¹ Alɩwatʋ ńdʋ tɩ-taa lɛ, Amɩraafɛɛlɩ kɛkɛ Siineyaarɩ wiyaʋ, Aariyɔɔkɩ ñɛkɛ Elaasaarɩ ñɩnʋ, Kedɔɔrɩlawomɛɛrɩ ñɛkɛ Elam ñɩnʋ, nɛ Tiidaalɩ ñɛkɛ Goyim ñɩnʋ. ² Awiya ana, anɩnɩ ɖama nɛ a nɛ Sodom wiyaʋ Beeraa, nɛ Gomɔɔrɩ ñɩnʋ Birisaa, nɛ Sineyaavɩ ñɩnʋ Adɩmaa, nɛ Sebooyim ñɩnʋ Sɛmevɛɛrɩ, nɛ Bɛlaa ñɩnʋ, poyoo. Payaɣ ɖɔɖɔ Bɛlaa se, Cowaarɩ. ³ Wayɩ wayɩ awiya ana a-kagbaanzɩ aanɩwa se, awiya ana a-naanza anɩnɩ ɖama se akʋyʋʋ a-yɔɔ. Pʋ-yɔɔ pa nɛ a-ɛyaa paakpeɣli ɖama Siidim kajalaŋa taa. Lone ńɖɩ ɖɩ-taa teŋgu ŋgʋ payaɣ se, Ɖɔm teŋgu yɔ, kɩwɛ alɩwaatʋ tʋnɛ tɩ-taa. ⁴ A nɛ a-ɛyaa paakɛ Kedɔɔrɩlawomɛɛrɩ yomaa pɩnsɩ hiu nɛ naalɛ (12). Ɛlɛ, pakʋyɩ ɛ-yɔɔ pɩnaɣ hiu nɛ naadozo (13) ñɩŋga taa.

⁵ Pʋ-yɔɔ Kedɔɔrɩlawomɛɛrɩ nɛ awiya wena ɛ nɛ yɛ panɩɣnɩ ɖama yɔ, papazɩ you pɩnaɣ hiu nɛ naanza ñɩŋga (14) taa. Pɩcɔ nɛ patalɩ awiya wena pa nɛ yɛ poyou yɔ lɛ, pawabɩ Reefaa ñɩma Asɩtarɔɔtɩ Karɩnayim tɛtʋ taa, nɛ Zuuzi ñɩma Ham ñɩndʋ taa, nɛ Emim ñɩma Kiriyaatayim kadaŋa taa. ⁶ Piyele Hoorii ñɩma lɛ, pawabɩ pabaa pɛ-tɛ, Seyiiri pʋŋ taa, nɛ pɔɖɔɔnɩ-wɛ nɛ pɔkɔɔ patalɩ ɖenɖe payaɣ se, Ɛɛlɩparaanɩ yɔ, pɩñɔtɩnɩ lakʋ. ⁷ Pʋ-wayɩ lɛ, papɩsɩnɩ ɖenɖe payaɣ se, Eyini Misipaatɩ yɔ, pʋ-hɔɔlʋʋ taa. Payaɣ peeye ɖɔɖɔ se, Kadɛɛsɩ. Peeye pakʋ Amalesii ɛjaɖɛ taa ñɩma tɩŋa, nɛ halɩ pɩkpɛndɩnɩ Amoorii ñɩma ḿba pɛwɛ Hacacɔɔrɩtamaarɩ yɔ. ⁸ Pʋ-yɔɔ Sodom nɛ Gomɔɔrɩ nɛ Adɩmaa nɛ Cevooyim nɛ Bɛlaa pa-awiya nɛ pɔ-sɔɔjanaa paalɩ Siidim kajalaŋa taa se, pakʋyɩ pɔ-yɔɔ. Payaɣ ɖɔɖɔ Beelaa se, Cowaarɩ. ⁹ Pakʋyɩ Elam wiyaʋ Kedɔɔrɩlawomɛɛrɩ, nɛ Goyim ñɩnʋ Tiidaalɩ, nɛ Mezoopotamii ñɩnʋ Amɩraafɛɛlɩ, nɛ Elaasaarɩ ñɩnʋ Aariyɔɔkɩ pɔ-yɔɔ. Tobi taa lɛ, Awiya naanza kʋyɩ awiya Kagbaanzɩ yɔɔ! ¹⁰ Ŋgʋ, aŋwɔ lɔkɔnaa sakɩyɛ kɛwɛ Siidim kajalaŋa taa peeye. Sodom wiyaʋ nɛ Gomɔɔrɩ ñɩnʋ pɛ-ɛyaa peseɣaɣ lɛ, pa-taa nabɛyɛ tɔlɩ lɔkɔnaa ḿba pa-taa. Piyele ḿba pɩkazaa yɔ, pese pakpa pʋʋ taa nɛ pɛmɛlɩ. ¹¹ Ɛlɛ, waɖaa ñakpaɣ Sodom ñɩma nɛ Gomɔɔrɩ ñɩma pa-ñɩm nɛ pɔ-tɔɔnasɩ nzɩ paamɛsaa yɔ sɩ-tɩŋa nɛ pacaŋ pɛɖɛɛ. ¹² Paakpaɣ ɖɔɖɔ Abɩram sayɩ Looti:^h nɛ ɛ-ñɩm tɩŋa. Ɛ́lɛ kɛwɛ Sodom. ¹³ Pɩlabɩ ḿbʋ lɛ, nɔɔyʋ se nɛ ɛtʋlɩ. Ɛnʋ wobina nɛ eheyi Ebiree tʋ Abɩram mbʋ pɩlaba yɔ. Ɛ́lɛ ñaawɛ Amoorii tʋ Mamɩree kɔdaɣ taa tɩŋ sɔsɔŋ cɔlɔ. Mamɩree lɛ Esikooli nɛ Anɛɛrɩ pa-dalʋ. Pa-naadozo pɛkɛ Abɩram hɔɔlʋʋ taa ñɩma. ¹⁴ Abɩram kɔma ɛnɩɩ se, papɩsɩ ɛ-sayɩ Looti yom lɛ, ekpeɣli ɛ-ɛyaa, e-liɖe taa ñɩma, abalaa nasidozo nɛ hiu nɛ lutozo (318), nɛ pɔɖɔɔnɩ po-koyindinaa nɛ pɔkɔɔ patalɩ Daanɩ tɛtʋ taa. ¹⁵ Patalɩ peeye lɛ, Abɩram tayɩ ɛ-ɛyaa tikasi sakɩyɛ taa nɛ ɛkʋyɩ e-koyindinaa yɔɔ nɛ ɖoó. Ɛwabɩ-wɛ nɛ Ɛɖɔɔnɩ-wɛ nɛ pɔkɔɔ patalɩ Daamaasɩ tɛtʋ hayi kiŋ, ɖenɖe payaɣ se, Hoobaa yɔ. ¹⁶ Ɛlɛ, ɛmʋ ñɩm mbʋ pɩ-tɩŋa paakpaɣaɣ yɔ, nɛ pɩkpɛndɩnɩ ɛ-sayɩ Looti, nɛ ɛ́lɛ ñɩm, nɛ halaa, nɛ yomaa lɛlaa.

¹⁷ Abɩram tɛm Kedɔɔrɩlawomɛɛrɩ nɛ ɛ-ɛgbaadinaa awiya lɛɛna wabʋ nɛ ɛpɩsɩɣ lɛ, Sodom wiyaʋ katɩ-ɩ Saawee kajalaŋa taa. Payaɣ peeye ɖɔɖɔ se, Wiyaʋ kajalaŋa. ¹⁸ Peeye Saalɛm wiyaʋ Mɛlɩkiseedɛɛkɩ ⁱ woni tɔɔnaɣ nɛ sʋlʋm. Ɛɛkɛ Ɛsɔ Caabiyuu cɔjɔ. ¹⁹ Ewoba lɛ, ɛwazɩ Abɩram yɔɔ: Ɛtɔm se,

Peeye Abɩram tayɩ ñɩm mbʋ ɛkɔnɩnɩ you taa yɔ pɩtɩŋa tɔm hiu (10) nɛ ɛkpaɣ hɔɔlʋʋ kʋɖʋmʋʋ nɛ ɛha-ɩ.

²¹ Pɩlabɩ ḿbʋ lɛ, Sodom wiyaʋ heyi Abɩram se, ɛ́lɛ ɛcɛlɩ-ɩ ɛ-ɛyaa ḿba ɛ́lɛ mʋwa yɔ nɛ piyele ɛ́lɛ sɩɩ ɛ-tɩ ñɩm. ²² Ɛlɛ, Abɩram ñocosi Sodom wiyaʋ se, ɛnʋ ɖuuni KƖPAƔLƲ Ɛsɔ Caabiyuu weyi ɛlabɩ ɛsɔdaa nɛ tataa yɔ se, ²³ ɛnʋ ɛɛkpakɩɣ mbʋ pɩkɛ wiyaʋ ɛnʋ ɛ-ñɩm yɔ pɩ-taa nabʋyʋ. Paa nimaɣ maɣmaɣ, yaa naataŋgbaɖɛ tɔnaɣ. Pɩtɛkɛ mbʋʋ yɔ, ɛkɔŋ ɛtɔ se, ɛpɩsɩ Abɩram ɛnʋʋ ñɩmdʋ! ²⁴ Se, ɛnʋ ɛɛsɩɣ ɛ-tɩ nabʋyʋ nɛ pɩtasɩnɩ tɔɔnaɣ ŋga e-evebiya tɔwaa yɔ, nɛ Anɛɛrɩ nɛ Ɛsikooli nɛ Mamɩree, mba pa nɛ ɩ patam nɔɔ yɔ, pa-ñɩm mbʋ pɩpɔzaa se pɛcɛlɩ-wɛ yɔ.