2
एक लकवो रोगी को छोखो करबो
(मत्ती 9.1–8; लूका 5.17–26)
1 कोई दनां क बाद मं जद यीशु कफरनहूम मं पाछा आया।तो सारा मनख्यां मं यो समचार फॅलग्यो ।क ईसु घर मं छ । 2 फेर उ घर क मॅलाड़ि अर बार्णा प अतना मनख भेळा होग्या। क ऊँठी तल धरबा की बी ठाम कोई न्ह बची। अर जद ईसु वांक काण परमेस्वर की छोखी खबर बतार्या छा। 3 तो उ बगत मं कोई लोग एक लकवो मारीयो बेमार मनख न च्यार मनख्यां खाट प उठार ऊंक गोड़यां लाया। 4 पण,घणी भीड क कारण व ऊंक गोड़ॅयां न्ह पुग सकॅ्या।ई लेखॅ व घर का टापरा प चढ़'र ऊ घर मं ज्यां ईसु छा ऊंकॅ ऊपर का टापरा प बातो पाड़ द्यो।फेर जी खाट प उ लकवो मारीयो बेमार मनख पड़यो छो,उ खाट न ईसु क सामॅ तणॅ लट्काद्या। 5 ईसु न वांका बस्वास को काम देख'र ईसु न लकवो मारीयो बेमार मनख सुं खी,हे म्हारा बेटा,ज्ये पाप थनॅ कर्या छा । व्ह पाप माफ होग्या। 6 तो उ बगत यहूदियां का निम सखाबाळा कोई मनख बी ऊंठी बठया छा।व अपणा -आप मन मं बच्यार करबा लाग्या। 7 यो मनख अस्यांकी बात खामी ख छ,?यो तो परमेस्वर को अपमान कर्यो छ।खाली परमेस्वर क अलावा मनख्यां का पाप न कुण माफ कर सकॅॅ छ? 8 ईसु न हाथ्युहात अपणा मन मं जाण'र क वांक-वांक मन मं अस्यां काई बच्यार कर रिया छ।अर ईसु न वां सुं खी,थें,थांका मन मं खामी अस्यां बच्यार कर रीया छ। 9 ये दो बात मं कस्सी बात ख बो आसान छ?”ई लक्वो मारयो बेमार मनख सुँ या खबो क थारा पाप माफ होग्या” य्ह खणी ,न्हातो “बेटा,उठ,थारी खाट ले'र घरां चाल पड”? 10 पण जि सुँ थें जाणॅ जावॅ ,क * मनख को बेटो-परभु ईसु मनख क रूप लेर ई दुनिया मं आयो।मनख को बेटो ई धरती प सारा मनख्यां का पाप न माफ करबा को बी अधीकार छ।फेर ईसु न उ लकवो मारया बेमार मनख सुं खी। 11 म्हूँ थ सुं खर्यो छूं, “तु उठ! अर थारी खाट न उठा'र थारॅ घरां चल जा”। 12 अर ऊ झट सुं उठ'र,अपणी खाट ले'र सारांई क सामॅ सुं खडर चलग्यो।य्ह देख'र सारांई सोच मं पड़ग्या ।व सारांई परमेस्वर की महमा कर'र खबा लाग्या,”म्हां न अस्यांका काम कदी बी न्ह देख्या।
ईसु न लेवी चेलो बणाबा काण बलायो
(मत्ती 9.9–13; लूका 5.27–32)
13 फेर ईसु घर सुं खढ़'र पाछा झील क कराड़ प खढ़ ग्या।अर सारी भीड़ बी ऊंकॅ गोड़यां आरी छी।अर ईसु व्हांक तांई उपदेस देबा लाग्यो 14 अर चालता-चालतांई ईसु हलफई का बेटो लेवी न चुंगी की चोकी प बठयो देख'र ईसु न उ सुं खी,म्हारॅ पाछॅ होजा! अर म्हारो चेलो बणजा!, अर उ उठ'र ईसु क लारां होग्यो। 15 ईकॅ बाद मं ईसु अर ऊंका चेला लेवी क घरां जा'र जीम्बा लाग्या। अर ऊंठी चुंगी लेबाळा अर घणा मनख ज्यानॅ सारा मनख पापी समझॅ छा, व बी ईसु अर ऊंका चेला क लारां जिम्बा लाग्या, क कस्यां ईसु क पाछॅ चालबाळा घणा मनख होग्या । 16 अर यहूदियां का निम सखाबाळा मनख ज्ये फरीसी नाऊँ की धार्मीक सभा का छा,व या देख'र क ईसु चुंगी लेबाळा अर पापी मनख्यां क भेळा मं खावॅ पीवॅ छ!”, वानॅ ईसु का चेला सुं बुझी,क ईसु चुंगी लेबाळा अर पापी मनख्यां क भेळा मं खामी खावॅ पीवॅ छ। 17 ईसु व्हांकी बातां सुण'र व्हां सुं एक खावत सुँ खी, क छोखा-भला मनख्यां काण डाकटर न्ह छाव पण बेमार मनख्यां क तांई छाव छ।म्हूँ, ज्ये लोग धर्मी मनख क नांई मन मं सोच'र घमण्ड रखबाळा न बलाबा न्ह आया पण ज्ये लोग मन मं पाप समझ छ व्हांको मन बदलबा काण बलाबा आयो छूँ।
उवास रह'बा को सवाल
(मत्ती 9.14–17; लूका 5.33–39)
18 बत्तीसमा देबाळा यूहन्ना का चेला अर परीसीयां का चेला उवास रह'रीया छा ,पण ईसु का चेला न्ह रह'रीया छा।तो एक दन कोई मनख न ईसु क गोड़यां जा'र बुझी,क बत्तीसमा देबाळा यूहन्ना का चेला अर परीसीयां का चेला उवास रह'रीया छ,पण थारा चेला कस्यां उवास न्ह रह'रिया?। 19 तो ईसु न वा काण ढास्टान सुँ ज्वाब द्यो ,क ज्यां तांई जानाळा लाड़ा क लारां छ व्हांतांई जानाळा भुखा न्ह रह' सकॅॅ छ, व्हांकतांई या बात छोखी कोई न्ह,क ज्यातांई लाड़ो व्हांका लारां छ व उवास रह'र सोक न्ह कर सकॅॅ। 20 पण व्ह दन आवगा, जद लाडो वा सुं न्हाळो हो जावगो ऊ बगत मं व उवास रह'र सोक करगा अर दिखगा क व दु:ख मं छ। 21 म्हूँ थां सुं ओर एक ढास्टान खुँ,कोई बी कस्यां नया लत्ता सुँ पराणा लत्ता प बारो बन्द करबा क तांई न्ह सींऊँगा। अगर व अस्यां करॅ तो ये नया लत्ता धोबा क बाद मं समट जावगा अर पूरो लत्तो फाटजाऊगो अर पहलीयां का बारो सुँ ज्यादा बारो पड़जाऊगो। 22 अस्यां कोई बी नया अंगूर का रस न पराणा चामडा का बणियां दीऊडो मं कोई न्ह भर्यो जावॅ।अगर व अस्यां करॅ तो अंगूर को रस जद पराणा चामडा को बणियां दीऊडो फूलजाऊगो तब उ अंगुर को रस दीऊडा क पोल पाड़''र तणॅ ढुळ जावॅगो, अर दीऊडो अर अंगुर को रस दोनी नष्ट हो जाऊगा। ई सुँ नया अंगुर को रस नया चामडा का दीऊडा मं भर्यो जाणी छावॅ छ।
आराम हाळो दन क बारा मं सवाल
(मत्ती 12.1–8; लूका 6.1–5)
23 अस्यां होई क यहुदियां का † आराम हाळो दन -सातवा दन यहुदियां क निम क अनुसार आराम हाळो दन छ क कस्यां परमेस्वर न छ: दन तांई सबी रच्चाया अर सातवा दन मं आराम करयो,ई लेख सकॅ्रवार क दन बुढ़यां सुँ थावर क दन बुढ़या तांई आराम हाळो दन छ।ऊ दन मं लोग-दणी परमेस्वर क आराधना करॅ छ,ई लेख कोई बी काम न्ह करॅ छ।आराम हाळो दन मं ईसु अर ऊंका चेला गऊँ का माळ मं होर जारीया छा।चालता-चालता ऊंका चेला धंग्यां तोड़बा लाग्या 24 पण कोई परीसि मनख्यां न देख्या क ईसु का चेला कांई कर्या छ।तो वांनॅ ईसु सुं बुझी,देख,थांका चेला आराम हाळो दन मं धंग्यां तोड़'बा लाग्या उ काम कांई काण आज कर्या छ,ज्ये आराम हाळो दन मं न्ह कर सकॅॅ छ । 25 फेर ईसु न वां काण ज्वाब द्यो ,क कांई थां न कदी बी पबित्र सास्त्र मं न्ह बाची छी क राजा दाऊद न घणा साल पहली कांई करी छी जद राजा दाऊद अर ऊंका साथीडा भुखा छा अर खाबा क तांई व्हांक गोड़ॅयां कांई बी कोई न्ह छो? तब वां न कांई करी ? 26 क जद आबियातार नाऊंको ‡ महायाजक-परमेस्वर क मन्दर मं सेवा अर आराधना करबाळा मं मुख्य छ।महायाजक छो,तब दाऊद न परमेस्वर का मन्दर मं जा'र ज्ये परमेस्वर का नाऊं सुँ दान की रोटीयां चढ़ा मल्ली छी।व्ह रोटियां खाई,व्ह दान की रोटीयां याजकां न छोड़'र कोई काण बी खाबा को निम कोई न्ह छो।पण राजा दाऊद न व्ह रोटीयां खाई अर ऊंक साथीडा काण बी दी,तो परमेस्वर न उ काम काण वां नॅ अपराधी न्ह समझीया” 27 तो ईसु न वा सुं खी,क आराम हाळो दन मनख्यां क भलाई काण बणायो ग्यो छ ।पण मनख आराम हाळो दन काण न्ह बणाया ग्या छ। 28 ई लेखॅ मनख को बेटो आराम हाळो दन को बी परभु छ।
*2:10 मनख को बेटो-परभु ईसु मनख क रूप लेर ई दुनिया मं आयो।
†2:23 आराम हाळो दन -सातवा दन यहुदियां क निम क अनुसार आराम हाळो दन छ क कस्यां परमेस्वर न छ: दन तांई सबी रच्चाया अर सातवा दन मं आराम करयो,ई लेख सकॅ्रवार क दन बुढ़यां सुँ थावर क दन बुढ़या तांई आराम हाळो दन छ।ऊ दन मं लोग-दणी परमेस्वर क आराधना करॅ छ,ई लेख कोई बी काम न्ह करॅ छ।
‡2:26 महायाजक-परमेस्वर क मन्दर मं सेवा अर आराधना करबाळा मं मुख्य छ।