¹ Gwa khu han ohan arkhaw an ngilin ja immuy hi Hesus hichi sinagoga ja gwa hichi han lala-e an napechoy chi oha an ngamoy na. ² Ja henehemmonot hachi na-amung hi un epatenong Hesus hichuy lala-e ay chuy an arkhaw chi ngilin ta gway ipapfahor cha ay hija. ³ Ja inalin gwot Hesus ay chuy napechoy chi ngamoy na hi, “Umali a heto.” Ja immuy. ⁴ Ja inalin Hesus hachi tatakhu hi, “Allon ju adchiya tugwali nu ngay allon ni urchin Moses hi aton ta-o hi un ngilin. Tomolong ta-o chah hi takhu wenno mun-ephod ta-o hi napukhit? Inali na chah hi takhuwon ta-o hini ohan takhu wenno patajon ta-o?” Muti khemmegkhenong cha. ⁵ Intikhaw Hesus hachi atakhutakhu ja pfimmungot, ti napukhit chi punnomnomana hachi pfimmatoy nomnom na. Ja inalin Hesus chin lala-e hi, “Uˈjachom hini ngamoy mu.” Unaot inuˈjad ja numpfangngad mahpay an mechon chin ngamoy na. ⁶ Amat hichi ja nakak hachi Farisee hichi sinagoga ja i cha niˈ-amung hay hachi allon cha an Herodianes^a ta i cha punhahappitanan hay aton an mamatoy ay Hesus.

⁷ Nakak hi Hesus ja hachi disipolo na ay chuy an pfuglay ja immuy cha hichi pingngit chi baybay. Ja cho-or hachi eGalilee an nitnud ay chicha. Ja cho-or khu hachi narpu ad Judea, ⁸ ja ad Jerusalem, ja ad Idumea, ja ay chuy chammang chi gwanggwang an Jordan. Ja gwa hana narpu ad Tiro ja ad Sidon ja ay chuy nunleneˈgwoh an apfuglapfuglay. Immuy cha ay Hesus ti chengngor cha hana natnat-on an khuna aton. ⁹ Cho-or hachi tatakhu hotti inalin Hesus hachi disipolo na ta i cha tikhan hay pfalangay hi punlukhanana ta pfumpfumtaw ta achi mahajomhoman. ¹⁰ Ti lini-ub hachi cho-or an tatakhu hi Hesus, ja anong un hachi mumpunchokhoh ja munhihiˈ-ig cha an i mehnot ta gway aton cha an maneˈkhad ay hija ta tomenong cha. ¹¹ Tinnig ayya hachi tatakhu an nun-ahuˈlungan hi napukhit an ispiritu hi Hesus hon nunheppe cha hon nungkii cha an nangali hi, “He-a hini Empfalay Apo Jos!” ¹² Ja inhingar Hesus ta ma-id i cha pangar-allan ay ni nitakhuwana.

¹³ Napfalin hay hato ja inti-id Hesus han pfulludna, ja enajakhana hachi penhod na an itnud. Ja un chaagkhu na-amung ja ¹⁴ pinilin Hesus han himpolo ta chugwa an ngenadnana hi apostol ta mimidchum cha ay hija ta gway honakhona an i mangaskasaba. ¹⁵ Ja ichatana chicha hi apfalinan an mangpakak hi napukhit an ispiritu an khun mehoˈlong.

¹⁶ Hay hato chi pinili na, an hi Simon an ngenadnana hi Peter, ¹⁷ ja cha James ay John an empfapfalay Zebedee an ngenadnan Hesus hi Boanerges, an hay podhona an hapiton ja amat hi ichor, ¹⁸ ja hi Andrew, ja hi Philip, ja hi Bartolomew, ja hi Matthew, ja hi Tomas, ja hi James an empfalay Alfeus, ja hi Tadeus, ja hi Simon an oha an Zealot, ¹⁹ ja hi Judas Iskariot an hijay mangngina ay Hesus.

²⁰ Amat hichi ja immanamut cha Hesus. Ja na-amung gwot hachi tatakhu hotti ma-id chi hay aton cha Hesus an mangan. ²¹ Unagkhu inannilan chin a-akhin Hesus hachi naˈna-at ja empacheh cha ta i cha ekak ay chuy nunnanangngana. Ti chengngor cha chin khun allon hachi tatakhu hu-un emmangaw hi Hesus. ²² Ja inalin hachi memehtolon chi urchin Moses an narpu ad Jerusalem hi, “Nahuhuˈlungan mangkay hitay an hi Hesus ay Beelzebub an hini ap-apon chi nun-apukhit an ispiritu, ja un kaykhu hi Beelzebub hini nangchat ay hija ay ni apfalinana an khun mangpakak hi napukhit an ispiritu.” ²³ Hotti enajakhan Hesus chicha ja inali na hitay an pangngarig, “Nomnomon ju adchiya. Un chah hi Satanas hon empakak na hini achor na? ²⁴ Nu khulat ta hana tatakhu ay ni oha an himpangili ja ma-a-aggwa cha ta un chicha khu hon numpapattoy cha, hot un loˈtatna hot mapaˈ-i hinuy an himpangili. ²⁵ Amat hina khu nu itannong hana hen-a-amma hon numpapattoy cha, hot loˈtatna hot munhihijan cha. ²⁶ Omaˈ-at hina khu nu hi Satanas hon neˈpatoy khu hay hana in-inupfor na. Ja khulat ta amat heto chi ina aton hot ma-a-aggwa hini pun-ap-apugwana hot mapogpog. ²⁷ Hi Satanas ja amat ay ni mapfi-ah an takhu an mumpfantay ay ni pfalay na. Nu khulat ta gway mamhod an mangakaw ay ni khina-u na ja ma-id olog na. Khahin un kha-utan hinuy mapfi-ah an takhu ja un ma-ala hana khina-u na.

²⁸ Umannung hitay alloˈ ay chaˈju, an mapakawan an amin hana pfumahulan chi tatakhu ja hana pangallan cha hi napukhit an mipfuhur hi ibpfa chah takhu. ²⁹ Muti hana munhapit hi mipfuhur ay ni Espiritu Santo ja achi cha mapakawan, ta pfahor cha ja ingkhana.” ³⁰ Inalin Hesus hitay khapo ta pinahiw cha hini Espiritu Santo an gwa ay hija hi nangarjan cha hi un hi Satanas chi nangchat ay ni apfalinana.

³¹ Emmatam chin ammod Hesus an hi Mary ja chin a-akhi na an linala-e ay chuy agawwachaana. Timmataˈchug cha hichi pfutayna ja empa-ajag cha hi Hesus. ³² Inu-umpfun hi Hesus an linili-ub chin cho-or an tatakhu ja inali cha ay hija hi, “Chiya an gwacha hi inam ja hana a-akhim an timmataˈchug cha hichi pfutayna, ja khun chi-a epa-ajag ta miˈhapit cha ay he-a.” ³³ Ja inalin Hesus hi, “Aa kaykhu, muti un chah chicha chi ammod u ja a-akhiˈ ja angkhay?” ³⁴ Intikhaw Hesus hachi inu-umpfun an nangakhawwong ay hija ja entoloy na an nangali hi, “Hay hato khu chi a-ammod u ja a-akhiˈ. ³⁵ Ti hay hana mangat ay ni penhod Apo Jos ja chichay ma-ipfilang hi a-akhiˈ ja chichay a-ammod u.”