ulu* verin ni sidovung a,
na inan ma nkarya afa i lolin a.
2 Brana i inan ma neluk dawan kareda i nban-ulu verin ni sidovung a,
na ni vava'at musti nmalola,
boma tamata ra deka rfasala ia.
Awan ikisa watan,
ovu ntahang nal ralan na'a afaka watan,
ovu vali nka'a wan.
Ia musti nalang tamata ra,
inan ma tamata ra rma ma rlolak ia na'a ni rahan,
ovu nka'a ma nair tamata ra.
3 Ia deka nanavut,
te inan ma nsingarahi,
na'uk tfili tamata i nmarkai ovu wol inan ma nsingarahi,
ovu vali wol wahan kubang.
4 Ia musti nsi'ik ma lolin ni rahan teta,
ovu nair yanan ra ma ralang ia.
5 Tevek brana i wol nka'a ma nsi'ik ni rahan teta a,
na wean inba ma nair tamata ovi rorang Yesus na'a rira sidovung?
6 Tamata i beti nahil ma ntalik tali ni salasilan ra ma norang Yesus,
na wol bisma na'a dawan kareda i nban-ulu verin ni sidovung a.
Tevek wean i neluk dawan kareda,
na beta ne nfakaratat tenan a,
ba Ubu veka nukun ia wean lan a,
nukun roak nitdawan.
7 Tamata ovi wol rorang Yesus musti ralang vali tamata i inan ma neluk dawan kareda i nban-ulu.
Tevek wean i wahal,
na tamata ra veka rfalak sian ia ovu nitdawan veka nlabir nala ia.
Paulus nfalyawang dawan kareda ovi reluk diaken
8 Wean inyai vali,
na dawan kareda ovi reluk diaken musti rira vava'at ra rmalola,
boma tamata liak deka rfasala ira,
na'uk ralang watan ira.
Ira vali deka renu da'in tuat,
ovu wol bisma rlobang kubang ma rfikir a'uk tenarira ra.
9 Ira ralar ila'a musti nmerat,
ovu rtaha ma lolin afa ovi Ubu nair verin ita.
10 Ba wean i mane rlobang tamata ra na'a tamata ovi rorang Yesus rira sidovung a,
na musti rlabir teman ira veki.
Wean i wol rira sala,
na ki rfili ira.
11 Awarira* vali musti rka'a warira ma tamata liak ralang ira.
Deka rangrihi tia ma watan ma rfalak sian tamata ra.
Ira vali musti rtahang nal ralarira na'a afaka watan,
ovu rotu lalawatan afa ovi rfalak ra.
12 Diaken ra musti rsi'ik ma lolin rira rahan teta ra,
ovu awarira ikisa watan.
13 Tamata ovi rlobang ma lolin rira sidovung a,
na tamata ra veka ralang ira na'a rira karya.
Ira veka rabrahi vali ma rfamalik verin tamata liak na'a rira inorang verin Yesus Kristus.
Ita torang aka na'a dida inorang
14 Utulis surat ini verin oa,
fara wol mnanat,
na veka uti ma ulola oa.
Velik ne wean inyai,
na'uk utulis surat ini verin oa,
15 boma wean i wol uti obin ma utuan oa,
tevek angangal boku,
na oa bisma mka'a roak ne,
dida vava'at wean inba na'a Ubu Ni sidovung.
Tamata ovi rorang Yesus Kristus rna'a Ubu i nva'at Ni sidovung ini.
Tamata inorang ovi rtaha vaivatul mnga'un tali Ubu rfangrebat Ubu Ni tamata ra,
wean fanderen ovu liri susun ovi rfangrebat rahan a ma ndiri ma lolin.
16 Ita dida inorang nlia agama liak ra,
ba wol tamata isa vali nalak nala ia.
Tamata ra wol rka'a dida inorang,
ti naran amar i Ubu ka'i nfavotuk ia.
Vaivatul ovi rfamalik Yesus wean ini:
Ia neluk tamata ma nfavotuk roak Ia,
Ubu Ni Roh nfalyawang ne,
Yesus Ni vava'at nmalola.
Ubu Ni sansinir ra rtali lanit ratan rsi'ik Ni ngrebat a,
ivar i nfamalik Yesus nban-soru roak lanit ivavan.
Ba tamata ra na'a inba watan rorang Ia,
nata Ubu nala Ia ma nrata lanit ratan.