Tamata ovi rair afa ovi wol kena ra
1 Ubu Ni Roh nfalak ma lyawan lahir ne,
na'a amar ovi veka rma ini,
na tamata boku veka rafena ma rorang afa ovi Yesus nair ra.
Ira veka rorang a'uk afa siweang ra,
ovu afa siklabir ovi nait sian ra rair.
2 Tamata ovi rair afa avyai rsiklabir sian.
Ira rotu ma felarira ra wean tamata ovi rorang Yesus,
na'uk ralar ila'a rmata roak.
3 Ira rair tamata ra ma deka rsifa ovu deka ra'an afamtahan boku,
velik ne Ubu nala afamtahan avyai ma tamata ra ra'an.
Ita torang a'uk Yesus,
ovu tka'a afa mnga'un ovi Ubu nair verin ita,
ma tfalak fara weninyai verin Ia,
beti ta'an afamtahan avyai.
4 Afa ovi Ubu notu ra lolin munuk,
ba wol malmoli na'a afamtahan ra munuk.
Ni lolin a,
tfalak fara weninyai verin Ia,
beti tala ma ta'an.
5 Tevek dida falurut ra ovu Ubu Ni vaivatul ovi tala na'a dida falurut ra rotu ma afamtahan ra rmerat.
Tamata ovi rorang Yesus Kristus ralarira wean inba
6 Wean i mair munuk roak afa avyai verin terad a valid ovi rorang vali Yesus,
na oa veka weam tamata i nfabana ma lolin Kristus Yesus Ni karya.
Oa muan kesratan,
boma mu inorang ntafal,
ovu mka'a roak afa ovi nair oa tali Ni Surat Ralan a.
7 Deka bwatuk mu amar ra na'a ubud-nusid rira tomu ovi rangal Ubu Ni vaivatul ra.
Na'uk mair tenam ovu afa lolin ra,
boma mu vava'at nfaturu ne,
morang urun Ubu.
8 Wean i tfangrebat ralad ra ovu Ubu Ni vaivatul ra ma torang Ia,
na lolin lia i tsi'ik tenadida,
boma tangrebat,
tevek Ubu naflahar ita na'a lanit ivavan ini ovu vali na'a lanit ratan.
9 Ning vaivatul avyai kena munuk lahir,
ba did tinemun torang a'uk.
10 Wean inyai bi,
tkiwal ma tkarya ma dawan,
tevek tfaklo'i a'uk dida vava'at ra verin Ubu i nva'at a,
ma nsikat tamata ra tali rira salasilan ra,
ma rira vava'at kakiwal.
Ia notu wean inyai verin tamata ra munuk,
na'uk nsi'ik Ni tamata ovi rorang Ia nlia tali tamata liak ra.*
11 Mair afa avyai munuk verin tamata ra,
ovu fwareta ira ma rorang afa ovi fwalak ra.
12 Deka msi'ik watan ma tamata ra wol ralang oa,
tevek tuvmarmuri oa.
Na'uk meluk banbanan lolin verin tamata ovi rorang Yesus.
Ira veka rsi'ik mu vaivatul ra,
afa ovi motu ra,
mu rala lolin a,
mu inorang a verin Yesus Kristus,
ovu mu vava'at a nmalola.
13 Iva'um ma bwas Surat Ralan verin tamata ra.
Fwalyawang Ubu Ni vaivatul ra verin tamata ra ovu msurak a mair ira.
Motu lalawatan afa avyai,
ti naran i uma.
14 Deka mublufang ma fwabana ngrebat i Ubu Ni Roh nala roak verin oa.
Ia nala ngrebat yai verin oa na'a amar i dawan kareda ovi reluk penatua* rfadoku limarira ra na'a oa,
ovu vali tamata boku na'a inyai rfamalik mu karya ovi veka motu na'a amar ovi veka rma ini.
15 Msi'ik ma lolin ma deka mublufang ning vaivatul ra.
Iva'um ma morang afa avyai,
boma tamata ra munuk rsi'ik ne fwabana ma lolin Ubu Ni karya.
16 Msi'ik ma lolin mu vava'at ovu afa ovi mair ra.
Iva'um ma fwabana afa ovi air roak verin oa.
Motu wean inyai,
na Ubu veka nsikat oa ovu tamata ovi rarenar mu vaivatul ra,
tali bira salasilan ra,
ma bira vava'at kakiwal.