¹ Nakʋyʋ wiye KƖPAƔLƲ ya Abɩram nɛ eheyi-i se, ɛ́kʋyɩ ɛ-ɛjaɖɛ nɛ e-liɖe nɛ ɛ-caa ɖɩɣa pa-taa nɛ ewolo ɛjaɖɛ nɖɩ ɛnʋ wɩlɩɣ-ɩ yɔ ɖɩ-taa. ² Ɛnʋʋ KƖPAƔLƲ eyeki nɛ Abɩram ɛnʋ e-liɖe taa ñɩma huúu nɛ pusu ɛjaɖɛ sɔsɔɖɛ. Ɛnʋ wazɩɣ Abɩram yɔɔ nɛ eyele nɛ ɛ-yɩɖɛ sɛɛ nɛ ɛtɩŋnɩ Abɩram ɛnʋ ɛ-yɔɔ nɛ ɛwazɩ lɛlaa yɔɔ. ³ Ɛtɔm se, ɛwazɩɣ mba pawazɩɣ Abɩram yɔɔ yɔ, pɔ-yɔɔ, nɛ piyele ɛwɩlɩ kpalʋʋ mba paba ñawɩlɩɣ Abɩram kpalʋʋ yɔ. Ɛtɩŋɩɣnɩ Abɩram ɛnʋ ɛ-yɔɔ nɛ ɛwazɩ kpaɖɩŋ weyi ɛwɛ kedeŋa yɔɔ yɔ, ɛ-tɩŋa payɩ ɛ-taa ñɩma yɔɔ.

⁴ KƖPAƔLƲ heyi Abɩram ḿbʋ lɛ, ɛ́lɛ la ḿbʋ ɖɔɖɔ. Ɛkʋyɩ nɛ ɛkpaɣ e-neu pɩɣa Looti, nɛ ɛ nɛ ɩ pɛɖɛɛ. Abɩram kɛwɛnɩ pɩnzɩ nɩɩnʋwa nɛ nɩɩlɛ nɛ kagbaanzɩ (75) alɩwaatʋ ndʋ ɛkʋyɩ Haraanɩ tɛtʋ taa yɔ. ⁵ Ɛɖɛɣaɣ lɛ, ɛkpɛndɩnɩ ɛ-halʋ Saarayɩ, nɛ e-neu pɩyalʋ ɛnʋ, nɛ pa-ñɩm tɩŋa, nɛ tʋmlaɖaa, nɛ yomaa ḿba paawɛ pɔ-cɔlɔ Haraanɩ tɛtʋ taa yɔ, nɛ ewoni ɛjaɖɛ nɖɩ payaɣ se Kanaanɩ yɔ, ɖɩ-taa.

Abɩram nɛ ɛ-halʋ nɛ e-neu pɩyalʋ nɛ pa-tʋmlaɖaa pɔkɔma patalɩ Kanaanɩ ɛjaɖɛ taa lɛ, ⁶ pɔɖɔ ɖɩ-taa nɛ pɔkɔɔ patalɩ ɖenɖe payaɣ se Siicem yɔ, Mooree hɔɔlʋʋ taa kɔdaɣ taa tɩŋ sɔsɔŋ tɛɛ. Alɩwaatʋ ndʋ tɩ-taa lɛ, tɛtʋ ñɩma kɛwɛ ɖɔɖɔ hɔɔlʋʋ ŋgʋ kɩ-taa. ⁷ Peeye KƖPAƔLƲ lɩ ɛ-yɔɔ nakʋyʋ wiye nɛ eheyi-i se ɛhaɣ ɛnʋ Abɩram e-liɖe taa ñɩma ɛjaɖɛ nɖɩ. KƖPAƔLƲ heyi-i ḿbʋ lɛ, ɛma ɛ́lɛ, kɩlaŋ ɖɩlayɛ, lone nɖɩ ɖɩ-taa ɛ́lɛ lɩ ɛ-yɔɔ yɔ. ⁸ Ɛkɔma ɛkʋyɩ peeye lɛ, ɛɖɛɛ pʋŋ hɔɔlʋʋ taa tɛtʋ ndʋ payaɣ se Beetɛɛlɩ yɔ, tɩ-wɩsɩɖɩlɩyɛ taa, nɛ esiɣ kɩɖanɖʋʋ. Kɩ-wɩsɩɖɩɖʋyɛ taa lɛ, panaɣ ɛnʋ ɛyaa tatalɩ pʋyʋ tɛtʋ, nɛ kɩ-wɩsɩɖɩlɩyɛ taa lɛ, tɛtʋ ndʋ payaɣ se Ayi yɔ. Ɛma ɖɔɖɔ peeye KƖPAƔLƲ, kɩlaŋ ɖɩ-layɛ nɛ ewoki ɛyaɣ-ɩ nɛ ɛyɔɔdʋʋnɩ-ɩ. ⁹ Pʋ-wayɩ lɛ, Abɩram kʋyɩ peeye nɛ ɛɖɔmnɩ caɣʋ caɣʋ, nɛ ɛɖɛnɩ hɔɔlʋʋ ŋgʋ payaɣ se Neegɛɛvɩ yɔ kɩ-taa.

¹⁰ Pɩkɛdaa lɛ, ñɔɔsɩ nasɩyɩ lɩɩ Kanaanɩ ɛjaɖɛ taa, nɛ Abɩram kʋyɩ hɔɔlʋʋ ŋgʋ kɩ-taa ɛɛwɛɛ yɔ, se ewoki ɛcaɣ Ejipiti ɛjaɖɛ taa. Mbʋ pʋyɔɔ yɔ, ñɔɔsɩ nzɩ sɩɩɖɛlɩsɩ niye. ¹¹ Ɛ nɛ ḿba paawɛ ɛ-cɔlɔ yɔ, pɛɖɛɣaɣna. Pɔkɔma patala, ɛzɩ paasʋʋ Ejipiti ɛjaɖɛ taa yɔ lɛ, Abɩram heyi ɛ-halʋ Sarayi se, ɛnʋ nawa se eɖewa pɩtɩɩfɛyɩ. ¹² Ejipiti ñɩma ɩkɔma pana-ɩ yɔ, pɔtɔŋ se ɛ-halʋ lɛ, pʋbʋ, pakʋʋ ɛnʋ nɛ peyebi-i. ¹³ Eheyi-i se, ye pɔpɔzɩ-ɩ ḿbʋ lɛ, ɛtɔ se, ɛkɛ ɛnʋ neu nɛ ɛ-yɔɔ lɛ, pala ɛnʋʋ camɩyɛ nɛ pɩtɩŋnɩ ɛ-yɔɔ nɛ pɩya ɛnʋ ñʋʋ. ¹⁴ Toovenim lɛ, Abɩram kɔma ɛtalɩ Ejipiti lɛ, Ejipiti ñɩma na se ɛ-halʋ ɖewa pɩtɩɩfɛyɩ. ¹⁵ Ejipiti wiyaʋ sɔsɔ Faraawɔɔ sɔɔjanaa sɔsaa wolo pe-wiyaʋ ɛnʋ ɛ-cɔlɔ nɛ pasa halʋ ɛnʋ nɛ pakpaɣ-ɩ nɛ powoni wiyaʋ ɖɩɣa taa. ¹⁶ Piyele halʋ ɛnʋ ɛ-yɔɔ lɛ, Ejipiti wiyaʋ sɔsɔ la Abɩram ɖeu. Ɛha-ɩ heŋ nɛ pʋŋ nɛ naŋ nɛ tʋmlaɖaa halaa ñɩma nɛ abalaa ñɩma nɛ kpaŋasɩ halɩñɩnzɩ nɛ abalɩñɩnzɩ nɛ kʋyʋndʋʋ kpaŋnaŋ. ¹⁷ Ɛlɛ, KƖPAƔLƲ yele nɛ wiyaʋ nɛ ɛ-hɔʋ taa ñɩma pasʋʋ kʋñɔmɩŋ sɔsɔŋ nɩɩyɩ taa Abɩram halʋ Saarayɩ yɔɔ. ¹⁸ Wiyaʋ sɔsɔ kɔma ɛna ḿbʋ lɛ, ɛyaa Abɩram nɛ ɛpɔzɩ-ɩ se, pɩlabɩ ɛzɩma nɛ ɛla ɛnʋʋ ḿbʋ? Pɩlabɩ ɛzɩma nɛ eteheyi-i se, ɛnʋʋ Abɩram ɛ-halʋ lɛ? ¹⁹ Pɩlabɩ ɛzɩma nɛ ɛtɔ se e-neu lɛ, nɛ piyele ɛnʋ kpaɣ-ɩ nɛ ɛ́kɛ ɛnʋ halʋ? Ɛlɛ, eheyi Abɩram se, lɛɛlɛɛyɔ, ɛ́na ɛ-halʋ, ɛ́kpaɣ-ɩ nɛ ɛɖɛɛ!

²⁰ Wiyaʋ sɔsɔ tɛm Abɩram yɔɔdɩnaʋ ḿbʋ lɛ, ɛha ɛ-tʋmlaɖaa nɔɔ se, pakpaɣ Abɩram ɛnʋ nɛ ɛ-halʋ nɛ ɛ-ñɩm tɩŋa nɛ powoni-wɛ tɛtʋ kamaɣ yɔɔ, nɛ pɛɖɛɛ.