Snurak na'a vata varu ovu dawan kareda ovi reluk penatua
1 Wean i mtabu tamata i ni tuvu nlia tali oa,
na deka vaim dawan verin ia,
na'uk mtabu ia wean i mungrihi nulu yamam a.
Mungrihi verin varverun ra wean i mungrihi ovu a'am warim ra.
2 Mungrihi verin itvata ra wean i mungrihi nulu renam a.
Msurak vata mnelat ra wean i mungrihi nulu uram ra,
ma malang ma dawan ira.
3 Malang ovu mlobang ma dawan vata varu ovi wol rira tamata roak ma rsi'ik ira.
4 Na'uk wean i varu isa yanan te ubun ra rna'a,
na fwalak verin ira ma ka'i rsi'ik rira rahan teta ra veki,
boma rka'a warira ma raval renarir-yamarira ovu uburira rira farea ra.
Rotu wean inyai,
na rfaturu ne,
rira agama kena,
ovu rfaloling Ubu ralan a.
5 Na'uk vata varu ovi wol rira tamata lahir ma rlobang ira,
na rfaklo'i a'uk rira vava'at verin Ubu.
Ovan-amar,
na raflurut ma dawan verin Ubu ma nlobang ira.
6 Na'uk varu ovi ba'i rotu a'uk inarira lolin,
ira wear tamata ovi rva'at obin,
na'uk ralar ila'a nmata roak.
7 Ba fwangnanang ovu msurak tamata inorang ra ma rsi'ik ma lolin varu ra,
boma tamata ra deka rfasala ira.*
8 Na'uk tamata ovi rafena ma rsi'ik urarir-yanarira ra,
te nlia tali inyai rira rahan teta,
na inyai nfaturu ne,
rafena roak ma rorang Yesus.
Tamata avyai rira sian a nlia tamata ovi wol rorang Yesus.
9 Wean i mane fyadoku varu nararira na'a kareda ni daftar varu ra,
na musti mkya'a ne,
rira varat vutnean nrata,
ovu vali awarira ikisa watan.
10 Tamata liak musti rsi'ik roak ne,
ia ba'i notu afa lolin,
wean i notu lolin yanan ra,
nsi'ik ma lolin mangun ovi rlolak ia,
nfakabava tenan a ma nlobang tamata ovi rorang Yesus,
nlobang tamata ovi rtuan susa ra,
ovu notu lalawatan afa ovi lolin ra.
11 Ba deka fwadoku varu ovi tuvmarmuri ra na'a kareda ni daftar varu ra,
tevek inar urun ma rsifa ewal.
Rotu wean inyai,
na wol inar roak ma rfabana Yesus Kristus Ni karya.
12 Ubu veka nukun vata varu avyai,
tevek wol rot-nala tnorung i rfalak roak verin Ia.
13 Ira vali rvatuk rira amar ma tia ma watan ira na'a tamata rira rahan ra.
Ira wol mane rbosa sian watan,
na'uk rfamalik a'ar tia ma watan tamata liak ra.
Ira inar ma rtafal afa na'a tamata liak rira sala ra,
ovu rfamalik vali afa ovi wol lolin ra.
14 Wean inyai bi,
era ma varu ovi tuvmarmuri ra rsifa ewal,
boma rotu duarir-yanarira ra ma rasusan rira rahan teta ra,
ma tamata ovi wol rorang Yesus wol rdav-nala linga'an ma rfalak sian ita.
15 Ufalak wean inyai,
tevek varu boku wol rorang roak Yesus,
ba rorang watan nitdawan.
16 Wean i vata ovi rorang Yesus rira tiniman ra rvaru,
na musti rlobang ira,
boma deka rotu varvara verin tamata ovi rorang Yesus rira sidovung.
Rotu wean inyai,
boma sidovung bisma nlobang varu ovi wol rira tamata roak ma rlobang ira.
17 Talang dawan kareda ovi reluk penatua,
tevek rfabana ma lolin rira karya ra,
ovu tkati rira farea ra,
na tatafal nala farua.
Na'uk tsi'ik lan dawan ovi rfamalik ovu rair Ubu Ni vaivatul ra.
18 Tevek Surat Ralan nfalak ne,
“Wean i sapi isa nta gandum ma notu ma vatul ra rtub-aling tali kan ra,
na deka mkum-teri sapi yai sumarn a ma wol na'an gandum ra.”
* Surat Ralan nfalak vali ne,
“Tamata ovi rkarya,
na inovan ma rala enarira ra.”*
19 Wean i tamata isa nmangadu dawan kareda i neluk penatua,
na deka mrenar ia.
Na'uk wean i tamata irua te nlia tali inyai rarea afa sala ovi notu ra,
na ki mrenar ira.
20 Oa musti mtabu tamata ovi rotu salasilan ra na'a sidovung waharira ralan ra,
boma tamata inorang liak ra rbobar ma deka rotu afa ovi sala ra.
21 Ufareta oa na'a Ubu ovu Kristus Yesus,
ovu vali Ni sansinir tali lanit ratan ovi nfili ra,
waharira ralan a,
ma morang urun afa ovi ufalak ra.
Deka fwili tamata boku watan,
na'uk msi'ik munuk ira.
22 Deka fwarlan da'in ma fwadoku limam na'a tamata ra ma rdoku dawan kareda.
Wean i tamata ra rotu salasilan ra,
na deka morang ira.
Msi'ik wam ma lolin,
boma mu vava'at nmalola.
23 Oa ba'i nawar oa,
ba era verin oa ma deka menu wear vu watan,
na'uk menu anggur kedan a,
boma nfedan suhut duan ovi rna'a evum ralan a.
24 Tamata boku rira salasilan ra tamata ra rka'a roak,
ba rira salasilan ra lyawan,
na'uk Ubu wol nfaleka inukun verin ira obin.
Tamata liak vali rira salasilan ra wol lyawan obin.
25 Wean inyai vali verin ita ma trea lahir afa lolin ovi tamata rotu ra.
Na'uk wean i wol trea obin,
na afa lolin avyai veka rvotuk watan.