26
Izaakɩ nɛ Reebeeka powobu pacaɣ Geraarɩ yɔ
1 Ñɔɔsɩ nasɩyɩ kalɩ alɩwaatʋ ndʋ tɩ-taa Izaakɩ kɛwɛ Lahayɩ Rooyi lɔkɔ cɔlɔ yɔ. Ɛlɛ, pɩtɛkɛ nzɩ sɩɩlɩ Abɩraham alɩwaatʋ taa yɔ. Pʋ-yɔɔ Izaakɩ kʋyaa nɛ ewolo ɛcaɣ Filisitii ñɩma wiyaʋ Abimelɛɛkɩ tɛ, egeetiye nɖɩ payaɣ se Geraarɩ yɔ, ɖɩ-taa. 2 Peeye KƖPAƔLƲ lɩzɩ ɛ-tɩ nɛ ɛwɩlɩ Izaakɩ nɛ eheyi-i se, ɛtaawolo Ejipiti ɛjaɖɛ taa. Ɛlɛ, ewolo ɛcaɣ ɛjaɖɛ nɖɩ ɛwɩlɩɣ-ɩ yɔ ɖɩ-taa. 3 Se, ɛ́caɣ peeye. Ɛnʋ wɛɣ ɛ-cɔlɔ nɛ ɛwazɩ ɛ-yɔɔ. Toovenim lɛ, ɛnʋ kaɣ haʋ ɛ nɛ e-liɖe taa ñɩma tɛtʋ ńdʋ. Mbʋʋ ɛnʋ kaɣ labʋ mbʋ eeɖuwaa se, ɛlakɩ ɛ́lɛ caa Abɩraham yɔ. 4 Se, ɛnʋ kaɣ labʋ nɛ ɛ́lɛ piya nɛ ɛ́lɛ sɛyɩnaa pɔɖɔɔ ɛzɩ ɛsɔdaa tɩyɩnzɩ yɔ. Se, ɛnʋ kaɣ-wɛ cɛlʋʋ tɛtʋ ndʋ ti-kpeekpe. Se, ɛnʋ kaɣ tɩŋɩnaʋ pɔ-yɔɔ nɛ ɛwazɩ tataa ajɛɛ kpeekpe yɔɔ. 5 Mbʋ pʋyɔɔ yɔ, Abɩraham ɖɔm ɛnʋ tɔm yɔɔ. Ɛlabɩ mbʋ ɛnʋ heyi-i yɔ, ɛɖɔm ɛnʋ paɣtʋ yɔɔ, ɛñam mbʋ ɛnʋ ɖʋwa yɔ nɛ ɛla mbʋ pɩ-tɩŋa payɩ ɛnʋ wɩlɩ-ɩ yɔ.
6 Pʋ-yɔɔ, Izaakɩ woba ɛcaɣ Geraarɩ hɔɔlʋʋ taa peeye.
7 Hɔɔlʋʋ ŋgʋ kɩ-taa ñɩma pɔzɩ Izaakɩ, ɛ-halʋ tɔm. Ɛ́lɛ ñocosi-wɛ se, ɛkɛ ɛnʋ neu. Ɛtakatɩɣ se eheyi-wɛ se Reebeeka kɛ ɛ-halʋ. Mbʋ pʋyɔɔ yɔ, eseɣaɣ se, peeye ñɩma ɛtaakʋ-ɩ. Toovenim lɛ, Reebeeka keɖe pɩtɩɩfɛyɩ. 8 Izaakɩ kɔma ɛcaɣ peeye nɛ pileɖi lɛ, nakʋyʋ wiye Filisitii ñɩma wiyaʋ Abimelɛɛkɩ cɔnɩnɩ muntoɖe pɔʋ nɛ ɛna Izaakɩ saɣyaɣ ɛ-halʋ Reebeeka yɔɔ. 9 Peeye, Abimelɛɛkɩ tiyaa nɛ payaa Izaakɩ nɛ ɛ́lɛ ñowolo. Ewoba lɛ, Abimelɛɛkɩ heyi-i Reebeeka tɔm se, toovenim lɛ, ɛkɛ ɛ-halʋ! Pɩlabɩ ɛzɩma nɛ ɛtɔ se ɛkɛ e-neu? Izaakɩ cosi-i se, too! Ɛnʋ yɔɔdɩ ḿbʋ, mbʋ pʋyɔɔ yɔ, sɔɔndʋ kpaɣaɣ ɛnʋ se ɛ́lɛ yɔɔ lɛ, ɛnʋ ɛtaakɔɔ ɛsɩ. 10 Abimelɛɛkɩ tasɩ tɔm se, ɛbɛɛ ɛlabɩ ḿba ḿbʋ? Pɩkazɩ pazɩ yem se ɛnʋ samaɣ taa nɔɔyʋ nɛ ɛ-halʋ pacaɣ. Pɩɩlabɩ ḿbʋ, ɛ-yɔɔ lɛ, pataakpaɣ kɩwɛkɩm ḿbʋ nɛ pasʋʋ ḿba yaa we? 11 Peeye, Abimelɛɛkɩ heyi ɛ-samaɣ kpeekpe se, ye nɔɔyʋ etukuni abalʋ ɛnʋ nɛ ɛ-halʋ pɔ-yɔɔ yɔ, pakʋʋ pʋdʋ.
12 Pɩnaɣ ŋga ka-taa Izaakɩ hayɩ ɛjaɖɛ ńɖɩ ɖɩ-taa nɛ KƖPAƔLƲ wazɩ ɛ-yɔɔ nɛ ɛkʋ nɛ pɩkɩlɩ mbʋ eɖuwa yɔ tɔm mɩnʋʋ. 13 Ɛ-ñɩm wɛ́ɛ pɩtɛzɩɣ huúu kúhuúu, nɛ ɛpɩsɩ ñɩmdʋ sɔsɔ siŋŋ. 14 Ɛɛwɛnɩ heŋ nɛ pʋŋ nɛ naŋ pɩfɛyɩ yɔɔdʋʋ, nɛ tʋmlaɖaa sakɩyɛ.
Izaakɩ nɛ Abimelɛɛkɩ panɩʋnɩ ɖama yɔ
Peeye, Filisitii ñɩma pazɩ Izaakɩ ɛzɩsɛmɩyɛ labʋ. 15 Pʋ-yɔɔ powoba pokuu tɛtʋ nɛ posuyi lɔkɔnaa mba ɛ-caa Abɩraham tʋmlaɖaa kohuyaa yɔ, pa-tɩŋa. 16 Peeye, Abimelɛɛkɩ heyi Izaakɩ se, ɛ́kʋyɩ pɛ-tɛ nɛ ɛɖɛɛ, mbʋ pʋyɔɔ yɔ, lɛɛlɛɛyɔ, ɛkɩlɩ ḿba.
17 Pɩlabɩ ḿbʋ lɛ, Izaakɩ kʋyɩ peeye nɛ ewolo ɛcaɣ Geraarɩ kajalaŋa taa. 18 Izaakɩ lazɩ lɔkɔnaa ḿba paahuyi-wɛ ɛ-caa Abɩraham alɩwaatʋ taa nɛ Filisitii ñɩma suyi-wɛ ɛ́lɛ sɩm wayɩ yɔ. Izaakɩ yáa lɔkɔnaa ḿba hɩla wena ɛ-caa kaaya-wɛ yɔ.
19 Nakʋyʋ wiye, Izaakɩ tʋmlaɖaa huyi lɔkɔ Geraarɩ kajalaŋa taa nɛ patʋlɩ lɩm kɩbam yɔɔ. 20 Peeye, Geraarɩ ninɖiyaa pazɩ Izaakɩ ñɩma tɔm caʋ, nɛ pɔtɔŋ se, lɩm ḿbʋ pɩkɛ ḿba ñɩmbʋ. Pʋ-yɔɔ Izaakɩ ya lɔkɔ ŋ́gʋ se Esɛɛkɩ, pʋ-tɔbʋʋ se, you lɔkɔ. 21 Ɖɩnɛɛ, Izaakɩ tʋmlaɖaa tasɩ lɔkɔ lɛɛkʋ huyuu nɛ pa nɛ wɛ pɛkɛzɩ ɖama tɔm kʋkʋ yɔɔ ɖɔɖɔ, nɛ ɛyaa-kʋ se Sitinaa. Pʋ-tɔbʋʋ se, nɔɔhɔnɖɛ lɔkɔ. 22 Peeye, ɛkʋyaa nɛ eposi ɛ-tɩ nɛ ɛtasɩ lɔkɔ lɛɛkʋ huyuu. Kʋkʋ yɔ, potoyoo kʋ-yɔɔ. Pʋ-yɔɔ ɛya-kʋ se Reehobooti, pʋ-tɔbʋʋ se, Lone nɖɩ ɖɩwalaa yɔ. Ɛtɔm se, lɛɛlɛɛyɔ, KƖPAƔLƲ ha mbaa lone se papɩzɩ pehiɣ pa-tɩ ɛjaɖɛ nɖɩ ɖɩ-taa.
23 Pʋwayɩ lɛ, ɛkʋyɩ peeye nɛ ewolo ɛcaɣ Bɛɛrɩseva. 24 Ɖoó kɔma puyu lɛ, KƖPAƔLƲ lɩzɩ ɛ-tɩ nɛ ɛwɩlɩ Izaakɩ nɛ eheyi-i se,
ɛnʋʋ lɛ ɛ-caa Abɩraham Ɛsɔ!
Se, sɔɔndʋ ɛtaakpa-ɩ, mbʋ pʋyɔɔ yɔ, ɛnʋ wɛ ɛ-cɔlɔ.
Se, ɛnʋ tʋmlaɖʋ Abɩraham yɔɔ lɛ,
ɛnʋ kaɣ ɛ-yɔɔ wazʋʋ
nɛ eyele nɛ e-liɖe taa ñɩma húu.
25 Peeye Izaakɩ ma kɩlaŋ ɖɩlayɛ lone nɖɩ ɖɩ-taa nɛ ɛsɛɛ Ɛsɔ nɛ ɛyaa-ɩ se, KƖPAƔLƲ. Pʋwayɩ lɛ, esiɣ peeye ɛ-kɩɖandɩŋ nɛ ɛ-tʋmlaɖaa huyi lɔkɔ lɛɛkʋ.
26 Izaakɩ wɛ Bɛɛrɩseva peeye ḿbʋ lɛ, Abimelɛɛkɩ nɛ ɛ-taabalʋ Ahuzaatɩ nɛ ɛ-you laɖaa ñʋʋdʋ Piikɔɔlɩ, palɩnɩ Geraarɩ egeetiye taa nɛ powolo ɛ-cɔlɔ se pana-ɩ. 27 Izaakɩ pɔzɩ-wɛ se, ɛbɛ yɔɔ powoba se pana ɛnʋ, mbaa mba pataanaɣ ɛnʋ nɛ ɛsɩyɛ nɛ pɔɖɔɔnɩ ɛnʋʋ pɛ-tɛ yɔ? 28 Paba ñocosi-i se, ḿba na kaɣlaa se KƖPAƔLƲ wɛ ɛ-cɔlɔ. Pʋ-yɔɔ ḿba maɣzaa se pɩwɛɛ se ḿba nɛ ɩ poɖuu se panɩnɩ ɖama. 29 Se, eɖuuni Ɛsɔ se ɛɛlakɩ ḿba kɩdɛkɛdɩm nabʋyʋ, mbʋ pʋyɔɔ yɔ, ḿba ɖɔɖɔ tɩlabɩ-ɩ kɩdɛkɛdɩm nabʋyʋ. Ɛ́lɛ, mbʋ pɩwɛ ɖeu yɔ, pi-ɖeke ḿba laba-ɩ, nɛ peyebi-i nɛ ɛɖɛnɩ laŋhɛzɩyɛ. Se, lɛɛlɛɛyɔ, ɛkɛ weyi KƖPAƔLƲ wazɩ ɛ-yɔɔ yɔ. 30 Ɖɩnɛɛ Izaakɩ labɩ-wɛ tɔɔnaɣ kɩbaŋga nɛ pɔtɔɔ nɛ pɔñɔɔ. 31 Kifema lɛ, pakʋyɩ pa-tɩŋa tanaŋ tɛɛ cu nɛ paa pa-taa anɩ, eɖuuni Ɛsɔ se ɛlakɩ ɛ-taabalʋ mbʋ ɛɖʋwa se ɛlakɩ yɔ. Pʋwayɩ lɛ, Izaakɩ sɛɛ-wɛ se, pɩlabɩ wiɖiyi, nɛ payasɩ ɖama laŋhɛzɩyɛ taa.
32 Kɩyakʋ kʋɖʋmʋʋ ŋgʋ ki-wiye, Abimelɛɛkɩ nɛ ɛ-taabalaa pɛɖɛwa lɛ, Izaakɩ tʋmlaɖaa wolo nɛ pɛkɛdɩ ɛ́lɛ lɔkɔ ŋgʋ paɖaɣnɩ huyuu yɔ kɩ-tɔm. Peheyi-i se, patʋlɩ lɩm yɔɔ. 33 Izaakɩ yaa lɔkɔ ŋ́gʋ se, Siba. Ḿbʋ yebina nɛ halɩ nɛ sɔnɔ payaɣ tɛtʋ ńdʋ se Bɛɛrɩseva a.
Ezaawʋ kpaɣʋ halʋ yɔ