¹ Nontan na timpon wares Jesus shi Nasarit, waray toon emantosho shima sakop ni Jodia ja nay-arawi shi kad-an ni totoo. Jet say awag sha so nontan na too, si Juan ja para bonjag. ² Say kowan to so nonta ira totoo ja dimaw nodtan, kowan to ey, “Baliwiyo i ngaaw wa wared nemnem jo, ta sota pantoshayan nen Apo Shiyos ja naypadto nonta bayag da, shanshani ma.” ³ Saja si Juan, si-katoy kaytoshongan nonta padto nen Isaias nonta bayag da ja kowan to ey wara aliy toon ikeljaw toy esel to shima dogad ja nay-arawi shi kad-an ni totoo, ja ikowan to ey, “Pansagana kayo ta shanshani ma aliy imotok nen Apo! Singpet joy shalan na pan-akshan to!”

⁴ Say baro nen Juan, nagshengan: sota na-abel la bowek ni animal ja kowan sha ey camel i toka osala bengat, ja ebalkesan ni kolti. Jet nagshengan ngoy toka kena, ja shoron tan shanom ni dinowan. ⁵ Sota ira tood Jerusalem, tan eshom ma toon nanbaley shi probinsiya ni Jodia, tan sota ira toon nanbaley ja nay-esop shima ebadeg ga pa-dok ja kowan sha ey Jordan, ireka mansisina-dat ja ondaw son si-kato. ⁶ Inkowan shen emin i basol sha say pekawanan ira nen Apo Shiyos; isonga binonjagan ma ira nen Juan.

⁷ Nem idi inon-an nen Juan ira sota Parisiyo, tan sota ira Sadosiyo, ja emandaw son si-kato, ja kowan sha ey ira manpabonjag ngo son si-kato, kowan nen Juan son si-kara ey, “Si-kayo, singa oleg i ogadiyo! Say kowan jo emo, mebedin na disi-an joy penosa nen Apo Shiyos no manpabonjag kayo bengat? ⁸ Nem enshi! Mesepol la ma-sas shi ogadiyo ey inbebawi jo sota basol jo. ⁹ Karejo panshindan sota kowan jo ey si-kayo ket poli shakejo nen Abraham. Enshi, eg on-anay iyay! Tep si Apo Shiyos, mebedin ton osalen i bato ja palsowa-en ni too jet ikowan to ey poli nen Abraham. ¹⁰ Jet niman, waray naysagana ja may-eshig ey wasay ja maywa-tek nodta damot ni kakadasan na eg ondames ni mapteng. Sajay iren kakadasan, mebetang et maypool shi apoy.”

¹¹ Jet kowan pay nen Juan ey, “Nem si-kak, dimawak ali ja shanom i inpamonjag ko son si-kayo, ni inpanbebawi jo, nem waray ondaw alin maysa-dat son si-kak ja ebadbadeg i panakabalin to nem say si-kak. Jet ekak pay maykeshi ja angken baga-en to koma ja mengkal ni sapatos to. Sotan aliy onbonjag son si-kayo ni Ispirito Santo nen Apo Shiyos, asan pay ya apoy.” ¹² Jet si Juan, in-arigan to ira, ja kowan to ey, “Sotan aliy may-eshig ey mengita-nil ni bekas shi taap. Sota bekas, isingpet tod tado-an, nem sota taap, ipool tod apoy ya emanshedang ni olay ja eg ma-ma-shep.”

¹³ Nontan, edapo ngod Galilia si Jesus ja ondaw shima kawad-an nen Juan, say en manpabonjag ngo son si-kato shima pa-dok ja kowan sha ey Jordan. ¹⁴ Nem si Juan, istay en-asneng, ja kowan to so nen Jesus ey, “Si-kak komay ondaw son si-kam ja manpabonjag; aliwen si-kam et ngo mowan i ondaw alin manpabonjag son si-kak!”

¹⁵ Nem si Jesus, simongbat ja kowan to ey, “Eti, dagam et niman. Bonjagimak ma. Mapteng i itongpal ta so ni bilin nen Apo Shiyos maypangkep niyay.”

Jet si Juan, timolok. ¹⁶ Idi ebonjagan ma si Jesus, kima-jat ta shagos nodta shanom et nay-inshas ngon edo-katan i dangit. Jet inon-an toy Ispirito Santo nen Apo Shiyos ali ja singa inges toy itsora ni kalopati ja emandespag alin onsepa son Jesus. ¹⁷ Jet nontan met laeng, wara aliy esel nen Apo Shiyos ja edapod dangit ja kowan to ey, “Si-kam i Anak ko jet ensemek taka, tan si-kam i naka pandadsaki.”