¹ Hitay itulaˈ u ja hitay Ebanghelyo an manapit ay ni omaˈ-atan Hesu Kristo an Empfalay Apo Jos. Hay nete-aana ja ² chin inalin Apo Jos an impatulaˈ na ay profeta Isaiah hi nangarjana hi, “Tayya an honakhoˈ hay mangpangpangullu an manghakhana ay ni agwum.”^{a 3} “Gwa han khun mun-ugwap hichi let-ang an khuna allon hachi tatakhu hi, ‘Epaphod ju hini agwun ni umali an Apo. Anchongon ju hana nakillokillo an chalan ta maphod hi agwuna.’”^{b 4} Ja emmat, ti tinnig cha hi John Bautista hichi let-ang ja tinudtuchugwana hachi i nunchongor. Ja hay engkasaba na ja, “Muntutuju aju ja chin-ug ju hana pfahor ju ja mumpabautisar aju ta pakawanon Apo Jos hana pfahor ju.” ⁵ Ja cho-ocho-or chin tatakhu an narpu ad Jerusalem ja hana apfuglapfuglay ad Judea an immuy chin agawwachaan John. Khun cha ipudnu hana pfahor cha hon numpabautisar cha ay John hichi gwanggwang an Jordan.

⁶ Han lopfong John ja na-apfor an chutchut chi kemer, ja chin pfalekeh na ja lalat. Hay khuna ijilog ja chuchun ja chilu. ⁷ Ja khun mangaskasaba an allona hi, “Gwacha han umali an metob ay ha-in an munnaud an napfagto ja achi mapfalin an miˈpadchungaˈ ay hija.^{c 8} Ha-in ayya ja binautisaraˈ chaˈju hi chanum, muti hija ja bautisaran chaˈju hi Espiritu Santo.”

⁹ Chin khun puntudtuchugwan John ja immuy hi Hesus an narpu ad Nazaret an provincian chi Galilee, ja i numpabautisar ay John hichi Jordan. ¹⁰ Unot chimma-ar hi Hesus ja tinnig na an nipfughor ad langit. Ja tinnig na chin Espiritu Santo an nun-ohop an amat hi kaloma chin tikhaw na, ja numpattoˈ ay hija. ¹¹ Ja gwa han chengngor cha an hapit an narpu ad langit an nangali ay hija hi, “He-a hini podpodhoˈ an Empfalay u. Mun-an-anlaaˈ khapo ay he-a.”

¹² Amat hichi ja enedchong ni Espiritu Santo hi Hesus an umuy hichi let-ang. ¹³ Ja nihichi hi apat chi polo hi arkhaw ja tenopngatopngan Satanas. Ja gwah chi hana atattata-ot an animar muti gwa hachi angher Apo Jos an immuy ay Hesus an nanulungan ay hija.

¹⁴ Napfalin an nipfalud hi John ja numpfangngad hi Hesus ad Galilee an i nangaskasaba ay ni Ebanghelyo an narpu ay Apo Jos. ¹⁵ Khuna allon hi, “Tayya an nachakngan chin arkhaw an eneˈchan Apo Jos. Achi mapfajag hot machakngan hini Pun-ap-apugwana hi tatakhu. Hotti chuˈkhon ju hana pfahor ju ja pinati ju hitay Ebanghelyo an khun u itudtuchu.”

¹⁶ Gwa han namenghan ja enenggwan Hesus hichi pingngit ni Baybay ad Galilee ja tinnig na cha Simon ay Andrew an hin-akhi. Gwa an khun cha manapfukur ti tamu chay mangachiw. ¹⁷ Niˈhapit hi Hesus ja inali na hi, “Umali aju ta mitnud aju ay ha-in, ta gway honakhoˈ an i mun-ajag hana tatakhu ta miˈ-unud cha ay ha-in.” ¹⁸ Amat hichi ja tenaynan cha hachi tapfukur cha ja nitnud cha ay Hesus.

¹⁹ Gwa an emmoˈ-ojay cha ja tinnig khu Hesus cha James ay John an hin-akhi an empfalay Zebedee. Inu-umpfun cha ay chuy pfalangay cha an khun cha ephod hachi tapfukur cha. ²⁰ Enajakhan Hesus cha chuy an hin-akhi ja nitnud cha khu ay hija. Hotti tenaynan cha chin ammod cha an hi Zebedee ja hachi numpun-ibpfa na an khun meˈpfoˈla ay hija.

²¹ Napfalin hay hato ja immuy cha Hesus ad Kapernaum. Unot nachakngan chin Hapfachu an ngilin chi Hudju, ja immuy cha hichi sinagoga ja ente-an Hesus an muntudtuchu. ²² Ja nanor hachi tatakhu chin panudtuchu na, ti matikhaw cha an gway apfalinana, an achi amat hachi memehtolon chi urchin Moses.

²³ Ay chuy gwot ja gwa han lala-e ay chuy sinagoga an nahuhuˈlungan hi napukhit an ispiritu. Ja nungkii ja inali na hi, ²⁴ “Hesus an eNazaret! Nga chah chi atom ay chaˈmi? Un a chah immali an mangdusa ay chaˈmi? Anilaˈ he-a, an he-a hini nasantuwan an Empfalay Apo Jos.” ²⁵ Ja himmingar hi Hesus ja inali na ay chuy napukhit an ispiritu hi, “Khomegkhenong a, ja makak aot!” ²⁶ Unot inalin Hesus hitay ja nun-egwakhot chin napukhit an ispiritu hichuy lala-e an nihuhuˈlungana ja iniˈgwap na an nungkii ja nakak. ²⁷ Nanor cha an amin ja khun cha munhahapit an khun cha allon hi, “Ngay ngachah tay nabnab-on an panudtuchu? Anong un hana nehohoˈlong an napukhit an ispiritu ja gway apfalinana an mummanjar ay chicha hon inunud cha hini allona.” ²⁸ Ja nunchongor hi apfuglapfuglay hichi ad Galilee hana ena-enat Hesus.

²⁹ Nakak cha Hesus chin sinagoga ja empacheh cha an umuy hi pfalay cha Simon ja hi Andrew, ja nitnud cha James ay John. ³⁰ Gwah chi chin pfupfai an ammod chin ahagwan Simon an numpepekheng, ti mapfi-ah han potang na. Unot ne-atam cha Hesus ja impa-innila cha ay hija. ³¹ Immuy hi Hesus ay chuy munchokhoh ja pfenohgwat na. Na-aan gwot chin potang na ja enhakhanaana cha Hesus hi anun cha.

³² Gwa an na-uynu hichin hukhit ja in-uy cha ay Hesus hachi mumpunchokhoh ja hachi nun-ahuˈlungan hi napukhit an ispiritu. ³³ An amin chi tatakhu ay chuy an pfuglay ja na-amung cha hi pfalay cha Simon. ³⁴ Ja empatenong Hesus hachi numpfino-ob-on an chokhoh hachi cho-or an tatakhu. Nun-epakak na khu chin cho-or an nun-apukhit an ispiritu. Ja agkhuy na nunhapiton hay hachi napukhit an ispiritu, ti anila cha an hija hini Hennag Apo Jos an Mamahhod muti achi na podhon an chichay mangpfaag.

³⁵ Chin nun-inggwiˈgwiit hi herhelong ja pfimmangon hi Hesus ja nakak ay chuy an pfalay ta immuy han lukhar an ma-id takhu ta i mungkalalag. ³⁶ Unot pfimmangon cha Simon ja hachi numpun-ibpfa na ja i cha hiningit hi Hesus. ³⁷ Un chaagkhu chinakngan ja inali cha hi, “An amin hana tatakhu ja khun chi-a i hingiton.” ³⁸ Ja inalin Hesus hi, “Umuy ta-o chamchama hana uchumna an nun-ehnot an pfuglay ta gway atoˈ an mungkasaba khu ay chicha. Ti hijah tay hini immaliyaˈ.” ³⁹ Amat hichi ja immuy hi Hesus hana apfuglapfuglay ad Galilee ja khun mangaskasaba hachi sinagoga cha. Ja nun-epakak na hachi napukhit an ispiritu an nun-ehoˈlong ay cha chuy uchumna an tatakhu.

⁴⁰ Gwa han namenghan an immuy han lala-e an na-unit ay Hesus. Nunheppe ja numpakpaka-ahi an nangali hi, “Apo, otong hini apfalinam hotti podhom ayya ja epatenongaˈ.” ⁴¹ Ninignikhan Hesus hitay an na-unit ja hen-a na, ja inali na hi, “Podhoˈ. Hotti tomenong a.” ⁴² Ja emmat an na-aan gwot chin unit na. ^43,44 Ja naˈnaˈ-allon Hesus ay hija hi, “Achi la-ahna ja gway im pangar-arjan ay tay an na-at ay he-a. Hay atom ja umuy a ay ni pachi ta i a mumpatikhaw an temmenong a. Ja ipidaton mu ay hija hini allon ni urchin Moses an khun idaton ay Apo Jos an panginnilaan an umannung an na-aan hini unit mu.” ⁴⁵ Muti hichuy lala-e an temmenong ja agkhuy na inunud chin inalin Hesus. Immuy ja khuna hapihapiton chin na-at ay hija. Nunchongor hichuy an enat Hesus hotti ma-id atona an umuy hachi pfuglay an achoˈlan chi tatakhu, ti tinnig cha ayya hon hemmajomhom cha ay hija. Hotti un khun umuy hachi lukhar an ma-id nunheto, muti cho-or chamchama hachi tatakhu an khun umuy ay hija an narpu hi apfuglapfuglay.