10
Sɛm nɛ Kam nɛ Yaafɛɛtɩ pe-liɖe taa ñɩma tɔm
(Ɩcɔnɩ 1 Tɔm kɛdʋʋ cɔlɩɩ 1.5-23)
1 Kigiluu tɛʋ wayɩ lɛ, Nowee pɩyalaa, Sɛm nɛ Kam nɛ Yaafɛɛtɩ palʋlɩ piya. Pe-piya nɛ pa-sɛyɩnaa pa-hɩla yɔ:
2 Yaafɛɛtɩ lʋlɩ: Goomɛɛrɩ nɛ Maagɔɔgɩ nɛ Madayii nɛ Yavaanɩ nɛ Tubaalɩ nɛ Mɛsɛɛkɩ nɛ Tiiraasɩ. 3 Goomɛɛrɩ ñalʋlɩ: Asɩkenaazɩ nɛ Riifaatɩ nɛ Togarɩmaa. 4 Yavaanɩ ñalʋlɩ: Eliisaa nɛ Taarisiisi nɛ Kitiim nɛ Rodanim. 5 Ḿba lʋlɩnɩ ɛyaa ḿba pamɩzɩ ɖama pɔsɩ nɔsɩ nɛ tɛtʋ ndʋ lɩm cɔ-tʋ kondiko yɔ tɩ-taa yɔ. Ɛyaa mbaa lɛ, Yaafɛɛtɩ liɖe taa ñɩma, pekpeɣli ɖama pa-kʋnʋmɩŋ nɛ pe-cejewe nɛ pa-ajɛɛ pa-taa.
6 Kam ñalʋlɩ: Kuusi nɛ Misirayim nɛ Puuti nɛ Kanaanɩ . 7 Kuusi ñalʋlɩ: Sebaa nɛ Hawiilaa nɛ Sabɩta nɛ Raamaa nɛ Sabɩteka. Raamaa ñalʋlɩ: Saabaa nɛ Dedaanɩ. 8 Kuusi ñalʋlɩ ɖɔɖɔ Nemeroodi. Ɛ́lɛ yɩɖɛ calɩnɩ sɛʋ tɛtʋ yɔɔ. 9 Ɛɛkɛ ɛgbam sɔsɔ KƖPAƔLƲ ɛsɩndaa. Mbʋʋ potuki nɔɔyʋ, eduuye se: "Ɛkɛ ɛgbam sɔsɔ KƖPAƔLƲ ɛsɩndaa ɛzɩ Nemeroodi yɔ". 10 Tɛtʋ sɔsɔtʋ ndʋ tɩcalɩ wɛʋ e-kewiyaɣ taa yɔ, ndʋʋ yɔ: Baabɛɛlɩ nɛ Erɛɛkɩ nɛ Akaadɩ nɛ Kalinee, Siineyaarɩ a ɛjaɖɛ taa. 11 Ɛkʋyɩ ɛjaɖɛ ńɖɩ ɖɩ-taa lɛ, ewolo Asiirii ñɩnɖɛ taa nɛ ɛma ɖɩsɩ Niiniivi tɛtʋ nɛ Rehobooti Iiri ñɩndʋ nɛ Kalaa ñɩndʋ pa-taa, 12 nɛ Reesɛɛnɩ ñɩndʋ taa Niiniivi nɛ Kalaa tɛtʋ sɔsɔtʋ pɛ-hɛkʋ taa.
13 Misirayim lɛ, Luudi nɛ Eyinam pɛ-tɛtʋ taa ñɩma, nɛ Lehaabɩ samaɣ nɛ Nafɩtuu ñɩma, pɔ-cɔzɔ. 14 Ɛnʋ ɖɔɖɔ lɛ Paatɩrɔɔsɩ nɛ Kasiluu nɛ Katɩtɔɔrɩ pɛ-tɛtʋ taa ñɩma cɔzɔ. Kasiluu tɛtʋ taa Filisitii ñɩma lɩnaa.
15 Kanaanɩ ñalʋlɩ: Siidɔɔ, ɛnʋʋ lɛ ɛ-kajalaɣ pɩɣa. Pʋ-wayɩ lɛ, ɛlʋlɩ Hɛɛtɩ. 16 Ɛ́lɛɛ lɛ, Yeebuusii tɛtʋ taa ñɩma nɛ Amoorii nɛ Girigaasii pa-haɖaa taa ñɩma, pɔ-cɔzɔ. 17 Ɛnʋ ɖɔɖɔ lɛ Hiwii liɖe taa ñɩma nɛ Arɩkii nɛ Sinii pɛ-tɛtʋ taa ñɩma cɔzɔ. 18 Ɛnʋ ɖɔɖɔ lɛ Arɩwaadɩ nɛ Semaarii nɛ Hamaatɩ pɛ-tɛtʋ taa ñɩma cɔzɔ. Pʋ-wayɩ Kanaanɩ liɖe taa ñɩma mɩzɩ ɖama, 19 nɛ pɛwɛɛ kpaɣ Siidɔɔ, Geraarɩ hɔɔlʋʋ taa nɛ piwolo pɩsɩnɩ Gaazaa, nɛ Sodom nɛ Gomɔɔrɩ nɛ Adɩmaa nɛ Sebooyim pɔ-hɔɔlʋʋ taa lɛ, piwolo pɩsɩnɩ Lɛsa. 20 Mbaa lɛ Kam liɖe taa ñɩma. Pekpeɣli ɖama cejewiye cejewiye, nɛ kʋnʋŋ kʋnʋŋ, nɛ tɛtʋ tɛtʋ, nɛ ɛjaɖɛ ɛjaɖɛ.
21 Yaafɛɛtɩ ɖalʋ Sɛm lʋlɩ ɖɔɖɔ piya. Ɛnʋʋ lɛ Eebɛɛrɩ b nɛ e-piya nɛ ɛ-sayɩnaa pɔ-cɔzɔ. 22 Sɛm lʋlɩ Elam nɛ Asuuri nɛ Arɩpakɩsaadɩ nɛ Luudi nɛ Aram 23 Aram ñalʋlɩ: Uusi nɛ Huuli nɛ Getɛɛrɩ nɛ Maasɩ. 24 Arɩpakɩsaadɩ ñalʋlɩ: Sela. Sela ñalʋlɩ: Eebɛɛrɩ. 25 Eebɛɛrɩ ñalʋlɩ piya naalɛ. Payaɣ kajalaɣ ñɩnʋ se Peelɛɛgɩ, pʋ-tɔbʋʋ se, Tayʋʋ, mbʋ pʋyyɔɔ yɔ, ɛ-alɩwaatʋ taa tɛtʋ yɔɔ ñɩma tayɩ ɖama. Payaɣ e-neu se, Yokitaanɩ. 26 Yokitaanɩ ñalʋlɩ: Alɩmoodaadɩ nɛ Selɛɛfɩ nɛ Hasarɩmavɛɛtɩ nɛ Yeraa 27 nɛ Hadooram nɛ Uzaalɩ nɛ Dikilaa 28 nɛ Obaalɩ nɛ Abiimayɛɛlɩ nɛ Saabaa 29 nɛ Ofiiri nɛ Hawiilaa nɛ Yobaabɩ. Yokɩtaanɩ pɩyalaa tɩŋa lɛ. 30 Paawɛ Meesaa tɛtʋ nɛ Sefaarɩ pʋŋ hɔɔlʋʋ pɛ-hɛkʋ taa wɩsɩɖɩlɩyɛ taa. 31 Ḿba lɛ Sɛm liɖe taa ñɩma. Pekpeɣli ɖama cejewiye cejewiye, nɛ kʋnʋŋ kʋnʋŋ, nɛ tɛtʋ tɛtʋ, nɛ ɛjaɖɛ ɛjaɖɛ.
32 Mbʋʋ pekpeɣli Nowee pɩyalaa liɖe taa ñɩma. Pama pa-hɩla tɔnaɣ tɔnaɣ nɛ pekpeɣli-wɛ cejewiye cejewiye. Ḿba lʋlɩnɩ Kigiluu tɛʋ wayɩ nɛ pɩlʋlɩ ɛyaa mba pamɩzɩ ɖama ajɛɛ wena awɛ tɛtʋ yɔɔ yɔ, a-taa.